ṄWA'NI OSÉ 11 - NTSHOB NSI

Israél ke' lèn numebwô mba kondèn Nsi

¹ Ndùse nshum àm Israél na' nke' nguanmèn nà, me nke nkô i. Me lo tsiaṅ i, ndo' i ntum yi mà Egipto.

² Me lo tsiaṅ Israél bo nèn ngùanesà mbaṅ àm, nèn nefà tshule'te neghamte Baal yi, nton tshu nelamte tsham ba neto.

³ A b'a kua' me na' mbèn nzi'te Efraim nezine, nke ntshùb yub mum mbu màm. L'a ke lèn ndù me ke ntshwint'é.

⁴ Me lo ke ndo' mfèt tse nebotte nsoṅte yub yi, ndo' à ndeb nkôni nsoṅte yub yi. Me lo be bo à mba mén tà z'a lo' kele' mbaṅ ntshu bo là. Me lo ke mbag wul àm nsi, mfà jujù Efraim.

⁵ A ke nsi bèn mà Egipto, là mfen Asiria nsi bèn be ze mfen, nummbe bo gha nebèn njam ntèl àm.

⁶ Ṅwi nsi fe ntùm ngô, a nsi bagte, sate mub mfùnndà, num nkwate mi bo ghù ntù bo là.

⁷ Ben tshàm to' nenèn ngùanesà mbaṅ àm, bo tshwèt ntsiaṅ yub ndù bo bèn njam ntèt Nsi yub. Là sàm mèn netèt bo ke bùnte.

⁸ Efraim me nsi ghua' o à ndùke, me swèn o neswèn ké? Me nsi ghua' o mba Adma l'a ndùke? Me nsi ghù wù ndaṅndaṅ mba Tseboïm nà ké? Ntù àm tshwèt ntam ntùm bwe. Njoṅ yàm kondèn fa bù' wul i nsi.

⁹ Me ke nsi ghù à ndaṅndaṅ mba ntù àm lo' nja yi là, me ke nsi bèn sate Efraim; nummbe me b'a Nsi, ke b'a mènntùn. Me b'a Mèn Nelàn netèl o, me ke lo' à yantù ntsho yi.

¹⁰ Bo nsi tam njam Tshùaben, a nsi tshu' mba ngwayit là, nummb'a nsi tshu'u, bon tse lo mà dibantse nkù nde nse'e.

¹¹ Bo nsi kù nde fe Egipto mba saṅ nà, fe ngô Asiria mba bwoṅtambia' là. Me nsi ghù bo tswe ntùm mba' mub mi mebwô. Tshù ju ze Tshùaben tshob là.