Nzenu 7 - NTSHOB NSI

Ntag zenu

¹ Lén nku'ni bwô ntshùa mfèt mebwô. Lé' nekwù bwô ntshùa lé' nebwe.

² A bwô nenèn ndà vù ntshùa nenèn ndà sa, nummbe njoṅ benntùn fa nsi miagt'a vù, a bwô ndù njoṅ benntùn nyiaṅtu fa fà ntù yub bwe fa.

³ Tù' nda' zwi a be zwentù, nummbe ntù z'a be ntùm nenywin nà ku' netswe mebwô.

⁴ Ntù ghazenu ke b'a nsindà vù, ntù ba kagni bèn nke mb'a ndà tsiaṅte.

⁵ A bwô neju' nka'ni nzenu ntshùa ne nju' njobkwi ba kagni.

⁶ Nummbe ndaṅndaṅ mba nkekùt ntshwèn num nke mbètte nkù tun mba là, mb'a ndaṅndaṅ mba nkagni num nzwi là. Nda' ndù mba yen nà b'a banban.

⁷ Nge' be ngù nzenu kaṅ ntù' mbabune jù ke tshaṅ bèn nke mbagte ntù.

⁸ Miagte nu bwô ntshùa nto'te mi. Ywèt nefènte bwô ntshùa ywèt nefa'te.

⁹ Kà bam ndù ntù o ke nja nde, nummbe yantù ke ntswe à ntùm ntù ba kagni.

¹⁰ Kà bètte ndù, ke bèn ngù njù z'a be mbwe là, bwô ntshùa njù sènni à? A ke' b'a zenu bèn ngù k'o mbètte men ntshob là.

¹¹ Zenu bwô ntshùa ju ntsi'i. Zenu num njwimte ben tse bo num njen nyam nà.

¹² Nummbe ndaṅndaṅ mba nkàb num mbéb mèn ngelaṅ nge' là, a b'a ndaṅndaṅ mba zenu ku'ni neghù mà nu ndùb là, nummbe zenu num njôg benntùn tse bo ghù i là.

¹³ Lôte mfa' Nsi njene: We z'a ku'ni netsiagte ju ze Nsi ṅam à?

¹⁴ A mbe mum lé'njù fu', o be ngafen, ne mbe mum lé'njù nge', o ghù nkwate, Nsi nabte yen mèn ni, mba yen mèn nà. Nsi lo nabte yube mba be mènntùn ke ku'ni nelèn ju ze bo be yi là mba ju z'a nsi se' be là.

¹⁵ Ngelaṅ me na' mi nke njôg yàm nà, me yen tshu yàme: Me na' yen mèn nenùn bi yôg se num nunenùne, mbèn njen tshùagkèt mèn lo' nezete njôg yi.

¹⁶ Kà ke ngù nunetsine ntshùate, ke bèn ndo' wul o mba neta nzenu là. Ke bèn ngù o nke mbagte wul o à?

¹⁷ Kà be tshùagkèt mèn ntshùate, kà ne mbèn ndiag nebe nkagni. Ke bèn ngù o kô nekwù ke yu ngelaṅ ku' à?

¹⁸ A bwô ndù o tshùb yen ju li, ke bam mbe bu o kag i, nummbe mèn z'a num mbwôg Nsi là a' ghù yen ju li mba yen ju là bumte.

¹⁹ Zenu num ndo' nzenu ngù mèn neta yi ntshùa ghatô ngô gham (10) ntùm ta' taṅla'.

²⁰ Nummbe sàm mèn netsin mba ntshù' ke num nsitsha'a z'a ku'ni neke ngù be mebwô ke to' fàn nu là.

²¹ Mbèn mbe, kà ke nkù' ntoṅ neju' njoṅ nu fa bo ke ntshob num o là, mbwôg ndù k'o ju' mba nkuan o tsho' kul o là.

²² Nummbe a b'a yoṅ yàm ze mba wù num ntsho' yu kut tsemo' benntùn nà.

Ben tse bo ghù zenu là ke' yàm

²³ Me lo kagtùn nelo' zenu nsiaṅte tshen tshu là yi fa, ntshob ndù: me nsi be nzenu, nda' ndù, zenu ke' à ngùanesà mbaṅ àm.

²⁴ Ju z'a se' neyôg là ke' à ngùanesà, ndù a leme, ndeme. We z'a nsi la't'é à?

²⁵ Mba me là, me nsi ke njab ntù àm nelèn nu, nefu'u, nediag zenu bo nunetsine, mba nelèn ndù netshùag yàme b'a fùmni, mb'a fùmni ke ndù i.

²⁶ Ju me yen nà b'a ndù ju z'a zwe ntshùa vù là, b'a mènnzwi z'a tswe mba ywi', ntù i be mba fole, mbu mi be mba nkù nebwùn nà. Mèn mebwô mbwe Nsi a' yôg mbwe i, là mèn kebwô ke nsi yôg bu i.

²⁷ Nzenu tshob ndù: Tshù tshu tse me yen nà, mbe tshobe, nke nda'te yub ntshù' ntshù', nelo' nda'te mi nkwate yi.

²⁸ Me ne ke' ndiage, nda' ndù me ke' yoṅ njene. Me yôg njen à nda' ta' mandum ntshù' num bandum ntsha' mbùm; mba bènnzwi là, me ke' yoṅ njen mba nda' ze ntshù'.

²⁹ Nda' ndù, o lèn ju ze me yen ké? Me yen mbe Nsi nabte benntùn bo tsin, nda' ndù bo num nke ndiag ntun yàme.