Roma 4 - NTSHOB NSI

Abraham tà ghabamntù

¹ Ndùlala bag nsi tshob à ndùke num Abraham mbwe tà be num mat mbàb wul à?

² A be ze Abraham na' mbe mèn netsin à num mfa' mi là, mb'a ku'ni neta' nsoṅe, là ke b'a mbwe Nsi.

³ Ṅwa'ni Nsi num ntshob ndùke? Abraham lo bam Nsi, Nsi siaṅte yen nà mba nunetsin nà.

⁴ Là mèn z'a fa' fa' là, mba bo ke siaṅte nkàbfa' à mba ju kondèn nà, là mba ju z'a ku'ni nekwé là.

⁵ Mèn z'a ke' fa' fa', là mbam mèn z'a be ngù nga wag Nsi tù' mèn netsin nà,

⁶ be ndaṅndaṅ, a mba David num ntshob fen mèn ze Nsi siaṅte nunetsin mfà yi ke b'a num mfa' là, ntshob ndù:

⁷ Ghafen b'a ben tse Nsi lagte mfànnu mube, mbèn nkabte nukebwô tshob là!

⁸ Mènfen b'a mèn ze Tshùaben ke' siaṅte nukebwô i là.

⁹ Sen fen nà b'a num mèn z'a si ket là ké, k'a b'a mba num z'a ke' si kel à? Nummbe bag num ntshob ndù: Nsi lo siaṅte bamntù Abraham mba nunetsin nà.

¹⁰ Nsi na' nsiaṅte yen n'a ndùke? Ngelaṅ z'a si ket ke ngelaṅ z'a ke' ke si kel à? A ke b'a ngelaṅ z'a si ket là, là ngelaṅ z'a be ke yoṅ nsi ket là.

¹¹ A lo kwé lèn nu nesi ket mba sitam nunetsin ze bamntù i fà yi ngelaṅ z'a be ke yoṅ nsi ket là, ndùlala ndù a be tà njoṅ ghabam fa tse bo be netèt ben tse bo ke' si ket là, ndùlala ndù Nsi siaṅte nunetsin mfà bo,

¹² mba ndù Abraham be tà ben tse bo si ket là, ke b'a ben tse bo kwé à nda' nu nesi ket là, là ben tse bo be nzin njam bamntù ze tà be Abraham na' ngù ngelaṅ z'a be ke yoṅ nsi ket là.

¹³ Nummbe Nsi lo ka' Abraham ke nzwil i lo ndù njù nsi be ju ntsi' i, ke b'a num ntshù' là num nunetsin ze bamntù num mfà là.

¹⁴ A be ze ntshù' bèn ngù kà bo jù ntsi' là, mba bamntù b'a banban, mba nka'ni bi.

¹⁵ Nummbe ntshù' be njam yantù, là dù' ze ntshù' ke' be là, nefàn ntshù' ke be bwe.

¹⁶ A ndùlala bamntù bèn ngù kà bo njù ntsi'i, a b'a ju kondèn, ndùlala ndù nka'ni ghô num njoṅ nzwit fa, ke b'a z'a b'a nda' njam ntshù' là, là mba z'a b'a njam bamntù Abraham, z'a be tà njoṅ be fa,

¹⁷ ndaṅndaṅ mba bo kite ndù: Me yab o tà nzwit benntùn yàm nà. A b'a tà be mbwe Nsi, a bam Nsi z'a num mfà yôg fe ben, mbèn ntsiaṅ tshu ts'a ke' be là mba bo num bwe là.

¹⁸ Abraham bam, nywinte, mba mba nenywinte na' mbe ke bèn nebe là, ndù a nsi tù' tà nzwit benntùn yàme, ndaṅndaṅ mba bo na' ntshob yi ndù: A b'a ndaṅndaṅ mba nzwil o nsi be là.

¹⁹ A lôte wul i z'a tù' nekwù là nummbe a lo ghù nguan ngu'njù nkù, mbèn ndôte bam Sara s'a kwù là, là ke bot ntùm bamntù i,

²⁰ a lo ke magte nka'ni Nsi ntùm nebe ke bam, là, a lo be mèn neta ntùm bamntù, nke mfà ghamte Nsi.

²¹ A lo lèn kua' mebwô ndù ju ze Nsi ka' là, a ku'ni neghù a bumte.

²² A ndùlala Nsi lo siaṅte yen nà yi mba nunetsin nà.

²³ Là bo lo ke kit'a num i ndù: Nsi lo siaṅ yen nà,

²⁴ là mba num be, Nsi nsi siaṅte yen nà mba ben tse be bam mèn z'a na' mbam Tshùaben be num vù là,

²⁵ yi ze bo na' mfà i num mfànnu be, yi z'a na' mbam num vù neghù be tù' ben netsin nà.