Netume 8 - NTSHOB NSI

¹ Tshùaben tshob Mosé ndù: Tshob Aron ndù a tshùb kôg se bu i, nyit bu i num bon nta'ntse, num bon netsha' ntse bo num ntam ntse, ngù ba metu' ko' bwe ntsho ntùm ngô Egipto.

² Aron nyit bu i num ntse mi a Egipto là. Ba metu' ko' nkabte njoṅ ngô Egipto fa.

³ Là ghangàm bèn ndo' yub nka mub ngù yi be ndaṅndaṅ; bo ghù ba metu' ko' num njoṅ ngô Egipto fa.

⁴ Faraon tsiaṅ Mosé bo Aron ntshob bo ndù: Bin le'te Tshùaben a ghù ba metu' lo num àm bo mum ngô àm, me faṅ ze nzwit nèn mfà tshule'te yi.

⁵ Mosé tshob Faraon ndù: A bwô ndù o bèn njab ngelaṅ ze me nsi le'te Nsi num tu o, num ghafa' tsho bo num tu ngô o là. A nsi tshùa ndùlala ba metu' mi ntùm ndà o, ntùm mba' mu, kà ntù' b'a nda' ntùm ta'ntse.

⁶ Faraon tshob ndu: Mb'a b'a ndamnjù. Mosé tshob ndù: Mb'a b'a mb'o tshob là, ndù a tshùa ndùlala o lèn ndù sàm mèn ke bwe z'a be mba Tshùaben Nsi yag là;

⁷ ba metu' nsi lo num o, tum ntùm mba' mu, lo num ghafa' tsho, tum ntùm ngô o, k'a tù' b'a nda' ntùm ta'ntse.

⁸ Mosé bo Aron lo mbwe Faraon. Mosé bu' mbu Tshùaben num nu ba metu' ts'a na' ndo' njab nu yi num Faraon nà.

⁹ Tshùaben ghù ju ze Mosé tshob yi là. Ba metu' kwùte, mi ntùm mba', mi ntshundà mba ntùm nà.

¹⁰ Bo kùmte yub tse tse, ngô nke ntù' lam be nelame.

¹¹ Faraon be yen mba nu na' nke mfi là, mbèn ngù sagntù ntùm ntù i. A ke ju' ju ze Mosé bo Aron tshob là, ndaṅndaṅ mba Tshùaben na' ntshob là.

Nge' mbatte tat: Mfétmfét

¹² Tshùaben tshob Mosé ndù: Tshob Aron ndù a tshag kôg se ndo' ndab mbab yi num nsitsha'a. Mbab nsi kaṅ tù' ngwa ntùm njoṅ ngô Egipto fa.

¹³ Bo ghù ndùlala. Aron nyit bu i ndo' kôg se ndab mbab yi num nsitsha'a. Ngwa tsho num benntùn boa ba nyàm. Njoṅ mbab nsitsha' fa tù' ngwa ntùm ngô Egipto fa.

¹⁴ Ghangàm lo' mub nka, nkag yub tùn neghù ngwa tume, là ke ku'ni neghù sàm ju. Ngwa tshote num benntùn boa ba nyàm.

¹⁵ Ghangàm tshob Faraon ndù: Yen nu li b'a ntu bu Nsi. Là, ntù Faraon nke nke' nsag be nesage. A ke ju' ju ze Mosé bo Aron tshob là, ndaṅndaṅ mba Tshùaben na' ntshob là.

Nge' mbatte kuà: Nzenze njoṅ

¹⁶ Tshùaben tshob Mosé ndù: Lo nsi mà nkebnjù nèn mbwe Faraon, ndùs'a nsi tum nèn mà mbaṅ ntse là, ntshob yi ndù: Tshù mba Tshùaben tshob li: Faṅ yàm nzwit mèn nèn mfa' me.

¹⁷ A be z'o ke' faṅ yàm nzwit mèn nèn nà, mba me nsi tum nzenze ts'a ghù njoṅ nà num o, num ghafa' tsho, mum ngô o, num mba' mu. Nzenze nsi dun ntùm mba' ba Egipto mba num tsha' dù' ze bo tsin nà.

¹⁸ A nsi be num sen lé'njù là me kabte Gosen du' yàm nzwit mèn be ntswe là. Nzenze ke nsi be bwe, a tshùa ndùlala o lèn ndù tu wul àm Tshùaben b'a netèt yen ngô li.

¹⁹ Me nsi yab keki netshu'u, sô yàm nzwit mèn mum yu ngô. Sen keki là nsi b'a ndamnjù.

²⁰ Tshùaben ghù ndùlala. Nzenze yàm tsho ntùm ba' Faraon, ba' ghafa' tse mba ntùm ngô Egipto fa; nzenze lo' ngô fafa.

²¹ Faraon tsiaṅ Mosé bo Aron ntshob bo ndù: Bin nèn mfà tshule'te Nsi zin ntùm yen ngô li.

²² Mosé tshob ndù: A ke' bwô neghù ndùlala, nummbe ju ze bag be mfà Tshùaben Nsi yag mba tshule'te là b'a tshùaya'nu num miag ba Egipto. Be bag fà jule'te z'a b'a tshùaya'nu num miag mub là, kà bo be ke tamte yag ndoṅ ké?

²³ A bwô ndù bag zin lé'njù tat nèn kônkwa, mfà jule'te à bwe, num mat ze Tshùaben Nsi yag nsi tshob bag là.

²⁴ Faraon tshob ndù: M'a' faṅ zin bin nèn mfà jule'te Tshùaben Nsi zin num kônkwa. Nda' ndù kà bin nèn nesà! Bin le'te Nsi num tu àm.

²⁵ Mosé tshob ndù: Mb'a bwô! M'a' lo mbaṅ o nèn nde'te Tshùaben, nzenze lo num o, num ghafa' tsho mba mum ngô o kua' ndamnjù. Nda' ndù a bwô Faraon yab tshabte nsi, mfaṅ ze nzwit mèn Tshùaben nèn mfà jule'te Tshùaben.

²⁶ Mosé tum ndà Faraon, nde'te Tshùaben.

²⁷ Tshùaben ghù mba Mosé tshob là. Nzenze lo num Faraon, ghafa' tse bo ngô i. Sàm lèn nzenze ke bèn ntù'ù.

²⁸ Mba yen yoṅ i li Faraon bèn ntùn tu, ke faṅ ze nzwit mèn Tshùaben nèn.