Netume 9 - NTSHOB NSI

Nge' mbatte tàn: Kuangab nyàm

¹ Tshùaben tshob Mosé ndù: Nèn ndà Faraon ntshob yi ndù: Tshù mba Tshùaben Nsi ba Héber tshob li: Faṅ yàm nzwit mèn nèn mfa' me.

² A be z'o ke nke' nga nefaṅ a nène, nke nke' nkô be netshùb i là,

³ mba bu Tshùaben nsi yab num tsho nyàm ts'a be tshwèt là, num nyàmdiaṅe, nkekwène, kamél, nyàmna' boa mbwe. Keya' kebwô nsi be.

⁴ Tshùaben nsi kabte tse nyàm Israél. Sàm ju ke nsi kwù netèt tse tshu bon Israél.

⁵ Tshùaben yab ngelaṅ ntshob ndù: Tshùaben nsi ghù yen nu là ntùm ngô ndamnjù.

⁶ Njù be làn Tshùaben ghù yen nu là. Njoṅ tse nyàm ba Egipto fa kwùte, là lèn nyàm mba ntshù' ke kwù num tse bon Israél.

⁷ Faraon tum mèn nèn ndôte, njen ta' nyàm mba ntshù' ke kwù num tse bon Israél. Là Faraon nke nke' ntùn be tu, ke kô nefaṅ ba Israél bo nèn.

Nge' mbatte ntôge: Ba mambàne

⁸ Tshùaben tshob Mosé bo Aron ndù: Bin ṅwat bwembwôg ndà mbwôg a dun bu bin, Mosé ma' tù num miag Faraon.

⁹ Tshen bwembwôg là nsi sa num njoṅ ngô Egipto fa mba mbab là, kag nkeko' num benntùn boa nyàm, nte ndô ndô ntshu tse.

¹⁰ Bo lo' bwembwôg ntùm ndà mbwôge, ntsin mbwe Faraon; Mosé ma' tù, a kag nkeko'o, nsô ndô ndô ntshu tse num benntùn boa nyàm.

¹¹ Ghangàm ke ku'ni netsin mbwe Mosé num nu nkeko'o, nummbe nkeko' lo ṅab ghangàm boa njoṅ ba Egipto fa.

¹² Là Tshùaben kag sagntù ntù Faraon, a ke ju' ju ze Mosé bo Aron tshob là, ndaṅndaṅ mba Tshùaben na' ntshob Mosé là.

Nge' mbatte sammbàa: Nywinmbaṅ

¹³ Tshùaben tshob Mosé ndù: Lo nsi mà nkebnjù nèn mbwe Faraon ntshob yi ndù: Tshù mba Tshùaben Nsi ba Héber tshob li: Faṅ yàm nzwit mèn nèn nke mfa' fa' me.

¹⁴ Nummbe me nsi tum njoṅ nge' fa num o, num ghafa' tsho mba mum ngô o yen yoṅ i li; a nsi tshùa ndùlala o lèn ndù sàm mèn ke num nsitsha' z'a be mba me là.

¹⁵ Me na' mbù' bu àm nsi num o, ndo' keya' ndab o yi, wù bin ngô o, mb'o lo mi yu ntùm njù.

¹⁶ Là, me lo faṅ o là, ndù o yen mba neta àm be là mba ndù lén sàm ju'ni ntùm njoṅ njù fa.

¹⁷ O tshwèt nke nta be tu, ke bam ndù yàm nzwit mèn nène.

¹⁸ Ndamnjù, be num yen nyam ni, me nsi ghù nywinmbaṅ z'a ke' to' be Egipto fe mb'a be tà nse' nkum sènni là be.

¹⁹ Ndonni tum bo nèn ma' tsho nyàm ndà boa tsemo' tshu ts'a b'a tsho mà tshwèt là. Mba zit mènntùn no ke zit nyàm no ze nywinmbaṅ nsi tèl i mà tshwèt ke be ndù a tsho ndà là nsi kwù.

²⁰ Benntùn tse bo tum netèt ben Faraon nke mbwôg ntshob Tshùaben nà tshag ghafa' tshob boa nyàm tshob ntùm mba'.

²¹ Là ben tse bo ke ngwag ntshob Tshùaben nà faṅ ghafa' tshob boa nyàm tshob mà tshwèt.

²² Tshùaben tshob Mosé ndù: Tshag bu tù, nywinmbaṅ vù ntùm njoṅ ngô Egipto fa, num benntùn boa nyàm, mba num njoṅ nenà fa ts'a mà tshwèt ntùm ngô Egipto là.

²³ Mosé tshag kôg tù, Tshùaben ghù mo' fambaṅ tsham, nywinmbaṅ vù; beba'mbaṅ vù ntùm njù, Tshùaben ghù nywinmbaṅ vù mum ngô Egipto.

²⁴ Nywinmbaṅ be, beba'mbaṅ tamte num nywinmbaṅ. Nu ta neshu, mbe ndù njoṅ ngô Egipto ke' to' yoṅ njen lèn i fe mb'a be ngô là.

²⁵ Nywinmbaṅ lab njoṅ tshu fa ts'a be mà tshwèt ntùm ngô Egipto là, benntùn boa nyàm. Nywinmbaṅ lab njoṅ nenà fa, mbe'te ntù mi a mà tshwèt là.

²⁶ Nywinmbaṅ na' mbe ke vù à nda' Gosen, dù' ze bon Israél be là.

²⁷ Faraon tsiaṅ Mosé bo Aron ntshob bo ndù: Me ghù nukebwô yen yoṅ i li; a Tshùaben bèn mbe mèn netsine; me bag ngô, bag b'a ghavù ntsha.

²⁸ Bin le'te Tshùaben! Yen njoṅ fambaṅ nà bo nywinmbaṅ ku'u! Me nsi faṅ zin bin nène, bin ke nsi bèn ghubte yàme.

²⁹ Mosé tshob yi ndù: Me nsi nèn bu' mbu num tu ngô, ma' mbu Tshùaben; fambaṅ nsi tsine, nywinmbaṅ be ke bèn mbe, a tshùa ndùlala o lèn ndù nsitsha' b'a ze Tshùaben.

³⁰ Là me lèn ndù wù bin à ghafa' tsho ke' ke yoṅ mbwôg Tshùaben Nsi.

³¹ Fetmbaṅ lo lab njab bo nkun nummb'a lo be be ndù nkun to' nelèle, njab nke nke' nsàm à nesàme.

³² Ju lo ke lab ngefet fôgtab bo ba ngefele, nummbe tshen tshu là b'a njam tshu.

³³ Mosé tum ndà Faraon mba ntùm ngô, ma' mbu Tshùaben; fambaṅ bo mbaṅ tsin, mbaṅ ke bèn nelo num nsitsha'a.

³⁴ Faraon be yen mba mbaṅ, nywinmbaṅ bo fambaṅ tsin nà, mbèn ngù nukebwô; tu wul i boa ghafa' tse fa ta tu.

³⁵ Ntù Faraon nke nke' nsag be nesage. A ke faṅ bon Israél nèn ndaṅndaṅ mba Tshùaben tshùa num ntshu Mosé ntshob là.