Netume 4 - NTSHOB NSI

Nsi la'te ngù' i Mosé

¹ Mosé bùnte ntshob ndù: Bo ke nsi bam ju ze me nsi tshob là, ke bèn nju' ntshu àm, nummbe bo nsi tshob ndù: Tshùaben ke' ṅwag wù.

² Tshùaben tshob yi ndù: Ke z'o tshùb bu o à? Mosé tshob ndù a b'a ta' kôg.

³ Tshùaben tshob ndù: Ma' kôg num tsha'a. A ma' i num tsha' a kaṅ ntù' nyu. Mosé yen ndùlala mbènte tuntun.

⁴ Tshùaben tshob Mosé ndù: Nyit bu o ntshùb i num nkun i. A nyit bu i ntshùb i, a bèn ntù' kôg mum mbu mi.

⁵ Yen ni b'a neghù bo lèn ndù Tshùaben Nsi tà tshobe, Nsi Abraham, Nsi Isak, Nsi Yakob lo ṅwag wù.

⁶ Tshùaben bèn ntshob yi ndù: So bu o ndàntù o! A so bu i ndàntù i, mbèn nsô; ndùlala nkin ṅab num bu i mfôg mba mbem nà.

⁷ Tshùaben tshob ndù: Bèn nso bu o ndàntù o. A bèn nso bu i ndàntù i mbèn nsô. Ndùlala bu i bèn mbe mba mo' dù' wul i là.

⁸ Tshùaben tshob ndù: A be ze bo ke' bam mbwe nsà, ke ju' ntshu là, mba bo nsi bam mbatte nsà bàa.

⁹ A be ze bo ke' bam tshen nsà bàa là, ke ju' ntshu o là, mb'o nsi tu' ntse ntùm ta'ntse fètte num tsha'a; ntse mi o nsi tu' ntùm ta'ntse là nsi tù' lem num tsha'a.

Nsi lo' Aron ngom nkwébo Mosé yi

¹⁰ Mosé tshob Tshùaben ndù: Netsho' Tshùaben, me ke' ghù ntshu nefùage, yen nà ke' b'a nu nkôg, ke lé'mo' lo, ke bèn njé't'a fe ndùs'o to' netshob nu ngafa' o me là; nummbe ntshu àm bo lém sàm lèt neshu;

¹¹ Tshùaben tshob yi ndù: We z'a fà ntshu mènntùn, ke nelo' i nkaṅ ketshob, mbu'ntoṅ, njennze ke mfùmiag lo yi à? A ke b'a me Tshùaben ké?

¹² Ndùlala, ndonni a bwô o nène, me nsi be bag ntshu o, tswit'o ju z'a bwô ndù o tshob là.

¹³ Mosé tshob ndù: Netsho' Tshùaben, tum mèn z'o kô là.

¹⁴ Ndùlala yantù Tshùaben kam num Mosé, a tshob ndù: mfèl o Aron mèn ntùm tunndà Lévi ke bwe ké? Me lèn ndù a nsi tshob nu a fùage. Tshù i là z'a tshwèt nse' mbwe o là, bin yi bumte, a yen o ntsiaṅte ntù i là.

¹⁵ O nsi tshob nu fa yi, so ntshob ntshu i. Me nsi be bag ntshu o, mba ze ntshu, tswite zin ju z'a bwô ndù bin ghù là.

¹⁶ A nsi tshob nu ngô num yu tu, be yu ntshu, o be mba ze Nsi là.

¹⁷ Mbe se' mba sen kôg li là, tshùb i bu o! O nsi lo' i ghù nsà yi.

Mosé bèn njam mà Egipto

¹⁸ Mosé lo mbèn njam mbaṅ ntse i Yétro ntshob yi ndù: Me le't'o ndù o faṅ me bèn Egipto ntèt fèt tshàm bwe, njen mbe ze bo ke' ntùn nà. Yétro tshob Mosé ndù: Nèn ntùm fite.

¹⁹ Tshùaben tshob Mosé Madian ndù: Lo mbèn njam Egipto, nummbe njoṅ benntùn fa tse bo ke nya' tu o là kwù.

²⁰ Mosé lo' nzwi i boa bon tse, nte yub num kekwène, mbèn ntùm ngô Egipto. Mosé tshùb kôg Nsi bu i.

²¹ Tshùaben tshob Mosé ndù: ndùs'o nsi bèn Egipto là, mb'a bwô o lèn ndù o nsi ghù njoṅ nsà fa tse me fà mum mbu mu là mbwe Faraon. Là, tu wul àm, me nsi kag sagntù ntù i, a gha nefaṅ yàm nzwit mèn nène.

²² O nsi tshob Faraon ndù: Tshù mba Tshùaben tshob li: Tuswe àm b'a Israél.

²³ Me tshob wù ndù o faṅ nshum àm nèn ngamt'àm. O gha nefaṅ a nèn à? Mb'a be ndùlala là, me nsi zwi tuswe o.

²⁴ Tshù, a lo be num manze, ndùs'a ke nzi là, Tshùaben se' ndende nkam Mosé ntanta, nke ndiag nezwi i.

²⁵ Séfora lo' mo' mfé loṅ, nsi ket nshum i yi, ndo' ntshoṅ ket nshum i nkwag Mosé yi, ntshob ndù: O be m'a ndu lem.

²⁶ Ndùlala Tshùaben kag i. Séfora ke ntshob mbe ndu lem à num nu nesi ket.

²⁷ Tshùaben tshob Aron ndù: Nèn bin Mosé bumte kônkwa. A nèn, nkot'é num mbat Nsi, nyô nge' mi.

²⁸ Mosé soṅ Aron njoṅ ntshob fa mi Tshùaben na' ntum i a nèn ntshob là, boa njoṅ nsà fa ts'a na' ntshob mb'a ghù là.

²⁹ Mosé bo Aron nèn ntse'te njoṅ ghakwé mbwe bon Israél fa.

³⁰ Aron bèn ntshob njoṅ ntshob fa mi Tshùaben na' ntshob Mosé là, ngù nsà mbwe ngô.

³¹ Ngô bam yen nu là. Ndùse bo ju' ndù Tshùaben lo lo nsi netshètte ze njam bon Israél, mba ndù a yen nge' yub là, bo vù nsi kabkab, ngamt'é.