ṄWA'NI OSÉ 1 - NTSHOB NSI

Ba Israél nke ngamte neto

¹ Yen ṅwa'ni li ghù ntshob mi Tshùaben na' ntshob Osé, nshum Beéri num ze ngelaṅ Ozias, Yotam, Akaz, Ezékia, fenfen Yuda, mba num ngelaṅ ze Yéroboam, nshum Yoas na' mbe mfen Israél là.

² Mbwe nu ze Nsi tshob là, b'a num tunndà ngatshob ntshob Nsi Osé. Tshù mba Tshùaben to' netshob nu ben tse ntshùa num Osé là li: A tshob yi ndù: Nèn ndà nsi Baal ndo' kattù mènnzwi bwe nso, mbwe bon kat bin yi, nummbe ngô tshwèt nkale, mbe ndù a kaṅ mvèn i ntam me Tshùaben yi.

³ Ndùlala Osé nèn ndo' Gomer, ngon Diblaïm nso. A jùm, mbwe mén mandum yi.

⁴ Tshùaben tshob Osé ndù: Tswi lén se ndù Yesréel, nummb'a tù' metsit ngelaṅ me naṅ ntsha tu tunndà Yéhu num lem ts'a fètte mà Yesréel là; me nsi ghù ndù ze nufen tunndà Israél mi i.

⁵ Me nsi be'te ze ngoṅkét Israél mum sen lé'njù là mà tômbo' Yesréel.

⁶ Gomer bèn njùme, mbwe mén mènnzwi. Tshùaben tshob Osé ndù: Tswi lén se ndù mèn bo ke' kô i là: Lo-Ruhama; nummbe me ke nsi bèn ghù kondèn num tunndà Israél. Me ke nsi bèn ko ndèn mi.

⁷ Là me nsi ko ndèn tunndà Yuda. Me nsi tshùa num Tshùaben Nsi yub yôg yube, Me ke nsi tshùa à njam ntshu ntsho, ngoṅkét, ṅwi, ntsho, ba nyàmdiaṅ ke ghako' nyàmdiaṅ lo kà yôg yube.

⁸ Ngelaṅ Gomer tsho' mén bo ke' kô i num bùn nà, Gomer jùm, mbwe ta' mén mandum.

⁹ Tshùaben tshob Osé ndù: Tswi lén se ndù: Ghua' ju Lo-Ami; nummbe bin ba Israél ke' bèn mb'a ben tshàm. Tu wul àm me ke bèn ne mbe sàm ju bin.