Roma 11 - NTSHOB NSI

Nsi ke' ghua' njoṅ Israél fa

¹ Ndùlala, me tshob ndù: Nsi ghua' nzwil i ké? Nga, a ke b'a ndùlala. Nummbe mba tu wul àm b'a ze Israél, mèn ntùm nzwit Abraham, ntùm tunndà Benjamin.

² Nsi ke' ghua' i z'a na' ndèn i tà fe mbwe là. Bin ke' lèn nu ze ṅwa'ni Nsi num ntshob num Elia, mb'a ke mbu' mbu Nsi num nebote Israél là ké? A lo tshob ndù:

³ Tshùaben, bo zwite ghatshob ntshob Nsi tsho, nsate ntômbwôg nele't'o, me tù' à nda' tù' me, bo tshwèt ndiag nezwi àm.

⁴ Là Nsi lo bùnte, ntshob yi ndùke? Me lo lem tshé' benntùn ntsha' sammbàa num yàm tu, tse bo ke' kwim ntunkekwi' mub mbwe Baal là.

⁵ Be ndaṅndaṅ, mba num yen ngelaṅ ni, tshé' i num bwe ntshùa njam netsho' kondèn.

⁶ Là, a be z'a tshùa à njam kondèn nà, mb'a ke bèn mb'a num mfa'; ntag ndùlala, mba kondèn ke bèn mb'a kondèn.

⁷ A b'a ndùke? Ju ze Israél num ndiag là, a ke' kwé, là ben tse Nsi tsho' yub là kwé. Là Nsi lo ma' sag ntù tsemo'o,

⁸ ndaṅndaṅ mba bo kite ndù: Nsi lo fà Ywèt bwôg bo, mfà miag ke yen bo, mba ntoṅ ke ju' bo, tà nse' nkum sènni.

⁹ David tshob ndù: A bwô téblé sob tù' nkù ywi', ju nefa'te, mba ntsho'fa' bo.

¹⁰ A bwô miag mub sènte ndù kà bo bèn neyene, mbèn ngù mvèn yub tswe neṅam njoṅ ngelaṅ fa.

Nefa'te Israél fà yôg ghakelèn Nsi

¹¹ Ndùlala me bètte ndù: Bo fa't'a num nevù nsi ké? Nga, a ke b'a ndùlala. Là yub nefa'te fà yôg ghakelèn Nsi, ndùlala ndù bo ma' yub ntùm ghe'te.

¹² Là, a be ze yub nefa'te tù' fu' njù, yub negha tù' fu' ghakelèn Nsi là, bag bin lèn kua' mebwô ndù yub nebam nsi ghù ntshùate.

¹³ Là, me tshob à bin, ghakelèn Nsi: Mba tu wul àm b'a ngantum ghakelèn Nsi là, me num ngamte fa' sàm,

¹⁴ nke ndiag manze nema' nzwit yag ntùm ghe'te, njôg tsemo' netèt bo.

¹⁵ Nummbe, a be ze neghua' yub tamte njù bo Nsi là, mba nebèn ndo' yub nsi b'a ndùke? A nsi b'a nelo num vù.

¹⁶ A be ze mbwe bàn làn nà, mba mba njoṅ bàn fa làn; a be ze ngatù làn nà, mba mba nkaṅ mi làn.

¹⁷ Là, a be ze bo na' nkeb memo' nkaṅtù, a be ze bo lo' o, wù tù mà tshwèt, njab num dù' yube, o tamte bin ngatù mba nzit ten nà,

¹⁸ o bamnà neta' nsoṅ mbwe men nkaṅtù là; a be z'o ta' nsoṅ nà, o lèn ndù o ke bèn nke nket ngatù, là ngatù bèn nke nkel o.

¹⁹ O nsi tshob ndù: Bo lo keb nkaṅtù à ndù bo yab àm num dù' yube.

²⁰ A b'a nenùne! Bo na' nkeb yub à nummbe bo ke' ghù bamntù; là tu wul o, o tsin tù à num bamntù o. Kà tù' ngako'tewut, là bwôge!

²¹ Nummbe, a be ze Nsi na' mbe ke faṅ nkaṅtù là, mb'a ku'ni nebe ke faṅ mba wù yu.

²² Lôte bwôntù mba yantù Nsi njene; yantù num ben tse bo vù nsi là, bwôntù num o, a be z'o kagtùn ntùm bwôntù là, ntag ndùlala, mba bo nsi keb mba wù yu.

²³ Mbe se' mba bo là, a be ze bo ke' ghô ntùm nebe ke ghù bamntù là, mba bo nsi bèn yab yub num dù' yube. Nummbe Nsi ku'ni nebèn njab yub bwe;

²⁴ a be ze bo na' nkeb o num tù mà tshwèt s'a na' mb'a so ko' tù njab o num ten mebwô s'a ke' b'a so ko' tù là, bag à bin lèn kua' mebwô ndù Nsi ku'ni neyab ko' nkaṅtù num ten s'a b'a sob là.

Kaṅ ntù Israél

²⁵ Fèt tshàm, nummbe me ke' kô nelem zin sen tsham ni, (mbwôg ndù kà bin lo' wut tsin mba ghazenu là:) Nsi ma' mo' bag Israél ntùm sagntù tà nkum ngelaṅ njoṅ ghakelèn Nsi fa nsi tsho là.

²⁶ Ndùlala njoṅ Israél fa nsi yôge, ndaṅndaṅ mba bo kite ndù: Ngakwé i nsi fe à mà Sion, a nsi sô newag Nsi mà netèt Yakob,

²⁷ sen ni b'a kàn se me nsi wat bag à bo ngelaṅ me nsi bù' nukebwô tshob là.

²⁸ Mbe se' mba nkùn mebwô là, bo b'a ghakeban num bin; là mbe se' mba netsho' Nsi là, Nsi kô yub num tà tshobe.

²⁹ Nummbe Nsi ke' be kwé ju z'a fà là, mba ze netsiaṅe.

³⁰ Nummbe, ndaṅndaṅ mba bin na' mbe ke ju' ntshu Nsi tà mbwe, nkwé kondèn ndonni ntshùa njam yub nebe ke ju' ntshu Nsi là,

³¹ be ndaṅndaṅ, mba bo yub ke' ju' ntshu Nsi ndonni, ndùlala ndù mba bo tshùa njam kondèn ze bin kwé là, nkwé kondèn ndonni.

³² Nummbe Nsi lo fùn njoṅ benntùn fa ntùm nebe ke ju' ntshu i, ndùlala ndù a ko ndèn njoṅ yub fa.

³³ Wé! Mi' fu' zenu mba ze nelèn Nsi ghu' neshu! Be mèn ke tswe' ntun ze nekeb ntsha Nsi, be mèn ke yen manze tse.

³⁴ Nummbe, we z'a lèn nkwatenu Tshùaben à? Ze ngafà ntag b'a we?

³⁵ We z'a to' bwôgmbwe mfà ju Nsi k'a bèn mba' yi à?

³⁶ Nummbe njoṅ i fa mfe à yi, njoṅ i fa b'a num i, njoṅ i fa ke nèn à num i. Ghamte be yi ngu'ngu'. Amén.