Nzenu 1 - NTSHOB NSI

Yôg b'a ke taṅ i

¹ Men ntshob li b'a mi Nzenu, mén David, z'a be mfen mà Yérusalém tshob là.

² Nzenu tshob ndù: Ju banban netèt tsemo' tshu banban b'a banban.

³ Bin ze be mènntùn nyiaṅtu jù num njoṅ mfa' fa mi a be njen bwe bam kamànyam nà b'a ke?

⁴ Mo' zwiaṅ benntùn num ntôge nène, mo' zwiaṅ benntùn se', là nsitsha' ghô matmat.

⁵ Nyam num ntume, mbèn mbi, a num ndam mbole, mbèn nèn ntsho dù' à ke ntum nà.

⁶ Fetmbaṅ be ntshùa nèn bag mà ntèn, ndam nèn bag mfe tu, nke ndame, nke ndam ntshùa nène; a be ndam ndùlala, mbèn nto'o.

⁷ Njoṅ ntse nke'nke' fa ke nèn ntsho à ntùm dibantse, là, dibantse ke dun; ntse nke nenèn ze be nenèn dù' z'a tshwèt nèn nà.

⁸ Njoṅ nu ku'u, ntshùa netshob yàme, lag ke' be ywèt num neyene, toṅ ke bot neke nju' nu.

⁹ Ju z'a na' njà be là, bo nsi se' bèn be, ju ze bo na' njà ghù là, bo nsi se' bèn ghù ù, sàm ju nswe ke bam kamànyam.

¹⁰ Mo' nu bwe num nsitsha' ze bo tshob ndù: “Tshù nu nswe li là ké?” Yen nà na' yà be num tsemo' ngu'njù ts'a na' njà tôg là.

¹¹ Ju nelo' nkwimte ngelaṅ z'a yà tôg là ke' be. A num mbèn mb'a ndaṅndaṅ num zwiaṅ benntùn bo nsi se' ndù mànjam mba ben tse bo nsi tum yub njam bo là.

Finjom ta' mfen

¹² Me, nzenu, me na' be mfen ba Israél, mà Yérusalém.

¹³ Me lo' ntù àm nèn tsham yi, mbèn ndo' nkwate siaṅte mba bon tshu num nke ntôge tun bam kamànyam nà. A b'a kua' fa' ngùtni là ze Nsi fà bwoṅ benntùn nyiaṅtu ndù bo ke njen nge', mfa' mebwô là.

¹⁴ Me yà yen njoṅ mfa' fa mi a be tun bam kamànyam nà, nda' ndù njoṅ i fa b'a banban, be bèn nke nta' à fetmbaṅ.

¹⁵ A be mèn ke nyit ju z'a ṅam nà, ke bèn nku'ni nesiaṅ njoṅ tshu fa ts'a be ndo' mbit nse' yi là.

¹⁶ Me na' kwate ntshob ndù: Tshù, zenu àm ghu' ntshùa mi mba zit mfen no z'a bwôgmbwe me netô Yérusalém nà, me siaṅte nu yàme, ndèn zenu bo ju nezi'te.

¹⁷ Me lo' ntù àm nèn tsham yi nelèn fagte netèt zenu, bà, yùm mba ju nezi'te; me lèn ndù mba njoṅ tshen nà fa b'a nediag neghom fetmbaṅ mbu;

¹⁸ nummbe nge' yàme num mbe num nkwate yàme; mèn z'a num nkwi'te zenu i là, ke mbèn nkwi't'a mba nge' i.