Roma 8 - NTSHOB NSI

¹ Ndùlala, ndonni sàm nevù ntsha ke' bèn mbe num ben tse bo be num Kristô Yésu là.

² Nummbe ntshù' Ywèt mi a fà yôg num Kristô Yésu là, lo ghù o tum kuan bu nukebwô mba bu vù.

³ Ntshù' lo ke ku'ni neghù yen nà, nummbe mfa' mbàb wut lo ghù a bot, là Nsi z'a tum ko' Mén i num nukebwô ntùm mbàb wut z'a fute ze nukebwô là, lo keb ntsha nukebwô ntùm mbàb wut,

⁴ ndùlala ndù a ghù nunetsin ze ntshù' num mbètte là bumte num be tse be ke' bèn nke nzin à num ze mat mbàb wut là, num ze mat Ywèt là.

⁵ Ben tse bo ke njôg à num ze mat mbàb wut là, kô à nu mbàb wut, là, ben tse bo ke njôg à num ze mat Ywèt là, kô à nu Ywèle.

⁶ Ze nekô mbàb wut b'a vù, là, ze nekô Ywèt b'a yôg mba fite,

⁷ nummbe ze nekô mbàb wut b'a ngakeban Nsi, a ke' be fà wut nsi mbwe ntshù' Nsi, nummbe a ke' ku'ni.

⁸ Ben tse bo be ntùm mbàb wut là ke' ku'ni nebwô Nsi.

⁹ Là bin, bin ke' b'a ntùm mbàb wut, là bin b'a ntùm Ywèle, a be ze Ywèt Nsi be ntswe num bin kua' nenùn nà. A be ze mèn ke' ghù Ywèt Kristô là, mba yen mèn nà ke' b'a ze mèn.

¹⁰ A be ze Kristô be num bin nà, mba nunetsin ghù Ywèt ke' à ntùn, mba mba nukebwô à ghù wut tù' fe i là.

¹¹ A be ze Ywèt mèn z'a bam Yésu num vù be ntswe num bin nà, mba mèn z'a bam Kristô Yésu num vù là, nsi ghù mba wut tsin ts'a kwù là yôge, ntshùa njam Ywèt tse, ts'a be ntswe num bin nà.

¹² Fèt tshàm, ndùlala, bag à bin b'a ghanjo, là ke b'a tse mbàb wut num neyôg num ze mat mbàb wut.

¹³ Nummbe, a be bin ke njôg à num ze mat mbàb wut là, mba bin nsi kwù; là, a be ze bin lo' Ywèt nzwi ngùninu wut yi là, mba bin nsi yôge.

¹⁴ Nummbe njoṅ ben fa tse Ywèt Nsi num ntshagte yub là, tshen ben nà b'a bon Nsi.

¹⁵ Bin lo ke kwé à Ywèt kuan num nebèn nke mbwôge, là bin lo kwé à Ywèt bon nekwiagte, tse bag à bin be nkua' ntùm bwe ndù: Abba! Tà!

¹⁶ Tshen Ywèt là be nkwé nta bo ywèt be ndù bag à bin b'a bon Nsi.

¹⁷ A be ze bag à bin b'a bon nà, mba mba bag à bin b'a jùndà, jùndà Nsi, jùndà bag à bin Kristô: A be ze bag à bin bo be ntamte njen nge' kua' nenùne, ndùlala ndù bag à bin bo se' ntsho ntùm nkuni là.

Nkuni bon Nsi

¹⁸ Nummbe me kwate ndù nge' z'a be num yen ngelaṅ ni là ke' ku' mo' ju num nkuni mi a nsi tswite wul i num be là.

¹⁹ Nummbe njù, ntùm nenywinte, num mbéb netswite wut bon Nsi.

²⁰ Bo lo ma' njù ntùm nebite, ke b'a num ze nekô, là num ze nekô mèn z'a ma' i ntùm bwe là; nenywinte num bwe,

²¹ nummbe bo nsi ghù njù tum kuan bu vù, ntsho ntùm nkuni bon Nsi.

²² Nummbe bag à bin lèn ndù njoṅ njù fa tshwèt nkua'a, njen nge' ntùm ya nebwe tà nse' nkum ndonni,

²³ ke b'a nda' yi, là mba be tse be ghù mbwe ntàm Ywèt là, num nkua' ntùm ntù be, ngelaṅ be tshwèt mbéb nekwiagte mba netshu' wut be là.

²⁴ Nummbe Nsi lo yôg be ntùm nenywinte. Là, nenywinte ze bo yen nà ke bèn mb'a nenywinte; nummbe ju ze mèn yen nà, be à bèn nywint'a ndùke?

²⁵ Là, a be ze bag à bin tshwèt nywinte ju ze be ke' yen nà, mba bag à bin nsi ke mbéb à ntùm nefènte.

²⁶ Be ndaṅndaṅ mba Ywèt num njwimte ze ben nebole. Ju z'a bwô ndù be bètte, nde'te Nsi mb'a bwô là, be ke' lèn, là tu wut Ywèt num mbu' mbu num ze be tu ntùm z'a ke' be tum tù là.

²⁷ Mèn z'a num njen tun ntù mèn nà, lèn ze nekô Ywèle, nummbe a num mbu' mbu num tu ben nelàn mba Nsi kô là.

²⁸ Là, bag bin lèn ndù, ntùm njoṅ tshu fa, Nsi num mfa' num nukebwô boa ben tse bo num nkô i là, ben ts'a tsiaṅ yub ndaṅndaṅ mb'a na' njà be ntùm nkwatenu mi là.

²⁹ Nummbe ben ts'a lèn yub tà fe mbwe là, a lo bèn nabte yub tà fe mbwe, ndù bo be mfuni Mén i, ndùlala ndù a be tuswe Tà netèt fètfèt yàme.

³⁰ Ben ts'a nabte yub tà fe mbwe là, a lo bèn ntsiaṅ yube; ben ts'a tsiaṅ yub là, a lo bèn ngù bo tù' ben netsine; ben ts'a ghù bo tù' ben netsin nà, a lo bèn nkuni yube.

Mènkristô lèn kua' mebwô ndù a yôge

³¹ Bag à bin nsi tshob à ndùke num tshen nu l'à? A be ze bag à bin Nsi bèn mbe là, mba we z'a ku' nelaṅte be à?

³² Yi z'a na' mbe ke faṅ ko' Mén i, là mfà i num njoṅ be fa là, a nsi be ke fà njoṅ tshu fa be, bag à bin bo à ndùke?

³³ We z'a nsi bote ben Nsi ts'a tsho' yub l'à? Nsi bèn ngù mèn netsine.

³⁴ We z'a nsi ghù bo vù ntsha à? A b'a Kristô Yésu ké? A lo kwù, mbèn ndo num vù, a b'a num bag bu Nsi ze zwim, nke mbu' mbu num tu be.

³⁵ We z'a nsi fagte be num nkôni Kristô à? Nge' ké? Zwentù ké? Netsho' nku kebàn ké? Nziku' ké? Tunntôg ké? Nebi ké? Ṅwi ké?

³⁶ Ndaṅndaṅ mba bo kite ndù: Bo num nzwi yag njoṅ lé'njù fa num o, bo lo' yag mba njùmbwe tse bo zwi yub là.

³⁷ Là num njoṅ tshen nà fa, bag à bin b'a kua' ghatshùa ntsho njam mèn z'a kô be là.

³⁸ Nummbe me lèn kua' mebwô ndù, ke vù lo, ke yôg lo, ke ba Angél lo, ke netô lo, ke tshu ts'a be ndonni lo, ke ts'a nsi se' lo, ke neta lo,

³⁹ ke mfe tù lo, ke mànjam nsi lo, ke zit ju ze Nsi nabte là lo, ke' ku'ni nefagte be num nkôni Nsi z'a be num Kristô Yésu Tshùaben be là.