ṄWA'NI OSÉ 8 - NTSHOB NSI

Mèn z'a ywit fetmbaṅ nà mb'a nsi tsho' fùm

¹ Te nta ntshu o. Ngakeban vù ntùm ngô Tshùaben ndaṅndaṅ mba ghammàtat là, nummbe bo bagte kàn sàm, mfàn ntshù' àm.

² Bo nsi kua' ntùm ntoṅ màm ndù: Nsi àm, bag ba Israél lèn o.

³ Là Israél lo gha numebwô, ghakeban nsi bwe i.

⁴ Bo lo ghom fenfen ts'a tô yub là ke bètt'àm, nte kamkam me ke lèn. Bo lo' nkàb yub mba gol yub nabte nsi neto yi tse me nsi biagte yub là.

⁵ Samaria Tshùaben ghua' yu mén mfô z'o lo' gol nabte yi là. Bin kwé'te mbwôg num yantù àm. Bin nsi ghô ntùm mfànnu be ke ku'ni netum bwe tà nkum à ndùke?

⁶ Israél a b'a ngave bèn nabte mfô Samaria, a ke' b'a Nsi. A ndùlala bo nsi be't'é mfémfé.

⁷ Mba bo ywit fetmbaṅ nà bo nsi tsho' à fùm. Ngefet z'a ke' bit là ke fà bàn. A be z'a fà mba nefà là mba ba tum bèn jù.

⁸ Bo sate Israél. Bo be ndonni à netèt ntumntum, mbe ndaṅndaṅ mba kab z'a tsit là.

⁹ Nummbe bo ko' nèn Asiria, Efraim tsin njam mba kekwèn tshwèt là; bo fà nda' ndo' nka shun yi.

¹⁰ Mba mba bo fà nda' ntumntum nà, ngelaṅ ku' mba me nsi tse'te yub là. A tù' mén nda'nda' mba bo nsi yen nge' num ju neket ze mfen fenfen nsi ghù a lèt num bo là.

¹¹ Efraim na' bom ntômbwôg le'te Nsi num nebiagte nukebwô yi a yàm, là, a kaṅ ntù' ntômbwôg nele'te Nsi be num neke ngù à be nukebwô.

¹² A be ze me kite ntag ntshù' àm yi, a yàm be ndùke lo là, mb'a lo' njoṅ i fa mba ju z'a fe à ngùn nà.

¹³ Bo num nkô nezwite ba nyàm nde't'àm yi, nummbe bo kô nefèt mbàb yub. Là, Tshùaben ke' bam tshen tshu là; ndonni a kwimte mfànnu mube, a naṅ ntsha tu bo num nukebwô tshobe. Mba bo là, me nsi ghù ndù bo bèn njam mà Egipto.

¹⁴ Israél lagte nganabt'é, nke nkut màmà mba'. Mbe se' mba Yuda là, a nke nkut màmà ngô ndùbndùb tse neta. Là, me nsi ma' mbwôg num tshen ngô là, a kù mba' mi fafa.