Netume 30 - NTSHOB NSI

Nesoṅ nu num tômbwôg labinda bo kab tùn meba

¹ Nabte tômbwôg neton tshu nelamte bwe. Lo' ntshwèn tù bù kà nkom i yi.

² A bwô kum tse be kuà, mbe be ndaṅndaṅ, kam bu njoṅ bag tse fa, mbe ta' bu nenèn tù. A bwô nelat ndô mi num bwe.

³ A bwô nelo' gol mebwô nabt'é yi, num i, mbaṅ tse, ndiaṅ mbume, boa ndô mi. O nsi lo' gol nabte ngoṅ i yi diaṅ bume.

⁴ O nsi lo' gol nabte nkwa yi, a b'a tun ngoṅ i, num ntôg mi mbàa, a bwô nkwa b'a num bag tse bàa, ndù bo ke nso bate bwe ndo' nkel i yi nsi.

⁵ Lo' à ntshwèn tù bù kà nkom bate yi, mbèn ndo' gol njo' i yi.

⁶ Te tômbwôg mbwe nzwe z'a num nkabte Koṅ Kàn nà, mbwe kabte z'a be num Koṅ Kàn nà; a bwe là ze bag wù nsi ke bumte là.

⁷ Aron nsi ke ton ju z'a lamte mebwô là bwe njoṅ nkebnjù fa, ndùs'a nèn nabte ba ndambo là.

⁸ A bwô ndù a ton ju nelamte mba mfetnjù bàa, ndùs'a nèn nabte ba ndambo là. Ndùlala bo nsi ke ton ju nelamte mbwe Tshùaben ngu'ngu' fa netèt zin nzwit mèn.

⁹ Kà bin lo' ju nelamte z'a fe à mfàm nà nèn yi tômbwôge, ke nyàm neton ke ju bwôntù lo; bin ke nsi naṅ ndu' bwe.

¹⁰ Aron nsi ke biagte nukebwô ta' yoṅ num tamngu' num ba ndô tômbwôge. A nsi ke lo' lem jule'te ze biagte nukebwô, lo' sôgte ze tu wut yi yoṅ ntshù' tamngu' num nebiagte ze nukebwô. Yen nu là ke mbe ngu'ngu'. Sen tômbwôg li nsi be se nelàn miagte Tshùaben.

¹¹ Tshùaben tshob Mosé ndù:

¹² Ndùs'o nsi siaṅ bon Israél lèn njoṅ yub là, mba zit mèn no nsi fà tshwèt num ko' se yôg Tshùaben. Yen nà nsi tshètte ndù kà sàm nge' mba ntshù' tsho yube.

¹³ Tshù ju ze ben bo siaṅ yub nsi fà li: A b'a ta' kam ndô nkàb, num lèn ndô nkàb dù' nelàne, z'a b'a guéra ṅam mbàa là; ta' kam ndô nkàb b'a njoṅ ju nefà ze bo kwé num lén Tshùaben nà.

¹⁴ Njoṅ benntùn fa tse bo siaṅ yub là, tse bo ghù ngu'njù ṅam mbàa ntôg là nsi fà ju nefà ze bo kwé num lén Tshùaben nà.

¹⁵ Ngaju ke nsi fà tôgte, mbwoṅ ke fà ju tsi bwe num ta' kam ndô nkàb ju nefà ze bo kwé num lén Tshùaben nà. Yen nà b'a nelo' ntshu' wut tshob yi.

¹⁶ O nsi ke kwé nkàb ze bon Israél fà netshu' wut tshob yi là fà num fa' ntàb mbumte. Yen nà nsi ke ghù bon Israél ke nkwimte netshu' wut tshob mbwe Tshùaben.

¹⁷ Tshùaben tshob Mosé ndù:

¹⁸ O nsi lo' tùn meba nabte kab tshab yi num neke ndé' ntse nelànte wut yi bwe. A bwô ndù ju nelo' nkel i yi b'a be tùn meba. O nsi te i netèt ndà mbumte bo tômbwôge, o nsi naṅ ntse ntùm bwe.

¹⁹ Aron boa nshumnshum tse nsi ke sôg mbu mub boa nku mub bwe.

²⁰ Bo nsi ke sôg wut yub ntse kà tsho ntùm ndà mbumte, mbwôg ndù kà bo kwù; ke ndùse bo nsi ghebte mbaṅ tômbwôg num fa', num neton jujù num lén Tshùaben no.

²¹ Mb'a bwô ndù bo sôg mbu boa nku mube, mbwôg ndù kà bo kwù. Yen nà nsi b'a ta' ntshù' z'a tswe matmat là bo. A nsi be tu wul i ndùlala bo nzwil i num ngu'ngu' fa.

Netamte mfèt nelàn bo labinda

²² Tshùaben tshob Mosé ndù:

²³ A bwô ndù o ghù ba mfèt nelamte mi a b'a mbwe tse là kilô mire ntôge, kilô kinamo ntat, kilô kub tù nelamte ntat.

²⁴ Kilô mfèt sab ntôge bo nguan ntshaṅ mfèt kena sammbàa kam.

²⁵ O nsi lo' men mfèt là, ghù mfèt yo' yi', yo' nelàne. O a' tamt'é à mba nganabte labinda be ntamte nzenze lamte mfèt là. Men mfèt là nsi b'a mfèt yo', mba yo' nelàne.

²⁶ O nsi lo' mfèt là yo' ntàb mbumte yi bo Koṅ kàn,

²⁷ téblé boa tshundà fa, dù' neghette ndambo bwe boa tshu tse, tômbwôg ba labinda,

²⁸ tômbwôg neton ba nyàm bwe boa tshu tse, kab tshab bo tun i.

²⁹ Lànte tshen tshu là, a tù' tse nelàne. Mba ke lo z'a kwag yub là nsi tù' nelàne.

³⁰ O nsi yo' Aron boa nshumnshum tse, bo tù' be nelàne, mbe num fa' sàm, nke mfa' me.

³¹ Tshob nu bon Israél, ntshob bo ndù: Men ni nsi b'a mfèt yo', mbe yo' ze nelàne, netèt nzwit zin.

³² Kà bo yab men mfèt là num wut sàm mèn. Kà bin fi'te mba bo bwet'é là, nummb'a b'a mfèt nelàne, mbe ndù a' b'a be nelàn bin.

³³ Mèn z'a nsi fi'te mba bo tamte men mfèt là yi, yab num mèn banban nà, mba bo nsi sô i netèt ze nzwit mèn.

³⁴ Tshùaben tshob Mosé ndù: Ghù ba mfèt nelamte: Ṅa manyanje', ambre, galbanun nelamte, ansansa bo ke' bwete là, njoṅ i fa be be ndaṅndaṅ.

³⁵ O nsi tamte lo' ghù labinda yi, a tswe mba nganabte labinda bèn ntamte là. A b'a nedùmte, mbe mi mebwô, mi nelàne.

³⁶ O nsi lo' mo' bag i mbábmbàbe, nèn yab mbwe Koṅ Kàn, ntùm ndà mbumte, dù' bag wù nsi bumte là. Yen nà nsi be wù à ju nelàn neshu.

³⁷ A ke' bwô ndù bin nabte lèn yen labinda là num zin tu, a tum be ndaṅndaṅ. A bwô a b'a nelàn num miag mine, mb'a nda' num lén Tshùaben.

³⁸ Mba we lo z'a nabte lèn i, nke mfit tà nju' njwèt mi là, bo nsi sô i netèt ze nzwit mèn.