Sakaria 4 - NTSHOB NSI

Njem mbatte tàn: Lambo bo tshatene

¹ Angél ze bag yi ke ntshobte là se' nkam àm, me vôg mba mèn ze bo kam i num miaglo là.

² A tshob me ndù: Ke z'o yen à? Me bùnte ndù: Me yen mo' lambo ndù njoṅ i fa b'a gol bo tun i ndù a ghù nka' sammbàa mfe tu bwe;

³ nten mbàa be mbaṅ bwe, semo' be num bag i ze zwim, semo' be num bag i ze kwéb.

⁴ Me bèn ntshob Angél ze bag yi ke ntshobte là ndù: Tshen tshu li bagt'a ndùke?

⁵ Angél ze bag yi ke ntshobte là bùnte me ndù: O ke' lèn mba tshen tshu là tshwèt mbagte là ké? Me bùnte ndù: Nga àm me Tshùaben.

⁶ Ndùlala a tshob me ndù: Men ni b'a ntshob mi Tshùaben tshwèt tshob Zorobabél là: A ke b'a nu ngù', ke be nu neta, là nda' njam ywèt tshàm, Tshùaben tàndà ntsho bèn ntshobe.

⁷ O b'a we mbwe Zorobabél mbat ndùb? O nsi tù' tômbo'o. Zorobabél nsi be yab loṅ s'a num tù, s'a sô ntùm mbat là tshu'te be, nke ntshob ndù: Me labte? Me labte num bwe.

⁸ Tshùaben bèn ntshob me ndù:

⁹ Mbu Zorobabél bèn nte yen ba' li nsi, be mbu mi nsi bèn miagt'é; yen ngelaṅ nà o nsi lèn ndù Tshùaben tàndà ntsho bèn ntum i mbaṅ bin.

¹⁰ Nummbe ben tse bo ke ngwag bontsit neto'te là nsi tsiaṅte ndùse bo nsi yen ju nelo' mfi' ba' a tsin bu Zorobabél là. Tshen nka' sammbàa là b'a miag Tshùaben mi a be nzinte num njoṅ nsitsha' fa là.

¹¹ Me bùnte ntshob yi ndù: Men nten mbàa mi a be mbaṅ lambo, bu zwim mba bu kwéb là bagt'a ndùke?

¹² Me bèn ntshob yi mbatte bàa ndù: Tshen tshaten bàa ts'a be mum mbu lambo gol dù' ze mfèt neziag be nké bwe là bagt'a ndùke?

¹³ A bùnte ndù: O ke' lèn mba bo tshwèt mbagte là ké? Me tshob ndù: Nga àm me Tshùaben!

¹⁴ A tshob me ndù: Bo b'a ben neyo' bàa tse bo be ntsin mbwe Tshùaben njoṅ nsitsha' fa là.