Nzenu 4 - NTSHOB NSI

A bwô nekwù ntshùa neyôge

¹ Mbèn mbe, me ma' miag màm tun bam kamànyam njen mbe nefétte benntùn yàm nga' mbu. Bin yen mba ghayennge' tshwèt mfètte ntsenyà njene; ngatshwétte ntsenyà mub ke' be, neta b'a ju ghafétte yube; bo ke' ghù ngazibte yube.

² Ndùlala, me ghe'te fe ben ntshùa benntùn bo ke' yoṅ nkwù là.

³ Ben bo kwù là tswe mebwô ntshùa ba kwù nte miag; mèn bo ke' yoṅ bwe i tse là bèn ntswe mebwô ntshùa yub bàa fa, nummb'a ke tshwèt njen tse nukebwô ze benntùn num ngù ndonni tun bam kamànyam nà.

A bwô nefite ntshùa nefa'a

⁴ Me num ndôte yàm njoṅ mfa' fa, boa bin ze bo num ngù bwe là, njen ghe'te ze tsemo' ben num ngù num tsemo' là, ntshob ndù njoṅ i fa b'a banban mbèn mb'a neghom mfùag.

⁵ Là, njùm num tswe nsi, mfa mbu mi mbèn nke mfèt mbàb wul i:

⁶ Tù' nda' ghom mbu mbàa ke tshùb, o memte fite ntùm ta' tô bu o. Yen ni la'te à ndù fite bwô ntshùa fa'.

⁷ Ben bàa b'a lab mbiag lag. Njoṅ tshu fa tun bam kamànyam b'a banban.

⁸ Tshù njene, mo' mèn lo be bwe ke ghù nshune, ke ghù mén mandum, ke ghù mén mènnzwi, ke ghù mfèl i, a nke mfa' fa' ke ndù i, miag mi ke bèn mbe ywèt neghe'te fu'. Ngelaṅ be ku'u, a tshob ndù: Me tshwèt mfa'a, nke mbi njoṅ yàm fu' fa; nke njôg mfa' ndùlala à we? Mba yen nà b'a be banban, mbèn mbe be ju kebwô.

⁹ Ben bàa b'a lab mbiag lag nummbe bo num ntamte njù bin fa' mebwô.

¹⁰ Mbèn mbe, mo' num ntam nsi, mba mfèl i a' bù' i. Nda' ndù, ndon tu mèn z'a b'a tù' i là, nummbe a tam nsi, mba ngabù' i ke be.

¹¹ Benntùn num nô kunndà bàa, mba wut tshob a' dum. Là mèn nô kunndà tù' i, mb'a nsi ghù à ndùke kà wul i ndum à?

¹² A be ze ntsha' ndiaṅ num i fite là, mba ntshu ntshù' num mbiag ngàme, be mèn tù' i ke ta ben yàme.

Num nu ngù' nkùnkù

¹³ A bwô nelo' kam ku mônke' nzenu ngom mfen yi, ntshùa nelo' njwèn mèn z'a b'a nkagni ke ku'ni nefaṅ bo tagt'é là.

¹⁴ Ke metsit mén nzenu tum à ndàtsha kà tô lo, ke bo bwe i à be ntùm bwoṅ kà tô ngô lo;

¹⁵ mba me yen njoṅ benntùn fa tse bo be nzinte tun bam kamànyam nà, bo b'a njam metsit mén nzenu netô yube, ntshùa njwèn mèn z'a b'a nkagni là.

¹⁶ Tunndà ze nzenu bèn nke ntô là, ke' be bi ke bèn ngù ndù i. Nda' ndù, a ke' bwô ndù tshen ghafen nà tsham mbùm yub nummbe mba yen nà b'a be banban mbèn mb'a nediag neghom mfùag.

Netshob fa'te ntshob mbwe Nsi

¹⁷ Ke ndôte nku mu ngelaṅ z'o tshwèt ntsho ntùm Ndà Nsi là, kù'te nse'e, nkù' ntoṅ nju'u, ntshùa nefà tshule'te ndaṅndaṅ mba ba kagni là. Nummbe bo num mfa' ndùlala, ke lèn ndù bo ke ngù à nukebwô.