Sakaria 10 - NTSHOB NSI

Bin lon à Tshùaben, kà bin lon à ba neto

¹ Bin lon mbaṅ Tshùaben, bin lon mbwe mbaṅ yi, Tshùaben nsi ghù mbeba'mbaṅ ké'é, a nsi tum mbaṅ z'a yàm nà bin. A nsi ghù nenà bit mba ntùm ze nà we lo.

² Nummbe ba térafim ghù ntshob mi ntun mi ke bwe là. Ghatàm ngàm ke ntshob à tatte. Njem be ntatte. Tshù ju z'a ghù bo nke ntsha mba bwoṅ njùmbwe là. Bo b'a ghayennge' nummbe ngabéb yub ke bwe.

³ Yantù àm kam num ghabéb mbwe me nsi so ntsha tu mfot mbwe. Nummbe Tshùaben tàndà ntsho se' lôte bwoṅ njùmbwe tse, tunndà Yuda, a nsi lo' i ghù ze nyàmdiaṅ nkuni yi tshwèt ntsho.

⁴ Tôgndà nsi tum à yi, nkutba' tum à yi, ngoṅkét ntsho tum à yi, njoṅ ghasa' fa nsi tum à yi,

⁵ boa bo tamte ntù' ghayob ngu' tse bo be nyiaṅte netob num manze ntsho là; bo nsi ma' ntsho, nummbe boa Tshùaben bèn mbe. Tuswe nsi ko ghako' nyàmdiaṅe.

⁶ Me nsi tomte tunndà Yuda, a ta. Me nsi tshu' tunndà Yosèf, lo' yub bèn yi njam, nummbe me ko ndèn mube. Bo nsi tswe à mba me lo ke ghua' yub là; nummbe me b'a Tshùaben Nsi yub.

⁷ Efraim nsi be mba ngayob ngu'u là; ntù tshob nsi ghù tsiaṅte ze ndu' fà là. Bon tshob nsi yen i be ntùm ṅwate. Ntù tshob nsi tsiaṅte num Tshùaben.

⁸ Me nsi tô yub fin, tse'te yube. nummbe me tshu' yube. Bo nsi yàm mba bo ke nto' njàm nà.

⁹ Me nsi sate yub netèt ntumntum, bo tswe ngùanesà nkwimt'àm; bo nsi yôg boa bon tshobe, bèn bèn njam.

¹⁰ Me nsi sô yub mum ngô Egipto, me nsi sô yub mum ngô Asiria fe yi, ghù bo se' mum ngô Galad bo ngô Liban. Dù' ke nsi ku' num bo bwe.

¹¹ Bo nsi dut dibantse nge', ke lab fetntse mum dibantse, njoṅ ndamntse fa mi a ntùm Nil là nsi jume; bo nsi biagte ko'tewut ngô Asiria. Kôgfen ngô Egipto nsi bi.

¹² Me nsi tomte yub bo ta. Bo nsi ke zin à njam lén sàm; Tshùaben bèn ntshobe.