ṄWA'NI RUT 4 - NTSHOB NSI

Mba Rut bo Boaze na ndà là

¹ Boaze nèn nsém ntswe nsi. Mbe tshù njen mèn z'a ghù nebwôg lo' Rut fôg là nke ntôge, Boaze tshob yi ndù: Ndùb, ghebte nsen ni, tswe nsi. Yen mèn nà ghebte, ntswe nsi.

² Boaze lo' bandum gham netèt kamkam mum ngô, ntshob ndù: Bin tswe nsi nsen ni. Bo tswe nsi.

³ A tshob mèn z'a ghù nebwôg lo' Rut fôg là ndù: Naomi lo fe ntùm ngô Moab nse'e, a tshwèt ndiag neswèn kam tsha' mfèt be Elimélék.

⁴ Me yen ndù a bwô me te bu num o, ntshob yen nu là wù. Lo' yen kam tsha' là mbwe ben tse bo tswete nsi nsen ni, mbe kamkam mum ngô là. A be z'o kô nelo' là, o lo'; a be z'o ke' kô là, o soṅ àm me lèn. Nummbe mo' mèn ke bwe z'a be mbwe o num nebwôg lo' ntsi' là. Tu wul àm b'a njam o. A bùnte ndù: M'a' bèn ndo'.

⁵ Boaze tshob ndù: Lé'njù s'o nsi kwé nà mum mbu Naomi là, o nsi kwé mba Rut ngon Moab, nzwi mfe, ndù o bù'te lén mfe ntùm ntsi' mi.

⁶ Mèn z'a ghù nebwôg lo' ntsi' là bùnte ndù: Be me ke lo' i num yàm tu, mbwôg ndù kà me sate màm ntsi'i; lo' yàm dù' nummbe me ke' kô nelo' i.

⁷ A lo ke mbe Israél mbwembwe, bo nke mbe nabte nu num nu ntsi' ke nebate ju lo, mo' mèn netèt ghanu sô keto' se mfà mo'. Yen nà b'a kwénta mum ngô Israél.

⁸ Mèn z'a ghù nebwôg lo' ntsi' là tshob Boaze ndù: Lo' num yu tu. A tshob ndùlala nsô keto' se, mfà Boaze.

⁹ Ndùlala Boaze tshob kamkam mba ngô ndù: Bin b'a ghakwénta sènni ndù me lo' njoṅ ju fa z'a be ze Elimélék, Kiljon mba Maklon nà mum mbu Naomi,

¹⁰ mbèn ndo' mba Rut ngon Moab z'a na' mbe nzwi Maklon nà mba yàm mènnzwi là. Me nsi bù'te lén mfe mum ntsi' mi, ndù kà lén mfe bi netèt fèt tse mba ntùm ngô yube. Bin b'a ghakwénta sènni.

¹¹ Njoṅ benntùn fa tse bo be nsém nà, mba kamkam tshob ndù: Bag b'a ghakwénta! A bwô ndù Tshùaben ghù ndù mènnzwi z'a tsho ndà o là be mba Rashél mba Léa, tse ntu tshob bàa na' nte tunndà Israél là. La'te yu neta Efrata, te lén so Bétléhém!

¹² A bwô ndù tunndà ze Tshùaben nsi tshùa njam yen metshab mènnzwi là fà wù là ghù ndù ndà o be mba ndà Perét ze Tamar bwe Yuda là.

Tunndà David

¹³ Boaze lo' Rut, a tù' nzwi i; ndùlala Boaze lo' i. Tshùaben ghù Rut lét, mbwe mén mandum.

¹⁴ Bènnzwi tshob Naomi ndù: Ghamte be Tshùaben z'a ke' ghua' o sènni ndù o bwoṅ ta' mandum z'a ghù nelo' o fôg là! Lén se nsi ju'ni mum ngô Israél.

¹⁵ Yen mén ni nsi be yu fitentù, bèn tomt'o ntùm yu ywèn; nzwimén o z'a be nkô o là bèn mbwe i, nzwimén o z'a tanjoṅ wù ntshùa nshumnshum sammbàa là.

¹⁶ Naomi ket mén nkab ntù i, nke nz'é.

¹⁷ Ba ndùla' tswi lén se ntshob ndù: Bo bwe mén mandum Naomi. Bo tsiaṅ i ndù Obèd. A b'a tà Isaï z'a be tà David là.

¹⁸ Tshù tunndà Perét li: Perét bwe Hétsron;

¹⁹ Hétsron bwe Ram; Ram bwe Amminadab, Amminadab bwe Nakshon;

²⁰ Nakshon bwe Salmon;

²¹ Salmon bwe Boaze; Boaze bwe Obèd;

²² Obèd bwe Isaï; Isaï bwe David.