ṄWA'NI RUT 2 - NTSHOB NSI

Mba Rut nèn netswitte ntsha' ngefet mum nà Boaze là

¹ Naomi lo ghù mo' mfèt ndu i. Yen mèn nà lo b'a ngaju, mbe neta mèn. A na' ntum à ntùm tunndà Elimélék; lén se Boaze.

² Rut ngon Moab tshob Naomi ndù: Me le't'o ndù o faṅ me nèn ntswitte ntsha' ngefet mum nà mèn z'a be a ko ndèn màm, mbam me là. Naomi tshob yi ndù: Ngon àm, nène.

³ A nèn, nke ntswitte ngefet mum mo' nà, njam ghatsho' tshu. Fen ghù yen nà là b'a ze Boaze, mènntùn ntùm tunndà Elimélék.

⁴ Boaze fe Bétléhém nse' ntshob ghatsho' tshu ndù: A bwô ndù bin à Tshùaben be. Bo bùnte yi ndù: A bwô ndù Tshùaben yab kàn, ntam ntse wù.

⁵ Boaze tshob ngafa' i z'a ke ndôte ghatsho' tshu là ndù: Yen mén mènnzwi li b'a ze we?

⁶ Ngafa' z'a ke ndôte ghatsho' tshu là bùnte ntshob yi ndù: Yen mén mènnzwi là b'a ngon Moab z'a na' mfe mum bag ngô mbat mà Moab nse' bo Naomi là.

⁷ A lo ntshob ndù: Bam me ndù me be njam ghatsho' tshu nke ntswitte ntsha' ngefele. Ndùlala fe nkebnjù z'a lo nse' là, a b'a be tù netsin num nku mi tà nkum ndonni. A fit'a nda' metsit ngelaṅ mum ndà.

⁸ Boaze tshob Rut ndù: Ngon àm, ju' mebwô, kà bèn nenèn ntùm mo' nà. Kà nèn ngùanesà nsen ni, là so wul o num ghafa' tshàm tse bènnzwi.

⁹ Lôte dù' ze bo tshwèt ntsho' tshu bwe mum nà là, ntam njam bo. M'a tshob ghafa' tshàm tse bandum ndù kà sàm mèn ma'ni o. A be ze nzi ntse ya o là, o nèn ngwat ntse mum ntshaṅ ntse mi ghafa' tu' là.

¹⁰ Rut vù nsi kabkab mbwe i, ntshob yi ndù: O ko ndèn màm, ntshàm àm ze me b'a ta' ngùn nà ndù numke?

¹¹ Boaze bùnte yi ndù: Bo soṅ àm njoṅ nu fa z'o ghù num màndu o, fe ndùse ndu o kwù là. O bam nefaṅ tàan, màan, ngô ze bo bwe o bwe là, nèn ntùm ngô z'o ke' yoṅ ndèn nà.

¹² A bwô ndù Tshùaben ghù wù mb'o na' ngù yu là, ntsho'fa' mi a dun nà fe Tshùaben mbe wù, Tshùaben, Nsi Israél z'o se' nsen ni ndù o lem tun mbàb mi là.

¹³ A tshob ndù: O tshùaben àm, o la'te kondèn o num àm! Nummb'o fite ntù àm, ntshob nu ntù ngafa' o ze mènnzwi, mba mba me ke' be ndaṅndaṅ mba mo' ta' ghafa' tsho tse bènnzwi là.

¹⁴ Ndùse bo tswe nsi nejù jujù là, Boaze tshob Rut ndù: Ghebte, njù jujù, lo' yu bàn mba ndu'. Rut tswe nsi mbaṅ ghatsho' tshu. Boaze fà ngefet neka yi; a fèt njwèle, ndé' tshé' i.

¹⁵ Ndùs'a lo nsi num netswitte ntsha' ngefet là, Boaze tshob ghafa' tse ndù: Bin faṅ a tswitte ngefet mba netèt tse ntùn; kà bin ma'ni i num sàm ju.

¹⁶ A bwô ndù bin kag mba bon ko' ngefet yi nsi num nkag mine, a tswitte. A ke' bwô ndù bin tshobt'é num sàm ju.

¹⁷ Rut zinte mum nà tà nkum mfetnjù. A kwite ngefet z'a tswitte là k'a be nguan ntsi ngefet ntùn.

¹⁸ A ket nèn yi mum ngô, màndu i yen ju z'a yôg ntswitte là. Rut sô mba tshé' jujù mfà yi.

¹⁹ Màndu i tshob yi ndù: O tswitt'a yà sènni à? O fa' à yà? Mbotni be mèn z'a tshàm o là. Rut soṅ màndu i mèn z'a fa' la' i là, ntshob ndù: Mandum ze me fa' la' i sènni là b'a Boaze.

²⁰ Naomi tshob nzwimén i ndù: A bwô ndù Tshùaben yab kàn, ntam ntse mèn z'a be ngakondèn num benntùn mba ben tse bo kwù là. Naomi bèn ntshob yi ndù: Yen mandum nà b'a mo' ndu be. A b'a mèn netèt ben tse bo ghù nelo' be fôg là.

²¹ Ndùlala Rut ngon Moab tshob màndu i ndù: A tshob me mba ndù me tam njam ghafa' tse tà nkum ndùse bo miagte netsho' tshu ntùm ze nà fa là.

²² Naomi tshob nzwimén i ndù: Ngon àm, a bwô ndù o ke ntum bin à ghafa' tse tse bènnzwi, ndù k'o nèn ntùm mo' nà ghua bo tsho ngùtni o.

²³ Ndùlala Rut tam njam ghafa' Boaze tse bènnzwi, neke ntswitte ntsha' nsa mba ngefele, tà nkum ndùse bo miagte netsho' tshu là. Rut nke ntswe be bo màndu i.