Sakaria 3 - NTSHOB NSI

Njem mbatte kuà: Yoshua ngale'te Nsi ze ndùb

¹ A ghù me yen Yoshua, ngale'te Nsi ze ndùb, ndù a tsin tù mbwe Angél Tshùaben, Satan tsin tù num bag bu i ze zwim, nke mbot'é.

² Angél Tshùaben tshob Satan ndù: a bwô ndù Tshùaben kab ntshu o, tu wul i bèn ntsho' Yérualém. Yuda ke' b'a nesèn mbwôg ze bo sô mbwô là ké?

³ Tshù, Yoshua lo ket nzwe ts'a sagte là num i, ndùs'a tsin tù mbwe Angél là.

⁴ Angél bùnte ntshob ben tse bo be mbwe i là ndù: Bin sô nzwe ts'a sagte là num i! A tshob Yoshua ze ndù: Tshù, me sô mfànnu mo, ma' nzwe jùa num o.

⁵ Me tshob ndù: A bwô ndù bo lam tu i nzwe nelàne! Bo lam tu i nzwe nelàne, ma' ba nzwe num i. Angél Tshùaben lo be bwe, ndù a tsin tù.

Nsi a' tsiaṅ ngafa' i

⁶ Angél Tshùaben tshob men ntshob li Yoshua ndù:

⁷ Tshù ju ze Tshùaben tàndà ntsho tshob li: A be z'o zin num tshàm manze, mbèn nze ntshù' màm nà, mb'o nsi be ngatô mum ndà àm, bèn béb tshàm bam ntshundà, me bèn ngù o tsho netèt ben tse bo be nsen ni là.

⁸ Ndùlala ju' me Yoshua ngale'te Nsi ze ndùb, wù mba shunfa' tsho tse bo tswete mbwe o là! Tshù, me nsi ghù ngafa' à se'e. Bin b'a Nzwit. Bin b'a keki ze nese'e.

⁹ Mbe se' mba loṅ se me te mbwe Yoshua là, miag sammbàa te nda' num sen nkwi loṅ ntshù' là; Tshùaben tàndà ntsho tshob ndù: Tu wul àm nsi tshebte ju z'a bwô ndù bo tshebte num bwe là; tshù, me nsi sô mfànnu yen ngô li mum ta' lé'njù ntshù'.

¹⁰ Mum sen lé'njù là, mèn nsi tsiaṅ mèn mèn tsiaṅ mèn, ndù bin bumte tun nkùa mba tun mbatsi, Tshùaben tàndà ntsho bèn ntshobe.