Sakaria 1 - NTSHOB NSI

Ba njem Sakaria Tshùaben tshob me ndù: Bin bèn njam nse' me

¹ Mum ṅwù fome, num mbatte ngu'njù bàa mba Darius be tù là, Tshùaben tshob Sakaria nshum Bérékia, nshum Iddo, ngatshob ntshob Nsi ndù:

² Tshùaben lo ya ntù num tà tsin neshu.

³ A bwô o tshob bo ndù: Tshùaben tàndà ntsho bètte ndù bin bèn njam nse' tèl i; Tshùaben tàndà ntsho tshob ndù a nsi bèn njam se' tèt zine.

⁴ Kà bin be mba tà tsin tse ba ghatshob ntshob Nsi mbwe ke nkua' ntshob bo ndù: Tshùaben tàndà ntsho tshob ndù bin lo num manze tsin tse kebwô, ndo num mfa' min mi kebwô! Là bo lo ke ju', ke kù' ntoṅ num bwe là, ke ju' nz'àm nà, Tshùaben tshob ndùlala.

⁵ Tà tsin b'a yà? Ba ghatshob ntshob Nsi lo ghù neyôg matmat ké?

⁶ Mba ndùlala, ntshob màm mba nkàn màm mi me na' mfà ghafa' tshàm, ba ghatshob ntshob Nsi là, lo ke tam toṅ tà tsin ké? Bo lo lo num manze tshobe, ntshob ndù: Tshùaben tàndà ntsho lo ghù num bag mb'a tàmte là, num manze tshag mba ngùninu mage.

Mbwe njem: Ba nyàmdiaṅe

⁷ Mum lé'njù ntshob kuà ṅam mbàa mum ṅwù ntshob ntshù' gham, z'a be ṅwù Shebat là, Tshùaben tshob Sakaria, nshum Bérékia, nshum Iddo ngatshob ntshob Nsi num mbatte ngu'njù bàa mba Darius be tù là ndù:

⁸ Me Sakaria, me lo ke ndôte tèttswe', njen ntùm njem ndù mo' mèn ko' num nyàmdiaṅ meba, ntsin netèt fenkaṅ, ntùm dù' nesènte; nyàmdiaṅ tse meba, tse nebwoṅe bo tse fôgtab lo be njam i.

⁹ Me tshob ndù: Tshùaben àm: Tshen ghako' nyàmdiaṅ ni b'a ndùke? Angél ze bag yi ke ntshobte là bùnte me ndù: M'a' ghù o yen mba tshen ghako' nyàmdiaṅ ni be là.

¹⁰ Mèn z'a tsin netèt fenkaṅ nà bùnte ntshob ndù: Tshùaben lo tum yub bo zinte num nsitsha'a.

¹¹ Ghako' nyàmdiaṅ tshob Angél Tshùaben z'a tsin netèt fenkaṅ nà ndù: Bag zinte num nsitsha'a, fite num num njoṅ dù' fa, la' b'a tshaṅ.

¹² Ndùlala Angél Tshùaben tshob ndù: Tshùaben tàndà ntsho, o nsi be ke ko ndèn Yérusalém bo ngôngô Yuda ts'o ya ntù num bo fe ngu'njù ṅam sammbàa là tà kum à ndùke?

¹³ Tshùaben lo' ntshob ntùn, ntshob fite ntù, mbùnte nu yi Angél ze bag yi ke ntshobte là

¹⁴ Angél ze bag yi ke tshobte là tshob me ndù: Kua' ntshob ndù: Tshù mba Tshùaben tàndà ntsho tshob li: Me dun nkôni, nkôni ndùb num Yérusalém bo Sion;

¹⁵ ndun yantù ndùb, nja ntù mum ngô tse bo tshwèt nka'te là; nummbe me lo ya ntù nda' metsili, là bo ghù nukebwô ndutte.

¹⁶ A ndùlala Tshùaben tshob ndù: M'a' bèn ndôte Yérusalém nko ndèn mi; bo nsi bèn kut ndà àm bwe, bo nsi bèn taṅ nkù num Yérusalém lo' fi' i yi, Tshùaben tàndà ntsho bèn ntshobe.

¹⁷ Bèn nkua' ntshob ndù: Tshù mba Tshùaben tàndà ntsho tshob li: Tshàm ngô nsi bèn ghame, ghù fu' yàme; Tshùaben nsi bèn fite ntù Sion, a nsi bèn tsho' Yérusalém.