ṄWA'NI YOB 5 - NTSHOB NSI

¹ Kua' ndonni! We z'a nsi bùnte wù à? O nsi tshob nu à zit mèn netèt ba Angél à?

² Nkagni be mbi ntùm yantù i, mbabun nke nkwù ntùm tse vôgte.

³ Me lo yen nkagni taṅ nga nsi. Me lo yoṅ mfa'te nso ndon tu ze dù'ntswe.

⁴ Nshumnshum tse ke bèn nsine. Bo num mfétte yub num nsém, sàm mèn ke tum num netshu' yube.

⁵ Ghanziku' num njù tshu tshob fa num nà. Bo num nse' ntsho' i tà nèn nkum ntùm ba njô. Ghakùntù num mbiagte tshu tse fa.

⁶ Nge' ke' ke ntum à ntùm mbabe. Nge' ke' ke mbil à nsi.

⁷ Bo ke mbwe mènntùn a yen à nge', ndaṅndaṅ mba sa mbwôg b'a num nefùt là.

⁸ Mba me là, m'a' tshob yàm nu à Nsi, me nsi zin sàm kame, tshob yàm nu à Nsi.

⁹ A num ngù tshu ndùbndùb tse mèn ke' ghù nelèn ntum mi là, nke ngù tshu nekuni yàm yàme.

¹⁰ A num ntum mbaṅ num nsitsha'a, nke ndo' nzwi' ba nà yi.

¹¹ A num mbù'te bétni benntùn, nke ntshu' ghayennge'.

¹² A num mbiagte ntàmtenu ghazete,

¹³ A num ngom ghazenu ntùm zete yub, nke ntèn ntàmtenu mub ntam nsi.

¹⁴ Tshen ben nà num mbumte boa ba njam tèt nka mbwôgtshù. Bo num momte dù' nka mbwôgtshù mb'a b'a tèttswe' là.

¹⁵ Ndùlala Nsi num nkabte mèn nebot num ma'ni tshobe, nke ntshu' yub bu neta benntùn.

¹⁶ Nenywinte num ntomte ben nebole, Là mfànnu nke mfùn ntshu mèn.

¹⁷ Mènfen b'a mèn ze Nsi be ntshobt'é là. Yob, kà wag ndùse Nganeta Ntshùate tswit nkùn num o là.

¹⁸ A num nte keko' mbèn nkule. A num nkag mfaṅ bu i ntswinte.

¹⁹ A nsi tshu' o num nge' yoṅ ntôge, A be kum yoṅ sammbàa nukebwô be ke bèn nkwag o.

²⁰ A nsi yôg o bu vùkob ngelaṅ nziku'u, yôg o ntshu ṅwi ngelaṅ ntsho.

²¹ Bo nsi kabt'o num ndàm ze lém mèn nsi ghù là. O ke nsi bwôg ndùse nesate dù' nsi se' là.

²² O nsi ke zwi tsho nesate dù' bèn zwi mba nziku'u. O ke nsi bwôg tshu mba nyàm tse bo be nsitsha' là.

²³ Nummb'o nsi wat kàn à ndoṅ mi a tshwèt là; bin à nyàm ts'a nsitsha' be tsin ntùm fite.

²⁴ O nsi b'a ntùm fu' ntùm ntàb o, bèn tèt bwoṅ nyàm tsho be kua' mbe mi.

²⁵ O nsi yen yu nzwit yàme. Nzwil o nsi yàm mba nenà tshwèt là.

²⁶ O nsi nèn ntùm fi à ywèn, ndaṅndaṅ mba bo num nkeb nsa num ngelaṅ i là.

²⁷ Tshù mba bag lèn yag là, tshù mb'a be là; a yu ntsha neju' ngù mb'o lèn yu là me Yob.