Netume 28 - NTSHOB NSI

Nzwe fa' bo lèn ghale'te Nsi

¹ Lo' mba mfèl o Aron boa tse nshum netèt bon Israél tse bandum, ndù bo ke mfa' sàm fa' mba ghale'te là. Aron, Nadab, Abiu, Eléazar bo Itamar tse nshum Aron.

² O nsi ghù nzwe mfèl o Aron, nzwe ts'a tù' tse nelàn nà, ngù a num mat ghamte bo nkuni.

³ Tu wul o nsi tshob yen nu là ghazenu tse me so ywèt zenu num bo là. Tshob bo ndù bo tam nzwe Aron, me yab i njam a ke mfa' ntùm fa' sàm mba ngale't'àm nà.

⁴ Tshù lèn tshaṅ nzwe tse bo nsi tam ni: Kum z'a ke nswe' nkabt'a nda' ntù mèn nà, kum nesà se bo ke nkel à num ngelaṅ fa' là, ngaṅe, nesà kum se bo vèn nà, kam nzwe nekut tu yi, kob. A bwô ndù bo ghù nzwe ts'a tù' tse nelàn nà mfèl o Aron ndùlala, mbèn ngù tse tse nshum, ndù Aron ke mfa' ntùm fa' sàm.

⁵ Bo nsi lo' gol, nzwe z'a ba mba tsinkém nà, nzwe meba, nzwe z'a ba nzwe'nzwe' là bo nzwe mebwô.

⁶ Bo nsi lo' gol kà tam kum nesag se bo ke nkel à num ngelaṅ fa' là yi, lo' nzwe z'a ba mba tsinkém, nzwe z'a ba, nzwe z'a ba nzwe'nzwe' nziag là bo mbwô nzwe z'a fùag là kà tam kum nà yi. A bwô ndù a b'a fa' ta' ngave.

⁷ Nkém mi nsi be num ntôg mi mbàa, mi a nsi ke tshùb i là.

⁸ A bwô ndù kob s'a be num kum nà zin bo kum a ntam: A b'a gol, nzwe z'a ba nzwe' nzwe' nziag là, bo mbwô nzwe z'a fùag là.

⁹ Lo' ndoṅ onix mbàa, ntshebte ndèn tse nshum Israél num bwe.

¹⁰ Tshebte ndèn ntôg num mbwe loṅ, ntshebte mi ntôg mi a tù' là num semo' loṅ, ngù a nka, num mba bo lo' mbwe yub yi là.

¹¹ O nsi tshebte men ndèn bon Israél là num men ndoṅ mbàa là, ndaṅndaṅ mba ngakom màkwa ghù netshebte ta' màkwa là. O nsi so yub ntùm gol, lo' loṅ yub yi ntùm bwe.

¹² O nsi yab men ndoṅ mbàa là num nkém kum nesag se bo ke nkel à num ngelaṅ fa' là, ndù a ke ndo' nkwimte bon Israél tse Aron nsi ke ket ndèn mub num nkembe' i là yi mbwe Tshùaben.

¹³ O nsi nabte nkwa gol so loṅ tanjoṅ bwe,

¹⁴ boa ntshan gol mebwô. O nsi ba' njoṅ i fa mba mvèt là. O nsi yab ntshan mi o ba' mba mvèt là num nkwa mi o so ndoṅ tanjoṅ bwe là.

¹⁵ O nsi tam kum s'a ke nswe' nkabt'a nda' ntù mèn nà, se nesa' kam yi. A bwô ndù a b'a fa' ngave, o nsi tam i mba kum nesag se bo ke nkel à num ngelaṅ fa' là. Lo' à gol, nzwe z'a ba mba tsinkém, nzwe meba, nzwe z'a ba nzwe'nzwe' nke nziage, bo mbwô nzwe z'a fùag là kà ntam sen kum nà yi.

¹⁶ A be ze bo bote là, mba kum tse kuà fa nsi b'a ndaṅndaṅ, mbe njoṅ mfi' z'a lo num màdu' mèn nkum num nkét ntu bu i là.

¹⁷ O nsi lo' ndoṅ tshab num bwe nka tse kuà. Mbwe nka: sardonik, topaze, emerode.

¹⁸ Mbatte bàa: eskarbukle, loṅ fôgtab, diamanto.

¹⁹ Mbatte nka tat: opale, agate, amétistô.

²⁰ Mbatte nka kuà: Loṅ tanjoṅ, onix, yaspi. Bo nsi loṅ men ndoṅ nà ntùm nkwa gol.

²¹ Njoṅ i fa nsi b'a ntshob bàa gham, mba ndèn nshumnshum Israél be là. Bo nsi tshebte ba màkwa num men ndoṅ nà, lén ta' tunndà netèt tse ntshob bàa gham be num ta' loṅ.

²² O nsi vèn ntshan gol mebwô, ba' i à mba ba mvèt là num kum s'a ke nswe' nkabt'a ntù mèn nà.

²³ O nsi tswe nkwa gol mbàa, yab nkwa là num ntôg kum mbàa, kum s'a ke nswe' nkabt'a ntù mèn nà.

²⁴ O nsi lo' mvèt bàa tôg yi ntùm nkwa mbàa mi num ntôg kum mbàa, kum s'a ke nswe' nkabt'a ntù mèn nà.

²⁵ O nsi tsin tu mvèt bàa mbwe ntô nkém mi o te kum nesag se bo ke nkel à num ngelaṅ fa' là.

²⁶ O nsi bèn ghù nkwa gol mbàa mi ntôg kum s'a ke nswe' nkabt'a ntù mén nà. A bwô ndù a b'a num ngon i ze ntùm bwe z'a be njab num kum nesag se bo ke nkel à num ngelaṅ fa' là.

²⁷ Bèn nabte memo' nkwa gol mbàa, njab num tun nkém kum nesag se bo ke nkel à num ngelaṅ fa' là. Yab à mbwe bwe, num ngelaṅ dù' ze yoṅ i be là. A bwô ndù a b'a mfe tu kob kum nesag se bo ke nkel à num ngelaṅ fa' là.

²⁸ Bo nsi lo' mvèt num mi nkwa kum s'a ke nswe' nkabt'a ntù mén nà, a tsho ntùm mi nkwa kum nesag se bo ke nkel à num ngelaṅ fa' là. Tun mbwe kum nsi tsin tu kob mbatte kum, ghô bwe ndùlala, ke fiag num mo'o.

²⁹ Ndùse Aron ke ntsho ntùm dù' nelàn nà, mb'a ket ndèn nshumnshum Israél ntù i, num kum s'a ke nswe' nkabt'a ntù mén, mbe se nesa' kam nà. Bo tshebte men ndèn nà num bwe. A b'a num neke nkwimte yub yi mbwe Tshùaben njoṅ ndù fa.

³⁰ A bwô ndù o yab nkwango' nelàn mbàa mi bo num ntsiaṅ yub Urim bo Tummim nà num kum s'a ke nswe' nkabt'a ntù mèn, mbe se nesa' kam nà. A bwô ndù bo ke mbe ntù Aron ndùs'a nèn mbwe Tshùaben nà. A nsi tshùa ndùlala Aron ke nket kam bon Israél ntù i, ndùs'a nèn mbwe Tshùaben nà.

³¹ O nsi lo' nzwe nenàfi tam kum nesag se bo ke nkel à num ngelaṅ fa' là yi.

³² O nsi to tô dù' netshag tu o bwe netèt bwe. A bwô ndù sen tô là be ndù bo tam ngoṅ i, a tswe à mba ngaba' nzwe bèn mba' là, ndùlala ndù kà kum nà fagte.

³³ O nsi taṅte memo' ntàm tshu num ngoṅ kum tun nsi, men ntàm tshu là b'a nenàfi, mbe meba, mba nzwe'nzwe', o bèn ntaṅte ṅwa gol netèt bwe.

³⁴ O nsi ke taṅ tàm ju tàn ta' ṅwa, ghù ndùlala diaṅ bume, num ngoṅ kum fa.

³⁵ Aron nsi ke ma' sen kum nà lo' ke fa' fa' yi. Ndùs'a tsho ntùm dù' nelàn mbwe Tshùaben nà, mb'a' be tum bo ju' nze ṅwa, a ke kwù.

³⁶ O nsi lo' gol tswe ta' bàb ju yi, tshebte num bwe mba bo num ntshebte màkwa là ndù: Tshùaben b'a Nelàne.

³⁷ O nsi lo' nkù z'a be nenàfi là taṅ i yi num tshe', taṅ i a mbwe tshe'.

³⁸ A bwô ndù a ke mb'a num se Aron; Aron nsi ket mfànnu mi bon Israél ghù ndùse bo ke mfà tshu bwôntù tse nelàn nà. A nsi ke be num se Aron njoṅ ndù fa mbwe Tshùaben, ndùlala ndù a bam yube.

³⁹ O nsi lo' à nzwe mebwô tam kum yi, lo' be yi tam tshe' yi, ghù ta' kob se bo vèn nà.

⁴⁰ O nsi tam nkum nshumnshum Aron, ghù nkob bo, tam ntshe' bo, num nelo' nda'te sob laṅ kam yi, mba num nelo' nkwi yub yi.

⁴¹ O nsi ma' tshen tshu là num mfèl o Aron boa nshumnshum tse. O nsi yo' yube, o nsi yab yub nsi, lànte yube, bo tù' tshàm ghafa' nke mfa' ntùm fa' sàm.

⁴² Lo' nzwe mebwô ntam tshe'nku yi bo, bo lo' nkabte wut yub yi. A bwô ndù a to' zwe' bo nkum njam ntsi' mube.

⁴³ Aron boa nshumnshum tse nsi kele, ndùse bo tsho ndà mbumte là, ke ndùse bo nèn tômbwôg nefa' ntùm dù' nelàn no, mbwôg ndù kà bo ket nukebwô nkwù. Sen ni b'a kàn s'a ghô matmat num Aron, mba num nzwil i z'a nsi tum njam i là.