ṄWA'NI OSÉ 7 - NTSHOB NSI

Nekag kamkam boa fenfen

¹ Ndùse me ke nkô neyate Israél là, nukebwô Efraim bo tshùagntù Samaria yoṅ ntswite wut tshobe, nummbe bo lo lo' à tatte ngù nu yi. Ba tshô tsho ntùm ndà ndà, fimntshu tsho ntùm njoṅ dù' fa mum ngô mba num njoṅ manze fa.

² Bo ke' be kwate tshob ntù bo ndù me num nkwimte njoṅ tshùagntù yub fa. Ngùninu mub lam yub ndonni mbume, ngùninu mub b'a num miag màm.

³ Bo num ndem tshùagntù tse bo ghù là, nke ngù fenfen nke ntsiaṅte. Tatte tshob nke ngù kamkam tshob nke ṅwate.

⁴ Njoṅ yub fa b'a ba ghù màndà. bo be ndaṅndaṅ à mba tômbwôg ngaka tag z'a kwé'te mbwôg bwe là. Yen mèn ni be tsin ke bèn nefette mbwôg neto' ndùs'a tébte mbab bàn nà, tà nkum ndùs'a ko' là.

⁵ A num mbe mum lé'njù mfen yub, kamkam tam ngokét, njam ndu' bo nu ke njoṅ i là; mba' ndu' nke nzwiaṅte ghatshùag.

⁶ Ntù mfùm nke nkù mba mbwôg neka tag là, tèttswe' a fite, njù be làne a kù mba mbwôg nga là.

⁷ Njoṅ yub fa dum à mba tômbwôg là, bo be nkù tshob ghatsho'te. Njoṅ fenfen tshob fa vù nsi, sàm mèn netèt bo ke kua' ntsiaṅ àm.

⁸ Efraim tsho netèt tsemo' ngô, Efraim b'a mba makela' bo ka ke kaṅ njam i là.

⁹ Ba tum lo' ze neta fa, nda' ndù a ke lèn tse; mba ywèn à tsho num i, nda' ndù a ke lèn tse.

¹⁰ Ze ko'tewut ba Israél ghù kwénta kebwô num bo, là, bo ke' bèn njam ntèt Tshùaben Nsi yub, bo ke diag i num njoṅ yen nu là fa.

¹¹ Efraim b'a mba bwoṅtambia' z'a fùmni là, ke ghù zenu, bo tsiaṅ Egipto, nèn Asiria.

¹² Ngelaṅ ze bo tshwèt nèn nà, me ma' fot sàm num bo, nsoṅ yub yi bo swe' mba saṅ s'a swe' kamànyam nà; m'a' naṅ ntsha tu bo ndùse bo yoṅ ntshob nu mbumte yub là.

¹³ A bwô bo be ghayennge', nummbe bo tshwèt nkù àm, a bwô nu fam yube, nummbe bo gha àm. Tu wul àm me lo ghù netshu' yub ngelaṅ ze bo tshwèt ntshob be tatte num àm nà ké?

¹⁴ Bo ke' kua' me ntùm ntù nenùn, ngelaṅ ze bo tshwèt ntsiaṅ àm ndù me ywimte yub là. Là nke nzimte num nkunndà mube, a num mbe num nsa bo ndu' nedùmte bo vèn wut tshobe, ntù' ghatatu mbwe àm.

¹⁵ Là, tu wul àm lo tswite yube, nso neta ntùm mbu mube, mba ndùlala bo kwate be nukebwô num àm.

¹⁶ A be ze bo bèn njam nà, mba bo ke bèn njam nse' a mbaṅ àm; bo b'a ntshu ntsho z'a be mfùte là. Kamkam tshob nsi kwù ṅwi ntsho, nummbe lém sob num ntshob tshùagkèt ntshobe. Yen ni b'a kua' nu z'a nsi ghù bo tù' ju komzwi mbwe ngô Egipto là.