ṄWA'NI AGÉ 2 - NTSHOB NSI

Bwô ndà Nsi

¹ A be mum lé'njù ntshob ntshù' ṅam mbàa ntùm ṅwù sammbàa ntùm mbatte ngu'njù bàa mba Darius jù fen nà, Tshùaben tshùa num ntshu Agé, ngatshob ntshob Nsi ntshob men ntshob li ndù:

² Tshob Zorobabél, nshum Salatiél, ngomna Yuda, Yoshua nshum Yotsadak, ngale'te Nsi ze ndùb bo tshé' ngô ndù:

³ We z'a tù' netèt bin z'a na' njen yen ba' li ntùm ze mbwe ghamt'à? Bin ke njen i ndonni à ndùke? Mb'a be ndonni là ke' tswe à mba ju banban nà num miag min ké?

⁴ Tshùaben tshob ndù: Lo' neta ndonni me Zorobabél! Lo' neta ndonni me Yoshua, nshum Yotsadak, ngale'te Nsi ze ndùb! Tshùaben tshob ndù: Njoṅ ngô fa lo' neta. Bin fa'a, nummbe bag bin bèn mbe, Tshùaben tàndà ntsho bèn ntshob ndùlala.

⁵ Me ke' à mèn nenùn num kàn se bag bin wat, ndùse bin tum mà Egipto là. Ywèt tshàm be ntswe netèt bin, kà bin bwôg!

⁶ A tù' mén nda'nda', me nyi'te kamànyam bo tsha'a, nyi'te dibantse mba ju njum;

⁷ m'a' nyi'te njoṅ ngôngô fa; tshunkàb njoṅ ngôngô fa nsi se'e, me lo'o, nso ghamte yi num yen ndà li a dune, Tshùaben tàndà ntsho bèn ntshob ndùlala.

⁸ Tshùaben tàndà ntsho tshob ndù: Nkàb b'a yàm, gol be yàm.

⁹ Ghamte yen miagte ba' li nsi be ze ndùb tshùa ghamte mbwe ba', Tshùaben tàndà ntsho bèn ntshobe; me nsi fà fit'a num yen dù' li, Tshùaben tàndà ntsho bèn ntshobe.

Nsi ka' nenaṅ mbotni

¹⁰ Mum lé'njù ntshob kuà ṅam mbàa ntùm ṅwù bwe'e, ntùm mbatte ngu'njù bàa mba Darius jù fen nà, Tshùaben tshùa num ntshu Agé, ngatshob ntshob Nsi ntshob ndù:

¹¹ Tshù ju Tshùaben tàndà ntsho tshob li: Tàmte yen nu li, mbètte ghale'te Nsi num nu ntshù':

¹² A be ze mèn ma' mbàb ze bo yab num jule'te Nsi bam kum se, ndo' kum se là nkwag bàn yi, tshujù, ndu', mfèt ke mo' tshaṅ jujù lo là, mba tshen tshu là ku'ni yub netù' jule'te Nsi ké? Ghale'te Nsi bùnte ndù nga!

¹³ Agé tshob ndù: A be ze mèn z'a sagte wul i mb'a kwag fe mèn, kwag tshen tshu là là, mba tshen tshu là sagte ké? Ghale'te Nsi bùnte ndù: Mba tshen tshu là sagte.

¹⁴ Ndùlala Agé bùnte ntshob ndù: Tshùaben tshob ndù: Yen nzwit mèn ni, yen ngô li b'a ndùlala mbwe àm, njoṅ mfa' mbu mub fa be be ndùlala; ju bwôntù yub be z'a sagte là.

¹⁵ Ndùlala bin lôte ndonni njene, neto' sènni mba lé'njù ts'a tshwèt nse' là. Bin na' mb'a ndùke ndùse bo na' mbe ke yoṅ njab loṅ num loṅ num ndà Tshùaben n'à?

¹⁶ Mèn lo ke nèn num tse ju z'a ghù ju ṅam mbàa là, ntèt nda' gham; ndùs'a nèn ntùm tshaṅ ntse ṅwat ntse bwe ntu' ṅam ntàn nà, a tèt nda' ṅam mbàa.

¹⁷ Me lo lo' bangùa mba kwitshu' bo nywinmbaṅ mbagte mfa' mbu min yi, mba ndùlala bin ke' bèn njam ntèl àm. Tshùaben bèn ntshob ndùlala.

¹⁸ Bin lôte mebwô ndonni njene; neto'te num tshu ts'a tôge tà nse' nkum sènni là, mba tshu ts'a nsi se' num mbatte lé' ntshob kuà ṅam mbàa mum ṅwù bwe'e là, fe ngelaṅ ze bo na' nkut ndà Tshùaben nà, bin te tu zin bwe kua' mebwô!

¹⁹ Mo' nzwit ju to' bèn mbwoṅ bin kàndà ké? Bin lôte njen a be ze nkùa, tù mbatsi, tshom bo ten ke' bèn ngù ntàm nà. Fe sen lé'njù ze bo kut ndà Tshùaben nà, me Tshùaben Nsi naṅ mbotni num bin.

Nebagte ghakeban bo nebù' Zorobabél tù

²⁰ Tshùaben bèn ntshob Agé mbatte yoṅ bàa mum lé'njù ntshob kuà ṅam mbàa ntùm ṅwù, ntshob ndù:

²¹ Tshob Zorobabél ngomna Yuda ndù: Me nsi nyi'te kamànyam bo tsha'a.

²² Me nsi kamte ndiaṅkwa fen nzenze, sate neta fen ngôngô; me nsi kamte nkalige, mba ben tse bo ko' num bwe là; me nsi ma' nyàmdiaṅ bo ghako' nyàm nsi, mba we lo nsi lo' ṅwi zwi mfèl i yi.

²³ Tshùaben tàndà ntsho tshob ndù: Wù Zorobabél, nshum Salatiél, me nsi lo' o mum sen lé'njù là, wù ngafa' àm, Tshùaben bèn ntshob ndùlala; me nsi lem o mba kwa là, nummbe me lo tsho' o, Tshùaben tàndà ntsho bèn ntshob ndùlala!