Netume 31 - NTSHOB NSI

Netsho' ghafa'

¹ Tshùaben tshob Mosé ndù:

² Yen mbe me lo tsho' Betsaléel, nshum Uri, nshum Hur, mèn ntùm tunndà Yuda.

³ Me lo ghù Ywèt tshàm dun num i, ywèt zenu, tse siaṅte, tse nelèn bon nzenze mfa'.

⁴ Me lo ghù a ku'ni netàmte tshu yàme, nefa' gol, silba bo tùn meba,

⁵ netshebte ndoṅ mi neloṅ ntùm tshu, nefa' num ntshwèn mba nefa' bon nzenze mfa'.

⁶ Tshù me lo fà Oholiab num neke njwimt'é. A b'a nshum Ahisamak mèn ntùm tunndà Dan. Me so nesiaṅte ntùm tu njoṅ benntùn fa tse bo ghù fùag wut là, ndùlala ndù bo fa' njoṅ mba ke lo fa ze me na' ntshob wù là.

⁷ Ntàb mbumte, Koṅ Kàn, téblé s'a be num tù là, njoṅ tshu ndà fa ts'a be ntàb mbumte là.

⁸ Téblé boa tshu tse, tômbwôg labinda,

⁹ tômbwôg neton ba nyàm bwe boa tshu tse, kab tshab bo ju nelo' nkel i yi nsi.

¹⁰ Ba nzwe liturgia, ba nzwe tse bo lànte là, tse ngale'te Aron, nzwe tse nshumnshum nsi ke ket ndùse bo tshwèt mfa' fa' sàm nà.

¹¹ Mfèt yo', labinda num neke nton num dù' nelàne. Bo nsi ghù a kua' mba me na' ntshob wù là.

Nekwimte Sabbat

¹² Tshùaben tshob Mosé ndù:

¹³ Tshob nu bon Israél, ntshob bo ndù: Mba tà ndùlala, bin nsi ke ze lé' Sabbat, a b'a keki netèt be num ngu'ngu', ndùlala bo lèn mb'a b'a me bèn mbe Tshùaben, mba ndù me bèn ndànte zine.

¹⁴ Bin ze Sabbat, nummb'a be bin à kua' ju nelàne. Mèn z'a lo' i mba ju banban nà mba bo nsi zwi ng'é. Kua' nenùn mèn z'a fa' fa' num sen lé'njù là là, mba bo nsi sô i netèt ze nzwit mèn.

¹⁵ Mba we lo a' ke mfa' se fa' num lé'njù ntôge, là mbatte lé'njù sammbàa b'a Sabbat, mbe lé'njù se bo lé' Tshùaben nà. Mba we lo z'a fa' num lé'njù Tshùaben nà, mba bo a' zwi ng'é.

¹⁶ Bon Israél nsi ke ze Sabbat, ke z'é boa nzwit yub ngu'ngu', a tù' kàn s'a tswe matmat là.

¹⁷ A b'a ta' keki netèl àm bag à bon Israél, ndù a bwô ndù a tswe matmat. Nummbe me Tshùaben lo nabte kamànyam bo tsha'a, a kum mbatte lé'njù sammbàa, me tsin, mfite wul àm.

Ntafèt Ntshù'

¹⁸ Ndùse Tshùaben miagte netshobte bo Mosé num mbat Sinaï là, a fà ntafèt nkàn yi mbàa, ntafèt ndoṅ, mi kua' ntu mbu Nsi bèn nkite num bwe là.