Sakaria 2 - NTSHOB NSI

Njem mbatte bàa: Ba ndô kuà bo ba tàlàm

¹ Tshù, me bù' miag màm nke ndôte, njen ndô kuà mum njem.

² Me tshob Angél ze bag yi ke ntshobte là ndù: Tshen ndô li b'a ndùke? A tshob me ndù: Tshen ndô là na' mbèn nsate Yuda, Israél bo Yérusalém.

³ Tshùaben ghù me yen tàlàm kuà.

⁴ Me bètte ndù: Bo se' ghù à ke? A tshob me ndù: A ndô tse bo na' nsate Yuda kà sàm mèn ke bèn nebù' tu i nsi là; tshen tàlàm nà se' nekag à bwôg, mba nelab ndô ngôngô tse bo bù' ndô mub tù mum ngô Yuda, num nebiagte ba la' tse là.

Njem mbatte tat: Nefi' màla

⁵ Tshù, me bù' miag màm nke ndôte, njen mo' mèn ntùm njem ndù a tshùb nkù bu i num nefi' dù' yi.

⁶ Me bètt'é ndù: O nèn à yà? A tshob me ndù: Me nèn fi' à Yérusalém, yen bam se mba mb'a sag yi là.

⁷ Tshù, Angél bag yi ke ntshobte là kù' nèn mbwe, mo' Angél nèn mbumte bo yi,

⁸ ntshob yi ndù: Kù nde nèn ntshob yen ménnshum ni ndù: Yérusalém nsi b'a ngô z'a nsi gha'te là, num benntùn yàm boa nyàm yàm tse bo nsi be ntùm bwe là.

⁹ Tshùaben tshob ndù: Me nsi ke kuni netèl i, ndiaṅ i bum mba kàbngô là.

¹⁰ Tshùaben tshob ndù: Bin kù, bin kù bag ngô z'a tu là; nummbe me lo sate zin num bag njù kuà fa. Tshùaben bèn ntshobe.

¹¹ Yôg wul o me Sion, wù z'o be ntswe Babilon nà!

¹² Nummbe Tshùaben tándà ntsho z'a na' ntum àm kekônkô mbaṅ ngôngô tse bo lagte zin nà tshob ndù: Mèn z'a kwag zin nà kwag nyilag àm.

¹³ Tshù, me bù' bu àm nsi num bo, ben tse bo na' mbe kuan tshob là nsi lagte yube. bin lèn ndù Tshùaben tàndà ntsho lo tum àm.

¹⁴ Tshag nz'o tù ntùm ṅwate, nke ntsiaṅte me ngon Sion! Tshù, me tshwèt nse'e, me nsi tswe netèl o, Tshùaben bèn ntshobe.

¹⁵ Ngôngô yàm nsi taṅ num àm sen lé'njù là, tù' yàm nzwit mèn; me nsi tswe netèl o, o lèn ndù Tshùaben tàndà ntsho na' ntum àm mbaṅ o.

¹⁶ Tshùaben nsi lo' Yuda mba ze ju là. A nsi tsho' Yérualém lo' ghù ze ju yi mum tsha' ngô nelàne.

¹⁷ A bwô ndù mènntùn tswe ndù kam mbwe Tshùaben! nummb'a bam ntùm dù'ntswe i ze nelàne.