ṄWA'NI OSÉ 2 - NTSHOB NSI

Lé'njù ndùb Yesréel

¹ Mba ndùlala, bon Israél nsi yàm mba nkwango' mi a dibantse là, be mèn ke ku'ni nefi'i, ke bèn nsiaṅ i; bo nsi tsiaṅ yub ndù bon Nsi z'a be ntùn nà, ntùm dù' ze bo tshwèt ntshob bo ndù: Bin ke' b'a yàm nzwit mèn nà:

² Bon Yuda mba bon Israél nsi kùmte, tamte ghom yub mfen. Bo nsi tô ngô. Nummbe se lé'njù Yesréel nsi b'a se ndùb.

³ Bin tsiaṅ fèt tsin tse bandum ndù: Ammi nzwil àm, ntsiaṅ fèt tsin tse bènnzwi ndù: Ruhama, mènnzwi ze bo ko ndèn mi là.

⁴ Bin bote mà zin, Israél bin bot'é, nummb'a ke' b'a nzwi àm, me ke bèn mbe ndu i, ndùlala ndù a kag ntshù kat z'a num miag mi là nsi, nkag tshu kwiwut mènnzwi ts'a be num i là nsi,

⁵ mbwôg ndù kà me sô nzwe num i, nte i tù mba lé'njù s'a tum bam màab là; mbwôg ndù kà me ghù a tù' mba kônkwa, ngù a tswe mba tsha' njum nà, ngù a kwù nzi ntse.

⁶ Me ke nsi ko ndèn bon tse, nummbe bo b'a bon kat,

⁷ nummbe mà yub kat; mènnzwi z'a jùm yub là bagte wul i ze tu. Nummb'a tshob ndù: A bwô ndù me tam njam màndà tshàm, tse bo be mfà yàm bàn mba ntse, mfà tshàm nzwe, mfà màm mfèt mba màm ndu' là.

⁸ A ndùlala m'a' te njô num manz'o, nkut kàb bwe, ndù k'o bèn njen manze tsho.

⁹ A nsi kù nde njam màndà tse ke kote yube, a nsi diag yube, là ke fon yube. A nsi tshob yen ngelaṅ nà ndù: A bwô me bèn njam mbaṅ mbwe ndu àm, nummbe me lo be mebwô ntshùa ndonni.

¹⁰ A lo ke lèn ndù me na' mbèn nke mfà nsa, ngefele, mba mfèt nswe yi, ke lèn ndù me na' mbèn nke mfà nkàb yi mba gol. Bo lo lo' nkàb là mba gol nabte Baal yi!

¹¹ A ndùlala me nsi se'e, bèn lo' nsa màm num ngelaṅ i, lo' ngefel àm num ngelaṅ i; lo' ndu' màm num ngelaṅ i; me nsi kwé nzwe tse me fà bo, nzwe ts'a bwô ndù a bomte wul i yi, ke be tunntôg là.

¹² Ndonni m'a' ghù ntam tuswe tu i, num miag màndà tse, sàm mèn ke nsi tshu' i mum mbu màm.

¹³ M'a' ghù ze tsiaṅte, tse jùa, tse jùa ṅwù, tse jùa ngabnjù mba njoṅ tse mbumte fafa ke bèn mbe.

¹⁴ M'a' sate nkùa i, nsate nten mi, tshu ts'a be ntshob num bwe ndù: A b'a tshu tshàm, mbe nda' ze màndà tshàm fà me là. M'a' lo' njoṅ i fa nkaṅ fèn yi, nyàm tshwèt sate njoṅ i fa.

¹⁵ Me nsi naṅ ntsha tu i mum lé'njù ts'a ke nton labinda Baal mb'a ke nso kwa, nso mba'ntoṅ, ntam njam màndà tse, ndagt'àm nà. Tshùaben bèn ntshobe.

Lé'njù nekom kàn

¹⁶ A ndùlala, m'a' yo't'é nèn yi kônkwa, ntshob nu ntù i;

¹⁷ me nsi fà nkùa tse yi, m'a' kaṅ tômbo' Akor a tù' nzendà ywimte yi. A bwe là z'a nsi bùnte nu, ndaṅndaṅ mb'a na' mbe ntùm tse lé'njù ngon, mba mum lé'njù ts'a ke nko' mà Egipto là.

¹⁸ Tshùaben tshob ndù: O nsi tsiaṅ àm ndu o mum sen lé'njù là, ke bèn netsiaṅ ndù tàbu' àm.

¹⁹ M'a' sô ndèn Baal ntshu i, bo ke nsi bèn tsiaṅ yub lén sobe.

²⁰ M'a' wat kàn num yub tu ntùm sen lé'njù là, bag à nyàm tshwèt, nsaṅ mfe kamànyam, nyàm tse bo be nsoṅ bam sob nsi num nsitsha' là; me nsi biagte ngoṅkét, ṅwi mba ntsho ntùm ngô, ndù benntùn tswe ntùm ngô fite, ke ke mbwôge.

²¹ M'a' ka o num yàm tu matmat, nka o num yàm tu ntùm nenùn mba nu ndaṅndaṅ, nka o ntùm kondèn bo tshàmndèn.

²² M'a' ka o ntùm ntshu ntshù' ndù o lèn Tshùaben.

²³ Tshùaben tshob ndù: Me nsi bùnte bo mum sen lé'njù là. Tshùaben tshob ndù: A nsi be mum sen lé'njù là me bùnte nu num ju z'a tshwèt ntoṅ ben tshàm ba Israél là.

²⁴ Tsha' nsi bùnte nsa, ngefele, mfèt nswe, bo bùnte yub Yesréel.

²⁵ Me nsi ywile, te mén bo ke' kô i là ntùm ngô num yàm tu, me nsi ko ndèn mi. Me nsi tshob ghua' mén ndù: O b'a yàm nzwit mèn, tu wul i tshob ze ndù: O b'a yàm Nsi.