Roma 15 - NTSHOB NSI

Netamte ntùm nkôni

¹ Là, be tse be b'a ben neta là, a lo mbwô be ket lo' ben tse bo ke' ghù neta là, ke ke ndiag ndù a bwô nda' tu wut be.

² Mba we lo netèt be ke mbwô mèn z'a ghebte mbaṅ i là num ze numebwô, num neghù ndù a ta ntùm yôg ntu.

³ Nummbe mba Kristô lo ke diag à nda' nebwô à nda' tu wul i, là, mba bo kite ndù: Tshabte ghatshabt'o lo vù num àm.

⁴ Nummbe njoṅ i fa tse bo kite tà fe mbwe là, bo na' nkit'a num netswite be, ndùlala ndù be ghù nenywinte njam nefènte mba njam nefite ntù z'a fe ṅwa'ni Nsi là.

⁵ Nsi ngafà nefènte mba nefite ntù, fà nkwate ntshù' netèt bin mba Kristô Yésu num nkô là,

⁶ ndùlala ndù bin ghamte Nsi, Tà Tshùaben be Yésu Kristô, ntùm ntù ntshù' mba ntshu ntshù'.

⁷ Ndùlala, bin ke ndo' wut tsin bin bin, mba Kristô lo' zin num nkuni Nsi là.

⁸ Me tshob ndù Kristô lo tù' ngafa' ben tse bo si ket là, num nenùn Nsi, ndùlala ndù a ghù nka'ni mi ba tà kwé là bumte.

⁹ Mba ndù ghakelèn Nsi ghamte Nsi num kondèn i, ndaṅndaṅ mba bo kite ndù: A ndùlala, me nsi fà ghamte wù netèt ghakelèn Nsi, me nsi yob kwi nkuni lén so.

¹⁰ Ṅwa'ni Nsi bèn ntshob ndù: Ghakelèn Nsi, bin tsiaṅte bin à nzwil i!

¹¹ Mba ndù: Njoṅ zin fa ghakelèn Nsi nyàmte Tshùaben; njoṅ nzwit fa nyàmt'é!

¹² Mba Esaya tshob ndù: Mèn z'a nsi tô ghakelèn Nsi là, nsi tum à num nga Isaï; ghakelèn Nsi ke nywint'a num i.

¹³ Nsi nenywinte ghù bin dun tsiaṅte mba fite ntùm bamntù, ndùlala ndù bin dun ntshùate ntùm nenywinte, njam neta Ywèt Nelàne.

Fa' Paulo

¹⁴ Fèt tshàm mbe se' mba bin nà, me lène, mbèn ndèn kua' mebwô yàm tu ndù bin dun bwôntù, ndun nelèn nzenze, mbèn nku'ni netagte wut tsin bin bin.

¹⁵ Me lo kite bin ntùm netshùag ntùm tsemo' dù', num neghù ndù bin kwimte tshu tse Nsi fà bin nà; me na' nkite bin à num kondèn Nsi,

¹⁶ nke mfa' nkùn mebwô Nsi, ndù ghakelèn Nsi be jule'te Nsi z'a bwô i, ze Ywèt Nelàn lànt'é là.

¹⁷ Ndùlala, me ku'ni neta' nsoṅ num Yésu Kristô, num tshu ts'a be tse Nsi là.

¹⁸ Nummbe a bwô ndù me fèn ntù ntshob njoṅ tshu fa tse Kristô tshùa num àm ngù, ghakelèn Nsi ju' ntshu i, ke njam ntshobe, ke njam fa',

¹⁹ ke njam neta ba nsà, mba ba nu netshàme, ke njam neta Ywèt Nelàn no, a ndùlala, neto' Yérusalém mba ngô ts'a be mbaṅ i là, tà nèn nkum Iliria, me miagte netshob nkùn mebwô Kristô;

²⁰ ndo' mba yàm ghamte là netshob nkùn mebwô dù' ze bo ke' yoṅ ntshob lén Kristô bwe là, ndùlala ndù kà me kut num tseba' mènghua,

²¹ mba bo kite là ndù: Ben tse bo ke' to' tshob nu i bo là, nsi yen i; ben tse bo ke' to' ju' i là, nsi lèn i.

Nkatte Paulo

²² A ju z'a na' ntshètt'àm yoṅ yàm nese' la' bin nà.

²³ Là ndonni, mba me ke' bèn ngù mo' fa' s'a tshwèt ntshùb àm ntùm yen ngô li là, ntù àm tshwèt nkù fe ngu'njù yàm nese' la' bin.

²⁴ Ngelaṅ me nsi nèn Pànyà là, me tshùa la' bin, nummbe me tshwèt nywinte neyen zin ngelaṅ me tôg là, mbèn nywinte ndù bin nsi nèn tshag àm bwe, ngelaṅ me nsi ghubte bag à bin, ntù àm z'a ke nkù là, fite là.

²⁵ Là ndonni, me nèn à Yérusalém num nefa' ben nelàne.

²⁶ Nummbe Makédônia mba Akaya lo yen ndù a bwô neghù ma'te num bwoṅbwoṅ netèt ben nelàn bo be mà Yérusalém nà.

²⁷ Bo lo yen ndù a bwô. Bo b'a ghanjo ba Yérusalém. A be ze ghakelèn Nsi jù tshu Ywèt ts'a b'a tse ba Yérusalém nà, mb'a bwô ndù bo fa' bo ntùm tshu mbàb wut.

²⁸ Ndùlala, ngelaṅ me nsi miagte yen nà, kà fà men ntàm nà gha tse là, me tshùa la' bin kà nèn Pànyà.

²⁹ Là, me lèn ndù ngelaṅ me se' la' bin nà, me nsi be se' dun mbotni Kristô.

³⁰ Fèt tshàm, me tsiaṅ zin ntshùa num Tshùaben be Yésu Kristô mba num nkôni Ywèle, ndù bag à bin tamte ma' ntsho num tu àm ntùm nde'te Nsi mi bin num mfà Nsi num àm nà,

³¹ ndùlala ndù Nsi kwé àm bu ghakebam tse bo be mà Yudéa là, mba ndù fa' sàm, se me nsi fa' Yérusalém nà, bwô ben nelàne,

³² ndùlala ndù a be ze Nsi kô là, me se' la' bin ntùm tsiaṅte, bag à bin fite ntù be.

³³ Nsi fite be njoṅ zin fa. Amén.