Nzenu 11 - NTSHOB NSI

Nelèn nezete

¹ Ma' yu bàn a ke nda num ntse, nummbe ngelaṅ nsi be ku'u, o bèn njen i.

² Fà mo' bag tshu tsho ben sammbàa ke ben fome lo, nummbe o ke' lèn nge' z'a nsi tum ntùm njù là.

³ Ndot num ntamte ntù' mbaṅ, ndo num nsitsha'a. O ke' tù a vù bag mà ntèn ke bag mfe tu lo, mb'a nsi gho à dù' z'a vù bwe là, tàn bwe.

⁴ Ngatswe nke ndôte be fetmbaṅ ke' be ywit ju. Ngatswe nke ndôte be ndot ke be tsho' tshu.

⁵ Ndaṅndaṅ mb'o ke' be lèn manze fetmbaṅ, ke bèn ndèn mba mvôg mén num mbe bam mènnzwi njùm nà, a b'a ndaṅndaṅ mb'o ke' ku'ni nelèn mfa' Nsi là, nummb'a yi bèn nke mfà njoṅ tshu fa.

⁶ Ke njwit nzwit ju o nkebnjù, ke bèn mbam ndù bu o tswe banban mfetnjù, nummb'o ke' lèn bag i z'o nsi ju' mebwô bwe là. Mbèn mbe, a nèn num men mfa' mbàa là, o ke' lèn a be z'a tamte fa mb'a mfa' mebwô là.

Nebe yôg nke nzete

⁷ Làne b'a fite, a b'a tsiaṅte yàme miag neyen nyam.

⁸ A be ze mèn yôg ntùm njù ngu'njù yàm nà, mb'a bwô ndù a tsiaṅte num njoṅ tshen ngu'njù là fa, nda' ndù, ndèn mbe lé'njù njam yàm neshu, mbèn ndèn mbe njoṅ tshu fa ts'a nsi se' là b'a banban.

⁹ Ke ntsiaṅte me ménnshum ngelaṅ z'o ke' mônke' là, a bwô ndù ntù o ghù fen ngelaṅ z'o ke' nguanmèn nà. Ke nzin num manze ze ntù o la'te wù là, ndaṅndaṅ mb'o lo' miag mu njen yi là. Nda' ndù o mbe ghù njoṅ i fa o kwimte ndù Nsi a' ghù ntsho'te ntsha o num njoṅ i fa.

¹⁰ Kà ghù zwe ntùm ntù o, ke bèn mbam ndù nukebwô tsho num o nummbe nu nguanmèn mba nu njwènmèn b'a banban.