Nzenu 8 - NTSHOB NSI

Nzenu mbwe ngù' mfen

¹ Zit mèn z'a be a bagte men ntshob li ndù à? Zenu mèn num ngù a ṅwate se i bèn nsôg ndàne.

² Me tshob ndù o ke nze ntshù' mfen, a tshùa num kàn ze bin Nsi wat là,

³ a ke' bwô ndù o kù mbaṅ i nèn ngùanesà, kà ke njôg shun bin ben kebwô, nummbe mfen nsi ghù à ju z'a bwô i là,

⁴ mbèn mbe, ntshob mfen ke mb'a tsho' ke su mbà. We z'a ku' nebètt'é ndù: z'o tshwèt ngù b'a ke?

Mèn ke' lèn nu z'a se' là

⁵ Mèn z'a ke nze ntshù' là, ke' ku' neju' kebwô. Ntù nzenu num ndèn ngelaṅ mbèn ndèn tsho'te.

⁶ A b'a nenùn ndù mba ke lo ghù ze ngelaṅ mbèn ngù ze tsho'te.

⁷ Nda' ndù a b'a nge' tu mènntùn nummbe a ke' lèn ju z'a nsi se' là, we z'a nsi soṅ i ngelaṅ ze yen ju là nsi se' à?

⁸ Sàm mèn ke' ku' netshùb zwiag z'a num mfà yôg là. Sàm mèn ke' ghù ngù' mum lé'njù vùkob. A be bo ke kôgte tse mfèt ntsha, mba mba netshùag yàm ke' be yôg mèn nà.

⁹ Me na' ndèn tshen tshu là fa à ngelaṅ ze me na' njen tun bam kamànyam ndù mènntùn ghù ngù' neghù kebwô num mfèl i là.

Nukeze num mfa' Mbom

¹⁰ Ndùlala, me yen tshùagkèt benntùn ntùm fi; bo nke ndo dù' nele'te Nsi nke nko' nswe'e, bo lagte mba bo na' ngù tusô là. Mba yen nà bèn mb'a banban.

¹¹ Nummbe Nsi ke' be tsho'te ntsha ba ghù kebwô ndende, ntù bon mèn nyiaṅtu nke nkù à be neghù kebwô.

¹² Mba mba ngafànnu tshwèt nke' mfàn nu nguan yoṅ nkù mbèn nke nàn nsaṅlaṅ be nefàn nà, me lèn ndù fen b'a ju njoṅ ghabwôg Nsi fa, nummbe bo num mvètte mbwe Nsi.

¹³ Nda' ndù, fu' ke' b'a ze ju tshùagkèt mènntùn, mbèn mbe a ke nsi kwi'te njoṅ lé'njù tse ke bèn ngubte ntshùa netshaṅ mèn nummbe a ke' be bwôg Nsi.

¹⁴ Mbèn mbe tsemo' tshu banban bèn mbe num nsitsha'a, a nke mbe num mo' ngelaṅ bo lo' mèn nenùn mba tshùagkèt mèn nà, ndo' tshùagkèt mèn mba mèn nenùn nà. Kà me nke mbèn nsoṅ zin ndù mba yen nà b'a be banban.

¹⁵ Ndùlala ntù àm bwô num tsiaṅte, nummbe fu' yàm num mènntùn tun bam kamànyam b'a nejù, nu mbèn ngag ngùa. Tshù ju z'a nsi tshagt'é num mfa' mi mum ntswe'njù mi Nsi a' fà yi tun bam kamànyam nà.

¹⁶ Ndùse me na' ndèn zenu, mbèn njen mfa' mi benntùn num mfa' num nsitsha' là, a be be ndù a num mbe tèttswe' ke mbwôgtshù lo ke zi sàm laglo là

¹⁷ mba me yen njoṅ mfa' Nsi fa. Be mènntùn ke siaṅte ndèn njoṅ mfa' Nsi fa tun bam kamànyam, mba mb'a num nke mfa' fa' nke ndiag nelène, ke yôg ndèn nà. A be ndù mba mo' zemetén num ntshob ndù a lèn nà, mb'a ke' yoṅ ndèn mebwô.