Nzenu 12 - NTSHOB NSI

Neghebte mbaṅ vù

¹ Ke nkwimte Mbom o ngelaṅ z'o ke' nguanmèn nà, kà ntswe'njù kebwô mba ngu'njù kebwô z'o nsi tshob bwe mbe: “Me ke' bèn ngù sàm tsiaṅte bwe,” là ku'u.

² Ke nkwimte Mbom o kà ngelaṅ nyam, làne, maṅwù boa nsa mba ndot bo mbaṅ se'e,

³ mum lé'njù ze ghabéb ndà nsi vètte là. Lé'njù ze benntùn neta nsi ṅam wut tshob là, lé'njù ze bo nsi sébte njoṅ benntùn tse bo tshwèt ngo' ngefet là, kà lé'njù bènnzwi tse bo tshwèt ndôte tôndà là mi,

⁴ ngelaṅ ze bo fùn tôndà, nze loṅ bàn bot, kù'ngab tô, bo bam num miaglo, njoṅ tshu neyob kwi yi fa tsin nà.

⁵ Yen ngelaṅ nà bo nke mbwôg neko' nèn tù dù' z'a ṅate là, mbe zin num manze bwôg tshùb mèn, mbe be yen ngelaṅ nà ndù tù mbebe' sô nsàm mi, ngamntàn nke nswe' nse' num tsha'a, miag manyanje' kwù ndaṅndaṅ mba mènntùn num nke ntènte ndùlala, nke nenèn yoṅ ntshù', mbe be ndùlala ndù ghalàn vù yà ke ngebte nekua' là.

⁶ Ke nkwimte Mbom o kà nkù ze bo lo' silba mba' yi là tshele, kà ntu' ze bo lo' tùn gol nabte yi là ntsile, kà lùt ntse ntsit lagntse, kà masin nkù nesoṅ ntse yi tô nkebe.

⁷ Bwôgmbwe nkwimte Mbom o kà mènntùn z'a be mbab là bèn njam ntùm tsha'a, z'a to' tum bwe là, kà ywèt bèn mbèn njam ntèt Nsi z'a to' fà i là.

Neswe' tun nu

⁸ Nzenu tshob ndù: Banban netèt tshu banban njoṅ tshu fa b'a banban.

⁹ Nzenu lo kwi'te nkwate benntùn ntswite yub zenu. A na' ma' mfi', nsiaṅte, ntamte ba tànkùt yàme.

¹⁰ Nzenu na' kagtùn nefon bon ntshob mi a num mbwô benntùn nà. A men ntshob là mi bo kite ntùm yen ṅwa'ni li là. A b'a ntshob mi a ku'ni mbèn mbe mi nenùn nà.

¹¹ Ntshob ghazenu b'a ndaṅndaṅ mba njoṅ nyu là. Ghatse'te men ntshob là tsw'a mba nsaṅ tôgndà mi bo tshoṅ nsi kua' mebwô là. Tshù kua' mat ngasoṅ nu Nsi, mbe mèn ndà tù' i là.

¹² Mén àm, bam nà nekwi'te mimo' mbu' ṅwa'ni bwe: ndù i ke tse bwe, bam nà nezi'te tshu yàme nummb'a num ngù wut mèn bot.

¹³ Miagte tshô: Bin yà ju' njoṅ i fa. Bwôg Nsi mbèn nze ntshù' mi, nummbe yen nà bèn nke ndo' mèn ngù mènntùn yi.

¹⁴ Nsi a' ghù ntsho'te njoṅ mfa' benntùn nyiaṅtu fa, mfa' mub mi mebwô mba mi kebwô.