ṄWA'NI OSÉ 5 - NTSHOB NSI

Nenaṅ ntsha

¹ Bin ju' yen nu li, me ghale'te Nsi, bin yab ntù zin bwe me tunndà Israél, bin tsho' ntoṅ min, me tunndà mfen, nummbe nesa' kam lôt'a bin. Tshù bin lo tù' à ywi' num ba Mitspa, mbe nkù ze bo bùn num mbat Tabor là.

² Bo tswe' belaṅ mà Shitim a tsho neshu. Là tu wul àm tshwèt nabte nenaṅ ntsha tu njoṅ yub fa.

³ Tu wul àm me lèn Efraim, Israél ke' lemte num miag màm. Ndonni z'o tswite Efraim kat là, Israél sagte wul i.

⁴ Mfa' mub ke tshwèt mbam ndù bo bèn njam mbaṅ Nsi yub, nummbe ywèt kat taṅ nga netèt bo, bo ke lèn Tshùaben.

⁵ Ka'te Israél ghù kwénta kebwô num i, Israél bo Efraim nsi tiag njam nukebwô yub vù nsi, mba Yuda tiag, bo à bo!

⁶ Bo nsi lo' nyàm tshob tse nke'nke' mba tse ndùbndùb nèn diag Tshùaben yi, là bo ke nsi fon i, nummbe a tam yub ngua'a.

⁷ Bo lo gha Tshùaben, nummbe bo bwe bon ntshundà; a ndùlala, a nsi sate yub boa nà tshob nda' ta' maṅwù.

⁸ Bin tô medub mà Guibéa, ntô nta mà Rama, bin tshag nze zin tù mum tshu'te mà Bét-Avèn; bo te njam o me Benjamin!

⁹ Bo nsi sate Efraim mum lé'njù nenaṅ ntsha. Me tshwèt ntshob nunenùn netèt tse tunndà Israél.

¹⁰ Fenfen Yuda b'a mba ben tse bo tshwèt nga'te yub ndù ngô là; me nsi fètte yantù àm num bo mba ntse là.

¹¹ Bo fètte Efraim, a bagte nu ndaṅndaṅ, nummb'a bagte ju banban kà nke ntsiaṅte;

¹² tu wul àm, me b'a mba mbànnzin nà num Efraim, mbe mba mfànni là num tunndà Yuda.

¹³ Efraim yen ngokèl i, Yuda yen keko' se; a ndùlala, Efraim nèn Asiria, ntum mèn mbaṅ mfen ndùb; là, yen mèn ni ke' ku'ni neyate zine, ke ku'ni netshwinte keko' sine.

¹⁴ Tshù, me b'a mba nzwimàntô là num Efraim, mbe mba mén ngwayit là num tunndà Yuda. Tu wul àm, me nsi sé'te, nène, lo' nèn yi, sàm mèn ke ku'ni neyôg yub mum mbu màm.

¹⁵ Me nsi nène, bèn njam num yàm dù', tà nkum ndùse bo lèn mfànnu mube, ndiag se àm nà, tà nkum ndùse bo tsin ntùm nge' yub ndiag àm nà!