Roma 3 - NTSHOB NSI

Ju ze ba Yuda tshùa tsemo' ben yi là

¹ Ke ze ze Yuda ghù ntshùat'à? Nesi ket ywimt'a ke?

² A yàm num njoṅ manze fa, mbwe i b'a ndù: Nsi lo lem ntshob mi à bo.

³ Yen nà b'a ke? A be ze tsemo' ben be ke bam nà, mba yub nebe kebam nsi biagte bamntù Nsi ké? A nsi ghù bwôntù Nsi bèn njam ké?

⁴ Nga, a ke b'a ndùlala. A bwô be lèn ndù Nsi b'a nenùne, njoṅ benntùn fa be ghatatte, mba bo kite là ndù: A bwô ndù nu o tsin ntùm ntshob mu, mba ndù k'o vù ntsha ngelaṅ bo nsi tsho't'o là.

⁵ Là, a be ze ze be nuketsin num nda'te nunetsin Nsi là, mba be nsi tshob à ndùke? Nsi b'a mèn ketsin ngelaṅ z'a se' ntùm yantù là ké? (Me tshob à mba mènntùn nyiaṅtu là).

⁶ Nga, a ke b'a ndùlala. A be z'a be ndùlala là, mba Nsi nsi tsho'te njù à ndùke?

⁷ A be yàm tatte bù'te nunenùn Nsi, nkuni mi tswite wul i ntùm bwe là, mba bo nsi bèn tsho't'àm mba mèn kebwô à ndùke?

⁸ Ndùlala numke be ke ghù nukebwô ndù numebwô tum bwe à? A b'a ju ze ghatshabte be be ntshob ndù be tshob là. Tshen ben nà ku'ni ghavù ntsha.

Njoṅ benntùn fa b'a ghaghù nukebwô

⁹ A bèn mba ndùke? Be tshùa yub ké? Ṅ, là nga, ke b'a num njoṅ i fa. Nummbe be lo à nabte ndù: Ba Yuda mba ba Grikia, njoṅ yub fa b'a kuan bu nukebwô,

¹⁰ ndaṅndaṅ mba bo kite ndù: Mèn netsin ke bwe, mba nda' ntshù'.

¹¹ Ngazenu ke bwe, ngadiag Nsi ke bwe.

¹² Njoṅ yub fa fàn manze, bo ke' bèn njwimte sàm ju, ngaghù numebwô ke bwe, mba ta' i ntshù',

¹³ Nzetô yub b'a fi s'a te nge là bo be ndo' lém sob mfùte benntùn yi,

¹⁴ ntshu yub dun ndon mba nezwe,

¹⁵ nku mub num mfùag num nefètte lem,

¹⁶ Nebagte mba nge' num num manze yub,

¹⁷ bo ke' lèn manze fite.

¹⁸ Nebwôg Nsi ke' be num miag mube.

¹⁹ Là be lèn ndù njoṅ tshu fa tse ntshù' num ntshob là, a ke ntshob à ben tse bo be ntùm ntshù' là, ndùlala ndù njoṅ ntshu fa meme, mba ndù njoṅ njù fa be ghavù ntsha mbwe Nsi.

²⁰ Nummbe sàm mèn ke nsi be mèn netsin mbwe i ntshùa njam mfa' ntshù', nummbe a num ntshùa njam ntshù' mèn lèn nukebwô tse.

Bamntù num Yésu Kristô num mfà yôg

²¹ Là ndonni nunetsin Nsi tswite wul i ke bèn mb'a num nu ntshù', ntshù' mba ghatshob ntshob Nsi lo kwé nta mi;

²² a b'a nunetsin Nsi ntshùa njam bamntù num Yésu Kristô, num njoṅ benntùn fa tse bo num mbam nà, nummbe netôte ke' bèn mbe.

²³ Nummbe njoṅ benntùn fa lo ghù nukebwô, ke ghù nkuni Nsi.

²⁴ Nsi lo ghù bo tù' ben netsin banban ntùm kondèn i, ntshùa njam netshu' z'a be num Yésu Kristô là.

²⁵ Nsi lo yab Kristô Yésu mba manze z'a tshùa bwe kà ko ndèn ben tse bo bam lem tse là, ndùlala ndù a tswite nunetsin i, nummbe a lo fènte nukebwô benntùn ghù fe mbwe,

²⁶ ngelaṅ ghub ntù Nsi là, mba ndù a be mèn netsine, ngù mèn z'a bam Yésu là tù' mèn netsine.

²⁷ Ndùlala nu nta'nsoṅ b'a yà? Bo sô i. Mit ntshù' a? Ntshù' mfa' ké? Nga, là ntshù' bamntù bèn nsô i!

²⁸ Nummbe bag kwate ndù mènntùn be mèn netsin à num bamntù, ke b'a num mfa' ntshù'.

²⁹ Nsi b'a nda' Nsi ba Yuda ké? A ke b'a mba Nsi ghakelèn Nsi ké? Ṅ, a b'a mba Nsi ghakelèn Nsi.

³⁰ Nsi b'a nda' ntshù', ndùlala a nsi ghù ben tse bo si ket là be ben netsin num bamntù, mbèn ngù ben tse bo ke' si ket là be ben netsin ntshùa njam bamntù.

³¹ Ndùlala bag num ndo' bamntù mbiagte ntshù' yi ké? Nga, a ke b'a ndùlala, là bag ke neghù ndù a tsin tù.