ṄWA'NI YOB 8 - NTSHOB NSI

Ntshob ze Bildad na' ntshob Yob là

¹ Bildad ze Shuash tshob ndù:

² O nsi ke tshob ndùlala tà kum à ndùke? Ntshob mi a tshwèt ntum ntshu o là b'a mba tonkèt fetmbaṅ nà.

³ Nsi ghù nema' nu ndaṅndaṅ nsi ké? Nganeta Ntshùate ghù nema' nunetsin nsi ké?

⁴ A be ze nshumnshum tsho na' ngù nukebwô num i là, mb'a swèn yub num nukebwô yub.

⁵ Là tu wul o, a be z'o diag Nsi, a be z'o ma' mbu Nganeta Ntshùate là,

⁶ a be z'o tsine, mbe ndaṅndaṅ nà, mb'a nsi lôt'o kà ke tag, bèn ghù ndù fu' bèn ntùm ndà o, wù z'o b'a mbu' là.

⁷ Yu njwèn fu' nsi b'a metsit nu num s'a lem wù, ndù a zi neshu là.

⁸ A bwô nebètte zwiaṅ benntùn tse bo yà tôg là nu, mbèn nkù' ntoṅ nju' mi nkwate ba tà.

⁹ Nummbe bag tse bag lo mbe nkôg là ke' lèn sàm nu, lé'njù tshag nke ntshùa num tsha'a mba netshaṅ nà.

¹⁰ Bo nsi tswit'o, bo nsi tshob nu wù. Bo nsi sô men ntshob li tu bo ntshob ndù:

¹¹ Nkewakob num mbit ndù ntshe' ke nsi ké? Nka'nesoṅ num mbit dù' ze dù' ke' fi là ké?

¹² A num nke' fifi, ndùse bo ke' yoṅ nkeb i là; a be njum ndende ntshùa tsemo' nenà.

¹³ Tshù mb'a ke mbe num ben tse bo lag Nsi là. Ze nenywinte mèn kebwô nsi bi to'o.

¹⁴ Dù' z'a ke njab ntù i bwe là be', dù' z'a ke njé'te bwe là b'a netàm tàm ngengaṅe.

¹⁵ A num njé'te num ba' i, ke be ndù ba' ta tù. A num nget bwe, ke be ndù tun i féb nsi.

¹⁶ Ngù' be ndun num i ndùse bo ma' i num nyam nà. Mbu mi nke nkabte ze nà fa.

¹⁷ Nga tse be mfa num netèt ndoṅ, nzin tà nèn nkum bam gholoṅ.

¹⁸ Là, a be ze bo tsho' dù' z'a be bwe là, mba dù' là nsi gha i ke tshob ndù: me lo ke to' yen o tshàm.

¹⁹ Tshù lèn ntàm mi a num nkab num ngùninu mi là. Tsemo' nsi tù' bèn bit yub be num dù' tsha' mbile.

²⁰ A ndùlala, Nsi ke' be ghua' mèn netsine. A ke' be tshag bu i ghatshùagntù.

²¹ A nsi ghù ntshu o bèn nzwi mo' ta' lé'njù. A nsi yab nkwi ṅwate num nkub ntshu mo.

²² Tuswe nsi ghom ghakeban tsho. Bo nsi biagte ntàb ze ghatshùagntù num ntswe bwe là.