Nsindàvù 5 - NTSHOB NSI

Nge' ndonni mba nekwimte nge' ts'a na' ntôg là

¹ Tshùaben, kwimte nu z'a tsho yag là! Lôte njen mba tuswe ko yag njene!

² Ntsi' mag b'a bu ba mfàm. Mba' mag be bu ba tum.

³ Bag b'a bontse, mb'a bon ke tà. Mà tshag tù' b'a mba fôg bènnzwi là.

⁴ Bag be mbe nu ntse njune, bag ke njun ntshwèn à nejune.

⁵ Bo tshwèt nta' yage, ndù kele' num tô bag. Bag bot fa, fite ke be bag.

⁶ Bag tshag bu yag Egipto mba Asiria, nelon jujù ze bag jù là bwe.

⁷ Tà be lo ghù nukebwô, ke bèn nebe. A be bèn nke nket nge' nukebwô tshobe.

⁸ Kuan tshwèt ntô yage. Sàm mèn ke' tshu' yag ntùm mbu mube.

⁹ Bag ke ntù' diag yag jujù à bu vùkob, mb'a mbwe ṅwi z'a kônkwa là.

¹⁰ Ngub wut yag ke nton à mba lagmbwôg neka tag yi là, mbe ndùlal'a num tonte nziku' z'a num bag là.

¹¹ Bo lo lo' bènnzwi ntùm Sion, ngo' ngonngon bo ke' tabte yub là ntùm ntusô Yuda.

¹² Mbu mub lo taṅ kamkam tù. Bo ke ghù nku'ni ywèn benntùn.

¹³ Ghuan benntùn tshwèt nket loṅ masin, bônke' nke mfa'te bam ntsha' ntshwèn.

¹⁴ Ywèn benntùn ke tshwèt mbèn nèn nsém, ghuan benntùn ke bèn neyob nkwi mube.

¹⁵ Tsiaṅte lo mi tse ntù bag. Vù tù' bèn ndo' dù' tshu nenyiaṅe.

¹⁶ Kétmbùm z'a be tu bag là vù nsi. Nge' tu bag là, nummbe bag ghù nukebwô.

¹⁷ A be ze ntù tshag tshwèt njen nge', a be ze miag mag tam njam nà,

¹⁸ mb'a b'a nummbe bo sate mbat Sion, mb'a b'a ndù nka'ghun tshwèt nzin bwe.

¹⁹ Wù Tshùaben, o ke ntô à matmat. Diaṅkwa so ke ntswe à ngu'ngu'.

²⁰ B'o lagte yag matmat à numke, b'o ghua' yag ngu'njù yàm à numke?

²¹ Tshùaben, ghù ndù bag bèn nse' mbaṅ o, bag nsi se'e. Bèn mfà lé'njù bag mba mi a be mbwembwe là.

²² Ndù o nsi ghua' yag koṅkoṅ ké? O nsi ya ntù bag ke nèn à be mbwe ké?