Nsindàvù 4 - NTSHOB NSI

Nsindàvù num nu a tsho ngô là

¹ A ndùke! Gol ke' bèn neziag ké? Gol mebwô zwe' ké? Bo sate ndoṅ dù' nelàn num njoṅ ntôg manze fa.

² Kamkam bon Sion tse bo ke ndo' yub mba gol mebwô là, tù' b'a mba nkab tsha' là, nkab mi a b'a mfa' mbu ntetsha' là.

³ Mba kua' ba mbù tshwèt num nshù bùn bon tshob bo nyô. Là ngon yàm nzwit mèn tshùag neshu, ntù' b'a mba nsaṅ mbwe mi a kônkwa là.

⁴ Lém mfénfi lat num ntag mi, ndù nzi ntse ghù a jumte. Bônke' tshwèt ndon bàn, sàm mèn ke tum nefà bo.

⁵ Ben tse bo ke njù mbwômbwô tshu là tshwèt nkwùte num ba manze. Ben tse bo kwiagte yub ntùm nzwe ndob là nke nô num bwembwôge.

⁶ Ze nevù ntsha ngon yàm nzwit mèn ghu' neshu, ntshùa ze Sodom ze bo na' nsat'é kua' num ngualag là. Sàm mèn lo ke nenjab bu num i.

⁷ Kamkam tse bo ke nziag ntshùa nywinmbaṅ, mfôg ntshùa mbùn. Ntshù mub lo ke mbwô ntshùa mbùn. Se yub nziag ntshùa loṅ fôgtab

⁸ Ntshù mub sèn ntshùa njam njù. Bo ke' be lèn yub num manze. Ngub wut yub lat num mvôg mube, ndù a jum mba ntshwèn nà.

⁹ Ben tse bo kwù ṅwi là b'a ghafen, ntshùa tse nziku' nsi bèn zwi yub là. Bo mit'a be nda'nda' num tsha' ke fà ntàme.

¹⁰ Bènnzwi tshwèt ngù bo na bon tshobe, mba mba bo kô yub neshu là. Bon tù' jujù bo netèt yen nesate dù' li ze ngon yàm nzwit be ntùm bwe là.

¹¹ Tshùaben lo sô yantù i fa, a lo sa tonte yantù i. A te ta' mbwôg Sion, a tshwèt nkù ntun mba' fa.

¹² Fenfen nsitsha' lo ke ghù nebame, sàm mènntùn ntùm njù li lo ke ghù nebam ndù be ngamaṅte, ngakeban tsho ntùm tse nzendà Yérusalém.

¹³ Tshù ntàm nukebwô ghatshob ntshob Nsi tse là. Tshù ntàm mfànnu tse ghale'te là. Bo lo fètte lem ba mbu' netèl i.

¹⁴ Bo lo ke ntsha num manze mba ba mfùmiag là, ndù bo bum lem. Mèn lo ke ghù nekwag nzwe tshobe.

¹⁵ Bo lo ke nkua' ntshob bo ndù: Ben nesagte, bin nèn ngùanesà, bin tsin ngùanesà, kà bin kwag yage, bin tsin tà ngùanesà. Bo tshwèt nkù, nke ntsha nèn bag bag. Bo be ntshob netèt ngôngô ndù: Bo ke nsi bèn ghù yub dù'ntswe.

¹⁶ Tshùaben sate yub ntùm yantù i, a ke' bèn nekaṅ wul i ndôte yube. Mèn lo ke ghù nku'ni ghale'te, ke ghù kondèn num ywèn benntùn.

¹⁷ Miag mag lo ke nke' ntshùme, bag nke mbéb ywimte. Miag mag nke nywinte, nke ndôte ta' ngô z'a na' mbe ke tshu' yag là.

¹⁸ Bo lo ke nya' nku mage, num netshètte yag ndù kà bag nèn num tshag dù'. Yag nemiagte lo ghebte, tshag lé'njù lo ku'u. Yag nemiagte lo kum dù' i.

¹⁹ Ghatsho' nku mag kebàn lo fùag wut ntshùa ba sa'mbu' mfe tù. Bo lo yoṅ yag num tu ba mbale. Bo lo bùn yag num kônkwa.

²⁰ Ngayo' mfèt Tshùaben, z'a na' nke ngù bag nzwiag là lo vù ntùm ngem mube. Bag lo ke ntshob num i ndù bag nsi yôg à bam netshaṅ i netèt ngôngô.

²¹ Ngon Edom, tsiaṅte, be ntùm ṅwate. Nzwi ngô Uts, bo nsi lo' ntu' tshùa yi mba mbaṅ o yu. O nsi bum i, bo tèl o tù tunntôg.

²² Ngon Sion, mu mfànnu tsin ndùlala. Mfànnu mu ke bèn netshag o ndà kuan. Ngon Edom, ntsha vù tu o num mfànnu mu. A nsi bù' fu num nukebwô tsho.