Nsindàvù 3 - NTSHOB NSI

Nge' bo fite ntù

¹ Me b'a mènntùn z'a yen nge', tun shua' yantù i là.

² A lo tshagt'àm, ndo' àm nèn yi ntùm njame, ke b'a ntùm nelàne.

³ A lo bù' i nsi num àm, nkaṅte bu i mbèn nkaṅte njoṅ lé'njù fa.

⁴ A lo zwi mbàb àm bo ngub àm, a lo be'te mvôg màm.

⁵ A kùmte tsheb bo ya ndiaṅ àm yi mbume.

⁶ A lo ghù me tswe ntùm njam mba ben tse bo na' njà kwù là.

⁷ A kut dù' ndiaṅ mbume, netshètt'àm ndù kà me tum. A lo' ntshan mi a lèt là ntaṅ àm yi.

⁸ Me lo kua' tà, mbèn nde'te num ywimte, là, a ke bam ndù yàm le'te tam toṅ i.

⁹ A lo' ndoṅ mi bo tshua'te, a sag là mfùn manz'àm yi, a sate ntshagnze màm.

¹⁰ A na' mbe m'a mba mbù tshwèt mba ngwayit z'a be ntùm dù' nelemte là.

¹¹ A lo kaṅ taṅ manze tshàm, a lo sé't'àm. A lo ghua' àm.

¹² A lo taṅ ngoṅkél i, ndo' àm mba dù' z'a ma' se két bwe là.

¹³ A so nkét mi a ntùm mfe' nkél i là zwe' àm.

¹⁴ Me tù' à ju komzwi yàm nzwit mèn. Me tù' ju bo ghù njob tshob mba sit lé'njù lo là.

¹⁵ A ghù me ywèt zwentù, ngù me bum zwetshù'tshù'ù.

¹⁶ A lo' nkwango' mbe'te nsô màm yi, ndo' bwembwôg njo' àm yi.

¹⁷ O lo kwé fite me; me ke' bèn neghù fu'.

¹⁸ Me lo tshob ndù: Yàm neta mi tse, me ke' nenywinte num Tshùaben.

¹⁹ A num mbe ndùse me kwimte nge' àm bo ngùtni àm nà, tsheb bo zwetshù'tshù' dun ntù àm.

²⁰ Ndùse ntù àm kwimte tshen tshu là là, a yub ntùm wul àm.

²¹ Là, tshù ju ze me nsi yab ntù àm, ju z'a nsi ghù me ke nywinte li:

²² Bwôntù Tshùaben ke' à be yàme. Tse kondèn ke' yoṅ mi fa.

²³ A ke mb'a be nswenswe mba zit nkebnjù lo. Tshù, yu nenùn zi neshu!

²⁴ Ntù àm tshob ndù: Tshùaben b'a màm ntsi'i. A ndùlala m'a ke nywinte num i.

²⁵ Tshùaben be ngù bwôntù num mèn z'a be ndiag i là.

²⁶ A bwô nebéb ywimte Tshùaben ntùm ntshu mi'i.

²⁷ Mebwô be mènntùn neket se kele' à ndùs'a ke' nguanmèn nà.

²⁸ A bwô ndù mènntùn tum ntsin tù' i, ke tshobte, ndùse Tshùaben yèn yen nu là yi là.

²⁹ A so ntshu i ntùm mbabe. Be mo' ndù nenywinte ke ke' yi ké?

³⁰ A nsi la'te toṅ i mèn z'a tshwèt ndab i là, a nsi ywèt tuswe.

³¹ Nummbe Tshùaben ke ke ngua' à matmat.

³² Là, a num mbe ndùs'a ghùtni là, a tshàm ndèn, nummbe kondèn i b'a ze ndùb.

³³ Nummb'a ke bèn nke nkô nenyu' mèn mfà nsi, ke neghùtni bon benntùn no.

³⁴ Ndùse bo tshwèt nyiaṅte kuan ngô nku là,

³⁵ ndùse bo tshwèt nte ku tu ze nunetsin mèn ndùla' mbwe Mèn z'a tà mfe tù là,

³⁶ ndùse bo tshwèt mbùn ntsha mèn kebwô ndù nu i bwô là, mba Tshùaben ke tshwèt njen ké?

³⁷ We z'a ghù nebam mbe nu be tum ndù Tshùaben ke' lèn nu bwe à?

³⁸ Mèn z'a tà mfe tù là ke bèn nke nkô kà ba kebwô boa mebwô mbe ké?

³⁹ Be mènntùn nke ndab wul i à numke? A bwô mba we lo lab wul i à num tse ko' nukebwô.

⁴⁰ Be bèn ndôte tse be manze ntswe' ntun num bwe, mbèn njam ntèt Tshùaben.

⁴¹ Be tshag ntù be boa mbu be tù, mbaṅ Nsi z'a be kamànyam nà, ntshob ndù:

⁴² Bag lo ghù nukebwô, bag lo be ghatatu! O lo ke lagte bag.

⁴³ Ntùm yantù o, o lo leme, njab njam bag, nta' yage, nzwite yag ke ko ndèn.

⁴⁴ O lo' ndot ndam wul o yi, ntshètte ndù kà le'te yag zin nkum num o.

⁴⁵ O lo ghù bag tù' ju newage, ju banban netèt ntumntum.

⁴⁶ Njoṅ ghakeban tshag fa tshwèt nso ntshu nsi num bag.

⁴⁷ Mag ntsi' na' ntù' b'a bwôg bo gheme, nesate dù' bo fam.

⁴⁸ Ba koṅntse tshwèt nswe' miag àm, num mba ngon yàm nzwit mèn b'a fam nà.

⁴⁹ Ntsenyà tshwèt ntum tu àm, ke tsin, ke fite.

⁵⁰ A nsi b'a ndùlala tà nkum ndùse Tshùaben tsin mfe kamànyam ndôte njen nà.

⁵¹ Lag sàm tshwèt nja àm, mb'a num njoṅ ngonngon sàm tusô.

⁵² Ben tse bo be ghakeban tshàm à banban nà lo ta' àm mba ta' saṅ nà.

⁵³ Bo lo kô nebiagte yôg sàm ntùm gheme, ndùlala ntamt'àm ndoṅ.

⁵⁴ Ntse lo dun tu àm, me nke ntshob ndù: Me bi yàm nà.

⁵⁵ Tshùaben, me lo tsin tun ghem ntsiaṅ lén su.

⁵⁶ O lo ju' nz'àm: Kà fùn ntoṅ mu num yàm netsham zwe bo nkua' màm.

⁵⁷ Num lé'njù me na' ntsiaṅ o là. O lo kù'te nse' mbaṅ àm ntshob ndù: Kà bwôg!

⁵⁸ Tshùaben, o lo tshètte njam àm, ntomte ntù àm. O lo sô yôg sàm.

⁵⁹ Tshùaben, o yen mba bo na' ngù me yen nge' là. Ghù nunetsin me.

⁶⁰ O lo yen njoṅ yagte mba' yub fa, njen njoṅ ntsham mub fa mi bo na' ntsin num àm nà.

⁶¹ Tshùaben, o lo ju' tshabte yub, njoṅ ntsham mub fa mi bo tsin num àm nà.

⁶² Nju' ntshob ghamaṅt'àm boa ntàmtenu mub mi bo ke ntàmte num àm mba sit lé'njù lo là.

⁶³ Lôte ndùse bo tswe nsi bo ndùse bo lo tù là njene: Me tù' b'a kwi ntshu bo.

⁶⁴ Tshùaben, o nsi fà nkàbfa' z'a ku'ni num mfa' mbu mub là bo.

⁶⁵ O nsi swèn yub ntùm sagntù yube, swèn yub ndon z'o so num bo là.

⁶⁶ Tshùaben, o nsi yab njam bo ntùm yantù o, o nsi biagte yub tun bam kamànyam.