Nsindàvù 1 - NTSHOB NSI

Nge' ts'a tsho Yérusalém nà

¹ A tù' ghua' ju ndù à ndùke? A tusô se benntùn ke njàm bwe mbwe li ké? A tù' b'a mba mfôg mènnzwi là, ndù a na' ke ntô ngôngô. Màbwengub ntaṅ ngô tsiag. A ke mfà ntshub à kekô nkô.

² A be nkua' njoṅ tèttswe' fa, ntsenyà yo' nge' mi fa. Sàm mèn ke' tum netèt tse ben ts'a ke nkô yub là mfite ntù i. Bo kaṅ ntù' ghakeban tse.

³ Yuda b'a tshwèt kùla' mb'a ntùm nefétte bo neta kuan ndùb; a b'a netèt ngôngô, ndù fite ke yi bwe; njoṅ benntùn fa tse bo num ntsho' nku mi kebàn nà lo ṅwag num i à ntùm nge'.

⁴ Tse manze Sion b'a nsivù, nummbe bo ke tshwèt mbèn nèn jù jùa; njoṅ tse nzendà fa b'a kônkwa; tse ghale'te fa tshwèt ntsham nzwe tse ngonngon tse bo ke' tabte yub là b'a ntùm ngùtni, ndù zwe dun ntù bo.

Nsindàvù Yérémia yob là

⁵ Ghafétt'é tshwèt njob ngu'u, tse ghakeban b'a ntùm fite; a b'a nummbe Tshùaben kôg i mfà nsi, mbe ndùlal'a num nukebwô tse ts'a yàm neshu là. Bon tse zin mba kuan nà mbwe ngafétte yube.

⁶ Ngon Sion bi nkuni mi fa; kamkam tse b'a mba ba njuanyàm, tse bo ke' be fon nenà, ntù' ke nkù mbwe mèn z'a tshwèt nta' yube, ndù neta bwoṅ bo là.

⁷ Yérusalém lo kwimte njoṅ fu' fa mi a be mo' ngelaṅ nà num tshen lé'njù kebwô bo nge' là. Ndonni ze ze nzwit mèn vù mum nkù ngakeban, mèn ke tum njwimt'é là, ghakeban tse tshwèt ndôt'é, nke nzwi mb'a vù là.

⁸ Nukebwô Yérusalém gha' mbu, ndùlala mba we lo tshwèt nyi'te tu num i. Njoṅ benntùn fa tse bo ke ngamt'é là yen i tù tunntôg, nto' newag i. Yérusalém tshwèt ntam keshù', nke nkaṅ se i.

⁹ Nesagte lo be num tun kun se, a ke ke nkwate mb'a nsi lo' miagte yi là. A vù kua' num mat netshàme, sàm mèn ke tum num nefite ntù i. Wù Tshùaben, yen nge' àm njene! A ke lèn ka'te li ze ngakeban ghù ntù i à?

¹⁰ Ngafétt'é nyit bu i num mba zit ju lo, z'a be ze tanjoṅ yi là. A yen ba tum nke ntsho ntùm dù' i ze nelàne, mb'a ba tum ts'o na' ntshù' ndù kà bo te ku ntùm yu mbumte là.

¹¹ Njoṅ ze nzwit mèn fa tshwèt ntsham zwe, nke ndiag jujù. Bo fà tshu tanjoṅ tse bo ghù là num jujù, ndù a tshùa ndùlala neta bèn mbe bo. Tshùaben, lôte njen mba me tù' ju banban njene!

¹² Me tshob à bin, njoṅ zin fa tse bin tshwèt ntshùa nsen ni là. Bin lôte njene, a be ze mo' ta' ya be bwe z'a fute yàm nà. Me dù à lèn ya ze Tshùaben lab àm yi là! Tshùaben lo ghùtni num lé'njù tonte yantù i.

¹³ A tsin mfe tù ma' mbwôg ntùm mvôg màm, a nke nkù i. A bùn nkù tun nku màm, a ghù me vù nsi njamnjam. A ma' àm ntùm nenywine, ntùm neke mbot njoṅ lé'njù fa.

¹⁴ Bu i bèn nkut kele' nukebwô tshàm. Nukebwô tshàm fa be ntamte nko' ntswe num kekol àm. A be' yàm neta. Tshùaben swèn àm mum mbu mi me ke' ghù netam mvèt bwe là.

¹⁵ Tshùaben biagte soyé tshàm fa tse bo be netèl àm nà. A kùmte ta' ntshu ntsho ndo yi nsi num àm, num nebiagte tshàm ghuan benntùn yi. Tshùaben tshab ngon Yuda ze bo ke' tabt'é là ntùm tshab.

¹⁶ A ndùlala ghù kà me nke nkua'a, kà ntsenyà nke nswe' tu àm. Nummbe mèn z'a lo mbe mb'a fite ntù àm nà b'a ngùanesà mbaṅ àm. A yi z'a lo mbe mb'a bù't'àm nà. Nshumnshum tshàm b'a ntùm nenywine, nummbe ngakeban yob ngu'u.

¹⁷ Sion lo ke nyit mbu, mèn ke fite ntù i. Tshùaben tum ghakeban tse bo diaṅ Yakob mbum nà num i. Yérusalém lo tù' ju fétwut netèt bo.

¹⁸ Tshùaben b'a mèn netsine, nummbe me lo ta tu num tshu ts'a tshob là. Ntumntum, bin ju' njoṅ zin fa, njen yàm ya! Ngonngon boa tshàm ghuan benntùn nèn ndà kuan.

¹⁹ Me lo tsiaṅ shun tshàm bo tatt'àm. Tshàm ghale'te boa tshàm ghakwé mbwe lo miagte nkwù à tusô: Bo ke ndiag à jujù, ndù a tshùa ndùlala neta bèn mbe bo.

²⁰ Tshùaben, lôte nge' àm njene! Nto màm tshwèt nkaṅte, ntù àm tum ntùm wul àm, nummbe me lo ta tu. Ṅwi yab nu njù, vùkob yab nu ndà.

²¹ Bo ju' mba me tsham zwe là, sàm mèn ke fite ntù àm. Njoṅ ghakeban tshàm fa ju' yàm nge'. Bo tsiaṅte mb'o ghù yen nge' là be là. Tu wul o nsi lo' lé'njù se bo be mba me là se' yi, tswi nkùn i.

²² A bwô njoṅ yub tshùagntù fa se' mbwe o, o ghù num bo mb'o na' ngù num àm, num njoṅ mfànnu màm fa là. Nummbe yàm netsham zwe gha' mbu, ntù àm b'a ntùm ntobni.