Sakaria 14 - NTSHOB NSI

Miagte ntsho bo mba Tshùaben se' là

¹ Tshù, lé'njù Tshùaben ṅwage. Bo nsi lagte tsho ntsha' fa bèn ghabte be netèl o.

² Me nsi kùmte njoṅ ngôngô fa num neghù ndù bo kam Yérusalém ntsho; bo nsi lo' ngô, lagte mba', lo' bènnzwi tùntùn; ta' kam ngô nsi nèn ndà kuan. Là bo ke nsi biagte tshé' nzwit mèn ntùm ngô.

³ Tshùaben nsi ṅwage, ma' tshen ngô là ntsho, mb'a be ma' ntsho mum lé'njù ntsho là.

⁴ Mum sen lé'njù là nku mi nsi te num mbat nten z'a be mbwe Yérusalém, bag ntumnyam nà. Mbat nten nsi bèt bag bàa netèt bwe nelo bag ntumnyam nkum bag mbinyam; mo' mà tômbo' ndùb nsi be bwe. Ta' kam mbat nsi kù nèn tu mo' kam i nèn mà ntèn.

⁵ Bon nsi kù nèn mum tômbo' mbat tshàm, nummbe tômbo' ba mbat nsi nèn tà nkum Asél; bin nsi kù mba bin na' nkù mbwe tsha' z'a ke nyi'te num ze ngelaṅ Ozias, mfen Yuda là. Tshùaben Nsi àm nsi se'e, boa njoṅ ben tse tse nelàn fa.

⁶ Mum sen lé'njù là, nelàn ke nsi be, mfùag bo nywinmbaṅ ke be.

⁷ A nsi b'a nkwi lé'njù, se Tshùaben lèn nà, a ke nsi be mbwôgtshù ke be njame; là, a nsi be mfetnjù nelàn ṅwage.

⁸ Mum sen lé'njù là ntse yôg nsi tum Yérusalém, ta' kam ntse swe' naṅ dibantse z'a bag ntumnyam nà; mo' kam i swe' naṅ dibantse z'a bag mbinyam nà; a nsi be dum mb'a be mbe sàn nà.

⁹ Tshùaben nsi be mfen njoṅ nsitsha' fa; mum sen lé'njù là Tshùaben nsi be Tshùaben tù' i, lén se nsi be nkwi lén ntshù'.

¹⁰ Njoṅ ngô fa nsi tù' tômbo' nelo Guéba nèn nkum Rimmon, bag Yérualém z'a mà ntèn nà; bo nsi bù'te Yérusalém, a tswe num ze dù', neto' nzendà Benjamin nèn nkum dù' mbwe nzendà be là, nèn nkum nzendà ntôgndà, nto' num nesà ba' Hananél nèn nkum dù' ze ntshàb ndu' mfen be là.

¹¹ Bo nsi tswe ntùm bwe, nezwite benntùn be ke bèn mbe, nummbe Yérusalém nsi be ntùm fite.

¹² Tshù keko' se Tshùaben nsi tam num njoṅ ntumntum fa tse be bo le' Yérusalém ntsho li: Mbàb yub nsi sàmte naṅ nsi ndùse bo ke' nzin nku là, miag mub nsi sàmte kôg tam ntùm ngem miag mube, lém sob sàmte ntsho' ngwù ntshu bo.

¹³ Tshùaben nsi kag tshu'tu ndùb netèt bo num sen lé'njù là; mèn nsi tshùb bu mèn, bo nsi bù' bu yub num tu wut tshob bo bo.

¹⁴ Mba Yuda nsi ma' ntsho mum Yérusalém. Bo nsi kùmte tshunkàb ngôngô fa ts'a diaṅ i mbum nà; kùmte gol, nkàb bo nzwe kua' mà mbe' i yàme.

¹⁵ Keko' nsi tsho mba num nyàmdiaṅe, num nyàm tse kekwèn bo nyàmdiaṅ bèn mbwe là, num ba Kamél, num nkekwène, boa njoṅ nyàm fa tse bo nsi be mum tshen mbàn nà là. Sen keko' là nsi tute semo'o.

¹⁶ Tshé' benntùn tse bo nsi bwe' netèt njoṅ ngôngô fa tse bo lo nsi num Yérusalém nà, nsi ko' nèn Yérusalém mba zit ngu'njù lo, num nevù nsi mbwe mfen, Tshùaben tàndà ntsho, mba nejù jùa ntàb.

¹⁷ A be ze tsemo' tunndà num nsitsha' ke' ko' nèn Yérusalém num nevù nsi mbwe mfen, Tshùaben tàndà ntsho là, mba mbaṅ ke nsi lo num bo.

¹⁸ A be ze tunndà z'a Egipto là ke' ko', a be z'a ke' nèn nà, mba keko' se Tshùaben nsi lo' lab ngôngô tse bo ke nsi ko' nèn jù jùa ntàb là nsi tsho num i.

¹⁹ A nsi b'a nevù ntsha mum ngô Egipto, a nsi b'a nevù ntsha num njoṅ ngôngô fa tse bo ke nsi ko' nèn Yérusalém num nejù jùa ntàb là.

²⁰ Mum sen lé'njù là bo nsi kite num ṅwa ba nyàmdiaṅ ndù: Tshùaben bèn ngù! Nkab mi a ntùm ndà Tshùaben nà nsi b'a mba ntu' là mbwe tômbwôg nele'te Nsi yi.

²¹ Mba zit kàb lo z'a Yérusalém mba mà Yuda là nsi b'a ze Tshùaben tàndà ntsho. Njoṅ benntùn fa tse bo nsi se' fà nda' là, nsi lo' kab là na mbàb yi. Ghatantàn ke nsi bèn be mum ndà Tshùaben tàndà ntsho mum sen lé'njù là.