Netume 33 - NTSHOB NSI

¹ Tshùaben tshob Mosé ndù: Lo nsen ni, bin ngô z'o sô mà Egipto là, nko' nèn num tsha' tse me na' ndo' à netshob nu nsaṅlaṅ bwe mbù yi Abraham, Isak mba Yakob ndù m'a' fà bo là. Me lo tshob nsaṅlaṅ bwe num men nka'ni là ntshob ndù: M'a' fà nzwit yub.

² M'a' tum ta' Angél i mbwe o, nta' ba Kanaan, ba Amor, ba Hít, ba Férésia, ba Hévia boa ba Yébusia.

³ Ko' nèn ntùm ngô là ze mbùn nyàm be nswe' bwe bo ṅwa' là. Là, me ke nsi ko' nèn bag bin, nummbe bin b'a nzwit ghatatu, mèn ze kekol i sag là, mbwôg ndù kà me biagte zin num manze.

⁴ Ndùse ngô ju' men ntshob li là, bo te vù, sàm mèn ke bèn ma' nzwe ntùn num i.

⁵ Ndùlala Tshùaben tshob Mosé ndù: Tshob bon Israél ndù bo b'a nzwit ghatatu, mèn ze kekol i sag là. A be ze me ko' nse' netèt bin nda' metsit ngelaṅ nà, mb'a m'a' biagte zine. Bin sô nzwe jùa num bin me yene, ndèn ju ze me nsi ghù num bin nà.

⁶ Bon Israél sô nzwe jùa num bo, neto' fe num mbat Horéb.

⁷ Mosé lo' ntàb, ndù' njam mbàn, ntsiaṅ ndù ntàb mbumte. Mba we lo z'a kô nebètte Tshùaben nu là, nke nèn mbaṅ ntàb mbumte, z'a be njam mbàn nà.

⁸ Ndùse Mosé tum nke nèn mbaṅ ntàb mbumte là, ngô tum, mba we lo tsin ntshu ze ntàb, nke nte lag num Mosé tà nkum ndùs'a tsho ntùm ntàb mbumte là.

⁹ Ndùse Mosé yoṅ ntsho ntàb là, bwoṅ ndot zwe' ntsin ntshu ntàb, Tshùaben nke ntshobte bo Mosé bwe.

¹⁰ Ngô nke njen mba bwoṅ ndot tsin ntshu ntàb là, mba zit mèn no lo ntsin tù, nte nkekwi' mi nsi mbwe ko' ze ntàb.

¹¹ Tshùaben nke ntshobte bo Mosé se se, mba mènntùn num ntshobte bo nshun i là. Yen nà nke mbe tôg Mosé bèn ntùm mbàn, ngafa' i, Yoshua nshum Nun, lo ke be tum tse ntàb.

Mba Nsi na' ṅwag Mosé là

¹² Mosé tshob Tshùaben ndù: O tshob me ndù me ghù yen ngô li ko'o, là ke ghù me lèn mèn z'o tum àm bag yi là. Mbe ndù o tshob me ndù: Me lèn o lén so, o bèn mfon kondèn num miag màm.

¹³ Ndonni, a be ze me fon kondèn num miag mu là, o la'te tsho manze me, ndùlala ndù me lèn o, mbèn mfon kua' kondèn num miag mu. Lèn mbe ngô li b'a yu nzwit mèn.

¹⁴ Tshùaben bùnte ndù: Bag wù nsi bèn ke zine, me bèn mfà fite wù.

¹⁵ Mosé tshob yi ndù: A be ze bag bin ke nsi bèn zin nà, o kà ghù ndù bag lo nsen ni.

¹⁶ Be bo lèn à ndùke mbe me mba yu nzwit mèn fon kondèn num miag mu à? Bo ke nsi lèn à ngelaṅ o tshwèt nzin bag à bin, mfagte yag nu boa njoṅ nzwit benntùn fa tse bo be num nsitsha' là ké?

¹⁷ Tshùaben tshob Mosé ndù: Ju z'o lo netshob là, me nsi ghù à ndùlala, nummb'o fon kondèn num miag màm, me bèn ndèn o lén so.

¹⁸ Mosé tshob ndù: La'te nkuni mu me.

¹⁹ Nsi bùnte yi ndù: M'a ghù njoṅ bwôntù àm fa ntôg mbwe o, me tshob lén sàm Tshùaben mbwe o. Me be nko ndèn mèn me kô i nko ndèn mi là, ntshàm ndèn mèn ze me kô netshàm ndèn mi là.

²⁰ Tshùaben bèn ntshob ndù: B'o ke yen se àm, nummbe be mènntùn ke yen àm njôge.

²¹ Tshùaben tshob ndù: Tshù ta' dù' là mbaṅ àm. A bwô ndù o tsin num gholoṅ.

²² Ndùse nkuni màm nsi tôg là, me nsi ma' o ntùm tô gholoṅ, kabt'o bu àm tà kum ngelaṅ me miagte netshùa là.

²³ M'a' bù' bu àm, o yen àm njamnjam, là be mèn ke ku'ni neyen se àm.