Sakaria 6 - NTSHOB NSI

Njem mbatte fome: Nkalig nkuà

¹ Me bèn mbù' miag màm ndôte, njen mum njem nkalig nkuà nke ntum netèt mbat bàa; tshen mbat là na' mb'a mbat tùne.

² Nyàmdiaṅ ts'a be num mbwe kalig là na' mb'a tse meba, ts'a be num mbatte kalig bàa là be tse nesèn,

³ ts'a be num mbatte kalig tat là be tse fôgtab, ts'a be num mbatte kalig kuà là be tse nto'nto', tse meba.

⁴ Me tshob Angél ze bag yi ke ntshobte là ndù: A ke li Tshùaben àm?

⁵ Angél bùnte ndù: Tshen nà b'a bag kamànyam kuà, tse bo tum dù' ze bo tsinte bwe mbwe Tshùaben njoṅ njù nsitsha' fa là.

⁶ Nyàmdiaṅ nesèn tse bo taṅte yub num semo' kalig là lo ntshùb nze nèn bag ngô z'a be tu là, tse fôgtab tam njam bo; tse nto'nto' lo ntam nze, nèn bag ngô z'a be mà ntèn nà.

⁷ Tse meba tum, mbètte nenèn num nsitsha'a. Angél tshob bo ndù: Bin nèn nzinte num nsitsha'a.

⁸ A tsiaṅ à ntshob me ndù: Tshù, ben tse tshùb nze, nke nèn bag ngô z'a tu là, bo nsi ghù ywèt Tshùaben nô num ngô z'a tu là.

Yoshua tù' kua' ngatshob ntshob Nsi

⁹ Tshùaben tshob me ndù:

¹⁰ Bam nekwé nda' ben tse bo be ndà kuan nà, nda' tse Héldai, Tobiya bo Jédaya se' yi là; nèn ndà Yosias nshum Sofoni sènni, dù' ze tshen ben nà se' nkum bwe ndùse bo fe Babilon nà.

¹¹ O nsi kwé nkàb mba gol bo, lo' nabte tshe' s'o te tu Yoshua, nshum Yotsadak, ngale'te Nsi ze ndùb yi là.

¹² O nsi tshob yi ndù: Tshù ju ze Tshùaben tàndà ntsho tshob li: tshù mèn ze lén se be “Nzwit li”. Tshu nsi bit num ntshùa mi. A nsi kut ndà Tshùaben;

¹³ a nsi ket lèn ts'a be tse keki fen nà; a nsi tswe nsi, tswe num diaṅkwa se sa'a, ngale'te Nsi nsi tsin num bag bu i ze zwim, ntshu ntshù' ze ndùb nsi ke tô yub njamnjam.

¹⁴ Mba tshe' là bo nsi yab i mum ndà Tshùaben, ndù a be ju nekwimte Héldai', Tobiya, Jédaya bo Hen nshum Sofoni.

¹⁵ Ben tse bo be ngùanesà là nsi se' fa' mum ndà Tshùaben; yen ngelaṅ nà bin nsi lèn ndù Tshùaben tàndà ntsho lo tum àm mbaṅ bin. Yen nu là nsi bumte, a be ze bin ju' nze Tshùaben Nsi zin nà.