Roma 9 - NTSHOB NSI

Nge' Paulo num nu Israél

¹ Me tshob à nenùn mbwe Kristô, me ke' netatte, nze ntù àm num nkwé nta màm ntùm Ywèt Nelàne,

² me ghù nenywin ndùb num àm, mbèn ngù nge' ke mi ntùm ntù àm.

³ Manze lo mbe, mba me kô nebe ngandon, mfagte num Kristô num nu fèt tshàm tse nzwit yag num ze mat mbàb wut.

⁴ Tshen ben nà b'a Israél tse nekwiagte, nkuni, kàn, nu ntshù', nu neghamte Nsi mba nka'ni b'a yub là;

⁵ ba tà b'a tshobe; num ze mat mbàb wut, Kristô fe à bo, yi z'a tshùa njoṅ i fa là, Nsi ngambotni yoṅ ntshù'. Amén.

Ze netsho' Nsi b'a netsine

⁶ Yen nà ke b'a ndù ntshob Nsi vù nsi; nummbe njoṅ benntùn fa tse bo tum num Israél là ke bèn mbe ba Israél;

⁷ be ndaṅndaṅ ben tse bo be nzwit Abraham nà, njoṅ yub fa ke bèn mbe bon tse, là lén nzwil o nsi tum à num Isak,

⁸ yen nà b'a ndù: A ke b'a bon mbàb wut bèn mbe bon Nsi, là bo lo' à ndà' bon nka'ni mba nzwit Abraham nà.

⁹ Nummbe ntshob nka'ni b'a men ni, me nsi bèn se' num yen ngelaṅ ni, Sara nsi ghù mén mandum.

¹⁰ Mba ndùlala, a ke yoṅ nku'u, mba Rébéka lo bwe bon bandum bàa bo Isak.

¹¹ Nummbe nda' Nsi bèn ndèn mb'a ke ntsho' tse ben nà. Ze netsho' mèn ke nko' à ntù i ke b'a mbe ng'é ku'ni i.

¹² Neghù bo lèn ndù nka'ni mi num mbumte, Nsi tshob Rébéka ngelaṅ bon tse na' mbe ke yoṅ mbe, ke yoṅ ndèn mba nukebwô bo numebwô là ndù: Ntshùambwe nsi fa' ntù'njam.

¹³ Ndaṅndaṅ mba bo kite ndù: Me lo kô Yakob, mbàn Esau là.

¹⁴ Bag à bin nsi tshob à ndùke? Nsi b'a mèn ketsin ké? Nga, a ke b'a ndùlala.

¹⁵ Nummbe a tshob Mosé ndù: Me nsi nko ndèn mba we lo ze me ko ndèn mi là; me nsi nyin mba we lo ze me nyin i là;

¹⁶ ndùlala, yen nu là ke fe à mèn z'a kô là, ke fe à mèn z'a kù nde là, là, a fe à Nsi z'a ko ndèn nà.

¹⁷ Nummbe ṅwa'ni Nsi tshob Faraon ndù: A ndùlala, me lo ghù o tum, ndù me la'te neta àm num o, ndùlala ndù lén sàm be neju'ni num njoṅ nsitsha' fa,

¹⁸ ndùlala, a num nko ndèn mèn z'a kô là, mbèn mfà sagntù mèn z'a kô là.

¹⁹ O nsi tshob me ndù: K'a bèn nke nja ntù numke? We z'a ku' neta tu mbwe ze nekô à?

²⁰ Là, wù mènntùn, o b'a we nebùnte nu bin Nsi à? Fa' ku' netshob mèn z'a fa' i là ndù: Numk'o mfa' àm ndù à, ké?

²¹ Ntetsha' ke' ghù ngù' num tsha' ké? A ke' ku' nelo' mo' bag tsha' z'a gho' là, nte kab nku'ni yi, ndo' mo' bag i, nte kab tuswe yi ké?

²² Ndùlal'o, a be ze Nsi z'a kô nela'te yantù i mba neta i là, na' mfènte nkab yantù mi a na' nabte num nebi là;

²³ a be z'a kô netswite nkuni mi mi ndùb num nkab kondèn mi a na' nabte num nkuni tà fe mbwe,

²⁴ ntsiaṅ yub là, me tshob à ben ts'a na' ntsiaṅe; ke b'a nda' netèt ba Yuda, là mba netèt ghakelèn Nsi là.

²⁵ A b'a kua' nu z'a tshob ntùm ṅwa'ni Osé là: Me nsi tsiaṅ nzwit z'a ke' b'a yàm nà ndù nzwil àm, mènnzwi ze me ke' kô i là, tù' mènnzwi ze me kô i là.

²⁶ A nsi be mo' lé'njù dù' ze bo na' ntshob bo ndù: Bin ke' b'a nzwil àm nà, bo tsiaṅ yub bon Nsi z'a be ntùn nà.

²⁷ Là, Esaya kua' num Israél ndù: Bon Israél lo njàm be mba nkwa dibantse là, mba tshé' i nsi bèn yôge.

²⁸ Nummbe Nsi nsi ghù ntshob mi bumte ndaṅndaṅ, be kua' ndende num nsitsha'a.

²⁹ Ndaṅndaṅ mba Esaya bwôgmbwe ntshob ndù: Tshùaben Tàndà ntsho na' mbe ke faṅ njwit be, mba be lo tù' à mba Sodom nà, mba be lo fut'a Gomora.

Ze nevù Israél fe à be yi

³⁰ Bag à bin nsi tshob à ndùke? Tshù, ghakelèn Nsi tse bo ke' be diag nunetsin nà, tshùb nunetsine, me tshob à nunetsin z'a fe bamntù là.

³¹ Là, Israél z'a na' nke ndiag ntshù' netsin nà, lo ke zin tà nkum num yen ntshù' là,

³² nummbe bo lo ke ndiag nesô i à ntùm mfa', ke b'a ntùm bamntù. Bo lo fa'te num loṅ fa'te,

³³ ndaṅndaṅ mba bo kite ndù: Tshù, me yab loṅ fa'te mba loṅ ywi' mà Sion, mèn z'a bam i là, tuswe ke nsi ko i.