Sakaria 11 - NTSHOB NSI

Bo ma' nta ntshùa ba nduku

¹ O! Liban, tsho' nzendà tsho nte nge, mbwôg kù sédra tsho.

² A bwô o ke ntswe me tshalon, nummbe sédra vù nsi, bo biagte màmà ntù fa! A bwô bin tswe me nga'lon Basan! Nummbe bo tem fèn se mèn ke mbe ke tsho bwe là.

³ Ghabéb mbwe tshwèt ntshu'te kua' kebwô, nummbe bo sate ju z'a ke ngù bo nka'te là; bon ngwayit tshwèt nkua'a, nummbe bo sate ju z'a ke ngù Yordan nkuni là.

Ngabéb mbwe ze mebwô bo nkagni ngabéb mbwe

⁴ Tshùaben Nsi àm tshob ndù: Ghù mbwe tse bo nèn bo wambàb là fèt nenà;

⁵ tshen mbwe tse ghajun yub be nzwite yub mèn ke tshob sàm nu là; ghaswèn yub be nke ntshob ndù: Ghamte be Tshùaben, nummb'a ghù me be ngankàb! Tshen mbwe là ghabéb yub ke' be tshètte yube.

⁶ Nummbe me ke' bèn ngù kondèn num ben bo be ntùm ngô là, Tshùaben bèn ntshobe. Tshù, me ghù benntùn kam nke nzwe bo bo, me fà yub mum mbu mfen yub. Bo nsi sate ngô. Me ke nsi tshu' yub mum mbu mube.

⁷ Ndùlala me to' nebéb mbwe tse bo watte yub wambàb là, mbwe tse bo ke njen nge' neshu netèt bwoṅ mbwe là. Me lo' nkôg mbàa: Ntsiaṅ mo' ndù kondèn, ntsiaṅ semo' ndù Ntse'te. Me ghù mbwe nke mfèt nenà.

⁸ Me lo biagte ghabéb mbwe tat num ta' maṅwù; ntù àm lo ke fènte num bo, yub tu wut nke ngwag àm yub.

⁹ Me tshob ndù: Me ke nsi bèn ghù bin fèt nenà! Mbwe z'a nsi kwù là mb'a kwù, z'a nsi bi là mb'a bi, tse bo tù' là nsi ke sobte wut tshob bo bo.

¹⁰ Me lo' kôg kondèn sàm mbe'e, num nefagte kàn se me na' ngwat bag à njoṅ ntumntum fa là.

¹¹ Me lo be' kôg sen lé'njù là, ghatantàn mbwe tse bo ke ndôt'àm nà lèn ndù men ntshob là b'a mi Tshùaben.

¹² Me tshob bo ndù: A be ze bin yen ndù a bwô là, bin fà yàm nkàbfa' me.

¹³ Tshùaben tshob me ndù: Ma' yen nkàb là nga tetsha'a, nummb'a b'a njoṅ i ze bo yen ndù a ku'ni num àm nà. Me lo' nkàb ṅam ntat nèn ma' yen nkàb là nga tetsha'a ntùm ndà Tshùaben.

¹⁴ Me be' yàm mbatte kôg mbàa, ntse'te, num nefagte nu fèt yi netèt Yuda bo Israél.

¹⁵ Tshùaben tshob me ndù: Bèn ntswitte bon tshu nkagni ngabéb mbwe!

¹⁶ Nummbe me nsi ghù ta' ngabéb mbwe tume, z'a ke nsi nywin num njùmbwe tse bo bite là; a ke nsi nèn diag bon njùmbwe tse bo bite, ke tshwinte tse nku mub be'te là, a ke nsi nabte tse bo be ntùn nà; l'a nsi fèt mbàb tshen nà tse bo tshote là kà tsho'te nkib nku mube.

¹⁷ Nge' tu ngabéb mbwe z'a ke' lèn ju là, a be ngua' njùmbwe tse. A bwô ndù ṅwi tsho mum mbu mi mba mum lag se se zwim. A bwô ndù bu i jume, lag se se zwim bi.