Netume 35 - NTSHOB NSI

Tshu bwôntù num nekut Dù'ntswe yi

¹ Mosé tsiaṅ mbumte bon Israél fa, ntshob bo ndù: Tshù tshu tse Tshùaben bètte neghù li.

² Fa' nsi ke b'a num lé'njù ntôge; là mbatte lé'njù sammbàa nsi b'a ju nelàn num miag mine. A b'a Sabbat, lé'njù fite, se bo yab Tshùaben nà. Mèn z'a fa' mba ke lo num sen lé'njù là là, mba bo a' zwi ng'é.

³ Bin ke nsi kwé'te mbwôg ntùm sàm ndà zin mba ntshù' num lé'njù Sabbat.

⁴ Mosé tshob njoṅ mbumte bon Israél fa ndù: Tshù ju ze Tshùaben bètte li.

⁵ Bin lo' ju num ze bin ghù là, mfà ju bwôntù yi Tshùaben. Mba zit mèn no ze ntù i bwô là fà yen ju bwôntù là Tshùaben: Gol, silba, bo tùn meba;

⁶ nzwe ṅwa'ṅwa' nenàfi, meba, neziage, silik, nyiaṅ mbwe;

⁷ ngub komnjù tse bo vèn nto'nto' meba là, ngub mbeloṅ;

⁸ ntshwèn tù bù, mfèt lambo, la nelamte num mfèt yo', labinda ze bo ton nà;

⁹ loṅ onix boa memo' ndoṅ nelo' nkàn kum nesag se bo ke nkel à num ngelaṅ fa' là yi bo kum s'a ke nswe' nkabt'a ntù mèn nà.

¹⁰ A bwô ndù njoṅ benntùn fa tse ve tsho bu bo netèt bin nà se' mfa' njoṅ ju fa ze Tshùaben tshob là:

¹¹ Dù'ntswe, ntàb i, kabt'é, ngub mi, ntù mi, fa tse, ntom tse boa tun tse;

¹² Koṅ boa fa tse, téblé nete num bwe bo nzwe nekabte Koṅ yi;

¹³ téblé boa fa tse, njoṅ bon tshundà fa num bàn ju bwôntù;

¹⁴ ju neghette nka' bwe boa bon tshu tse, ndambo mi bo mfèt nka';

¹⁵ tômbwôg labinda boa fa tse, mfèt yo', labinda ze bo ton nà bo nzwe nzendà z'a nsi be netsho ndà là;

¹⁶ tômbwôg neton nyàm bwe bo ke't'é ze bo lo' tùn meba mfa yi là, fa tse boa bon tshu tse fa; kab tshaṅ bo ju nelo' nkel i yi nsi;

¹⁷ ba nzwe bam ntshundà boa ntom tshobe, ba tun tshobe, bo nzwe nzendà bam ntshundà;

¹⁸ nsaṅ dù'ntswe, nsaṅ bam ntshundà, boa nkù tse;

¹⁹ ba nzwe netshob ntshob Nsi yi, num neke mfa' yi dù' nelàne, nzwe nelàn tse ngale'te Aron, boa nzwe tse nshumnshum tse nsi ket ke fa' fa' sàm yi là.

²⁰ Njoṅ mbumte bon Israél fa lo mbwe Mosé nène.

²¹ Ndùlala njoṅ benntùn fa tse bo ghù ntù mebwô là se', mba we lo z'a ghù ntù ntùn nà lo' ze ju bwôntù nse' yi mbwe Tshùaben, num mfa' ndà mbumte, num fa' Tshùaben mba num ba nzwe nelàne.

²² Bandum boa bènnzwi se', mba we lo z'a ghù ntù ntùn nà lo' ba mba'ntoṅ, nkwa, mbwô nzenze boa nzenze tshu gol nse' yi. Mba zit mèn no lo' ju bwôntù gol z'a se' yi là nèn yi mbwe Tshùaben.

²³ Njoṅ benntùn fa tse bo ghù nzwe ṅwa'ṅwa' nenàfi, meba, neziage, silik, nyiaṅ mbwe, ngub komnjù tse bo vèn nto'nto' meba là, ngub mbeloṅ nà, lo' nse' yi.

²⁴ Njoṅ benntùn fa tse bo fà ju bwôntù Tshùaben nà, a b'a silba ke tùn meba lo là, nèn yi mbwe i. Njoṅ benntùn fa tse ntshwèn tù bù be bo là, nèn yi mfà num mfa'.

²⁵ Njoṅ bènnzwi fa tse bo ghù ve tu bo là, se' ndeb kua' mbu mub kà nse' mfà. A na' mb'a ndeb z'a ba mba tsinkém, mba kua' mebwô là, mba nke nziag là bo mbwô silik.

²⁶ Njoṅ bènnzwi fa tse bo ghù ntù ntùn, ngù ve tu bo là se' nyiaṅ mbwe.

²⁷ Ben ndùbndùb ntùm ngô fà ndoṅ onix boa memo' ndoṅ num nekàn kum nesag se bo ke nkel à num ngelaṅ fa' là yi bo kum s'a ke nswe' nkabt'a ntù mèn nà;

²⁸ mfà ba nda' bo mfèt num ju neghette nka' bwe, mfèt yo', labinda ze bo ton nà.

²⁹ Njoṅ bon Israél fa, bandum boa bènnzwi tse bo ghù ntù ntùn neywimte fa' se Tshùaben tshob Mosé là fà tshu bwôntù Tshùaben mb'a ko' ntù bo là.

³⁰ Mosé tshob bon Israél ndù: Bin lèn ndù Tshùaben lo tsho' Betsaléel nshum Uri, nshum Hur, mèn ntùm tunndà Yuda.

³¹ A ghù Ywèt tse dun num i. Ywèt zenu, tse siaṅte, tse nelèn bon nzenze mfa'.

³² A lo ghù a ku'ni netàmte tshu yàme, nefa' gol, silba bo tùn meba,

³³ netshebte ndoṅ mi neloṅ ntùm tshu; nefa' num ntshwèn mba nefa' bon nzenze mfa' ve.

³⁴ A lo fà fen yi num neke ntswite, ndaṅndaṅ mb'a na' mfà Oholiab nshum Ahisamak mèn ntùm tunndà Dan nà.

³⁵ A lo ghù zenu dun num bo, ndù bo ke mfa' njoṅ nzenze mfa' nekom tshu bo ve, nevèn bo neba' ba nzwe tse nto'nto' nenàfi, meba, neziage bo mbwô silik, mba ndù bo tàmte bon nzenze mfa' nke mfa'a.