Roma 5 - NTSHOB NSI

Ntàm nunetsin njam bamntù

¹ Ndùlala, mba be na' ntù' ben netsin à njam bamntù là, be ghù fite bag à bin Nsi ntshùa njam Tshùaben be Yésu Kristô.

² Njam bamntù be, a lo ghù be tsho ntùm yen kondèn nà ze be be ntsin bwe là; bag à bin num nta' nsoṅ ntùm nenywinte nkuni Nsi.

³ Ke b'a nda' ndùlala, là bag à bin num nta' nsoṅ mba ntùm neyen nge', ndèn ndù nge' num njam nefènte,

⁴ nefènte yam tshùb ntù ntùm laṅte, netshùb ntù ntùm laṅte yam nenywinte.

⁵ Nenywinte ke' be fà tuswe, nummbe Nsi naṅ nkôni i ntùm ntù be njam Ywèt Nelàn z'a fà be là.

⁶ Nummbe, ngelaṅ ze be na' nke' ben nebot là, Kristô lo kwù num ngelaṅ i num ghawag Nsi.

⁷ Neyen mèn z'a be a kwù num mèn netsin nà ta, mo' ndù be mèn fènte nekwù num numebwô,

⁸ là Nsi num nda'te kua' nkôni i be: Ngelaṅ ze be na' nke' à ben kebwô là, Kristô lo kwù num be.

⁹ Ndùlala, ndonni mba be na' ntù' ben netsin njam lem tse là, be lèn kua' mebwô ndù be nsi tshùa njam i yôg num yantù Nsi.

¹⁰ A be ze bag à bin Nsi na' ntamte ntshùa njam vù Mén i, be tse be na' mb'a ghakeban tse là, ndonni ze bag à bin bo tamte là, be lèn kua' mebwô ndù be nsi yôg njam yôg se.

¹¹ Ke b'a nda' ndùlala, bag à bin num nta' nsoṅ num Nsi ntshùa njam Tshùaben be Yésu Kristô z'a fà netamte be fe ndonni là.

Adam mba Yésu Kristô

¹² A ndùlala, be ndaṅndaṅ nukebwô lo tshùa njam ta' mèn ntsho ntùm njù, vù tshùa njam nukebwô, là vù lo se' nsa num njoṅ benntùn fa, nummbe njoṅ yub fa lo ghù nukebwô.

¹³ Nummbe nukebwô lo be ntùm njù kà ntshù' nse'e, là bo ke siaṅte nukebwô nummbe ntshù' ke' be.

¹⁴ Là, vù lo tô njù fe num Adam tà nèn nkum num Mosé, a lo tô mba ben tse bo ke' ghù nukebwô z'a fute mfànnu Adam z'a b'a netshaṅ mèn z'a nsi se' là.

¹⁵ Là ju ze kondèn be ngù là ke' b'a mba ze mfànnu be ngù là; nummbe a be ze mfànnu ta' mèn ghù benntùn yàm kwù là, be lèn kua' mebwô ndù kondèn Nsi mba nda' ntùm kondèn ta' mèn, Yésu Kristô, lo dun ntshùate, mfètte num benntùn yàme.

¹⁶ Be ndaṅndaṅ, ju ze numebwô Nsi be ngù là ke b'a mba ze nukebwô ta' mèn be ngù là; nummbe netsho'te ntsha z'a se' njam ta' nukebwô là, lo se' nevù ntsha; là kondèn Nsi z'a se' njam nukebwô yàm nà, lo se' nejù ntsha.

¹⁷ A be ze mfànnu ta' mèn ghù vù tô njù ntshùa njam yen ta' mèn nà là, be lèn kua' mebwô ndù ben tse bo kwé kondèn Nsi mba nunetsin ts'a dun mfètte là, nsi tô njù ntùm yôg ntshùa njam ta' mèn, Yésu Kristô.

¹⁸ Ndùlala, mba mfànnu ta' mèn ghù nevù ntsha se' num njoṅ benntùn fa là, be ndaṅndaṅ nunetsin ta' mèn ghù nunetsin z'a be mfà yôg là se' num njoṅ benntùn fa.

¹⁹ Mba ta' mèn z'a ke' ju' ntshu ghù benntùn yàm tù' ghaghù nukebwô là, be ndaṅndaṅ ta' mèn z'a ju' ntshu là ghù benntùn yàm tù' ben netsine.

²⁰ Là ntshù' lo tsho bwe, ndùlala ndù mfànnu yàme; là dù' ze nukebwô yàm bwe là, kondèn dun ntshùate,

²¹ ndùlala ndù mba nukebwô na' ntô njù ntùm vù là, be ndaṅndaṅ mba kondèn nsi tô njù njam nunetsin num yôg matmat, ntshùa njam Yésu Kristô, Tshùaben be.