ṄWA'NI YOB 1 - NTSHOB NSI

Yob ntùm laṅte

¹ Mo' mandum lo be ntùm ngô Uts, lén se Yob, mandum nà na' mb'a mèn netsine, mbe mèn ndaṅndaṅ. A lo ke mbwôg Nsi, nke ndo' mvèn i ntam nukebwô yi.

² A lo bwe nshumnshum sammbàa, mbwe ngonngon tat.

³ A lo ghù mbwe ntsha' sammbàa, kamél ntsha' tat, nyàmna' ntsha' mbùm, nkekwèn nkù tàn bo ta' bwoṅ ghafa'. Bo lo ke nyàmte yen mandum nà neshu netèt njoṅ bon ntumnyam fa.

⁴ Nshumnshum tse lo ghù mat neke ntse'te bo bo, mba we lo num ze yoṅ i nejù mbèn nu. Bo lo ke ntsiaṅ fèt tshob tse bènnzwi ndùse bo tse'te nejù mba nenu là.

⁵ A lo ke mbe ndùse lé'njù njùa fa yà tôg là, Yob tum bo tsiaṅ nshumnshum tse, a sôg yube. Ndùse njù làn nà, a ton ta' nyàm Tshùaben mba num lén zit nshum i lo. Nummb'a lo ke ntshob ntù i ndù: Mo' ndù nshumnshum tshàm ghù nukebwô, nso ndon tu Nsi ntùm ntù bo. Yob nke ngù be ndùlala mba num zit yoṅ i lo.

⁶ Tshù, a lo be mo' lé'njù, bon Nsi se' ntsinte mbwe Tshùaben mfe kamànyam. Mba Satan se' ze ntsho netèt bo.

⁷ Tshùaben bètte Satan ndù: o fe à yà? A bùnte Tshùaben ndù: Me fe à num tsha' zinte tshàm bwe.

⁸ Tshùaben bètte Satan ndù: o yen ngafa' àm Yob ké? Mfuni mi ke tse num nsitsha'a. A b'a mèn ndaṅndaṅ, nke mbwôg Nsi, mbèn nke ndo' mvèn i ntam nukebwô yi.

⁹ Satan bùnte Tshùaben ndù: Yob ke mi mbwôg o à banban ké?

¹⁰ O ke' kabt'é, ndà i mba tshu fa ts'a ghù là ké? O naṅ mbotni num fa' mbu mi fa, bwoṅ nyàm tse lo' ngô fa.

¹¹ Là, laṅte nekwag ju z'a ghù là, mba me fiag nkuan ndù a nsi naṅ ndon tu o ndaṅndaṅ. Nemagte ke bwe.

¹² Ndùlala Tshùaben tshob Satan ndù: Tshù, me fà mba ke lo z'a ghù là wù ndù o ghù mba ke lo z'o kô là yi; nda' ta' ju ntshù', ke kwag tu wul i bu. Satan lo num miag Tshùaben.

¹³ A lo be mo' lé'njù nshumnshum Yob boa ngonngon tse nke njù mbèn nke nu ndà ntshùambwe bo,

¹⁴ mo' ngantum se' mbaṅ Yob ntshob ndù: ba nyàmna' lo nke ndù' nà, nkekwèn nke mfèt mbaṅ bo,

¹⁵ ba Sabéa tsho' ngwù num bo, ndo' yub fa nèn yi, mbèn ngwatte ghafa' fa. Me tum ntshu vùkob à tù' me, kà nse' soṅ o tshô

¹⁶ Ndùs'a ke nke' ntshob là, mo' mèn ṅwag ntshob ndù: mbwôg tum mfe kamànyam ngwù, nkù ba mbwe boa ghafa', ntsham njoṅ yub fa. Me tum ntshu vùkob à tù' me, kà nse' soṅ o tshô.

¹⁷ Ndùs'a ke nke' ntshob là, mo' mèn ṅwag ntshob ndù: ba Kaldéa tse'te bwoṅ tshob tat, ntsho' ngwù num ba kamél, ndo' yub fa nèn yi, mbèn ngwatte ghafa' fa. Me tum ntshu vùkob à tù' me, kà nse' soṅ o tshô.

¹⁸ Ndùs'a ke nke' ntshob là, mo' mèn ṅwag ntshob ndù: nshumnshum tsho boa ngonngon tsho lo nke njù mbèn nke nu ndà ntshùambwe bo;

¹⁹ ndùlala mo' fetmbaṅ ndùb fe num mo' bag kônkwa, nse' ngwù num ntôg ba' nkuà fa. Ndùlala ba' vù num tshen bon nà, njoṅ yub fa kwùte. Me tum ntshu vùkob à tù' me, kà nse' soṅ o tshô.

²⁰ Ndùlala Yob lo nsi, mfagte kummbaṅ se, nkom tu i; yen nà be tôge, a vù nsi num tsha';

²¹ ntshob ndù: Me na' ntum bam màa mbumbu, me nsi bèn ntùm tsha' à mbumbu. Tshùaben lo fà, Tshùaben bèn nkwé; lén Tshùaben b'a be neghamte!

²² Num njoṅ yen nu là fa, Yob ke fàn ntshu i, ke yen Nsi mba mèn z'a ke' tsin nà num sàm nu.