Netume 25 - NTSHOB NSI

MAT NEKUT DÙ'NTSWE Mfa' bon Israél

¹ Tshùaben tshob Mosé ndù:

² Tshob ba Israél ndù bo ke mfà ju bwôntù me. Bin ke nkwé yen ju bwôntù là mba zit mènntùn no z'a fà ntùm ntù mebwô là.

³ Tshù tshu tse bo nsi ke fà mba ju bwôntù là li: Gol, silba, tùn meba;

⁴ nzwe ṅwa'ṅwa' nenàfi, meba, neziage, silik, nyiaṅ mbwe;

⁵ ngub nkomnjù tse bo vènte nto'nto' meba là, ngub mbeloṅ, ntshwèn tù bù;

⁶ mfèt lambo, la nelamte num mfèt yo', labinda ze bo ton nà;

⁷ loṅ onix boa memo' ndoṅ nelo' nkàn kum nesag se bo ke nkel à num ngelaṅ fa' là yi bo kum s'a ke nswe' nkabt'a ntù mèn nà.

⁸ Bo nsi kut yàm dù'ntswe tu wul àm ke ntswe netèt bo.

⁹ M'a' la't'o mba bo nsi kut dù'ntswe là là boa njoṅ tshu fa ts'a nsi be bwe là. A bwô ndù bin ghù njoṅ i f'a mb'a be là.

Nkoṅ Kàn

¹⁰ Bo nsi lo' ntshwèn tù bù kom koṅ yi: Nesag be ta' bu kam, bam se bo nenèn tù be ndaṅndaṅ, nguan kam bu.

¹¹ Tu wul o nsi ghù bo lo' gol nelàn yo' i yi; bo nsi lo' gol yo' i yi njam ntùm bwe mba njam njù, ndo' be gol mfim ntôg mi yi ndiaṅ mbume.

¹² O nsi ghù bo tswe nkwa gol nkuà mi bo nsi te num nku koṅ mi nkuà là: Nkwa mbàa num mo' bag i, memo' mi mbàa num mo'o.

¹³ O nsi ghù bo lo' ntshwèn tù bù kom mbwoṅ yi, lo' gol yo' i yi.

¹⁴ O nsi ghù bo so tshen mbwoṅ nà ntùm nkwa mi a mbaṅ Koṅ nà, bo ke ndo' nket Koṅ yi.

¹⁵ Tshen mbwoṅ nà nsi ke b'a ntùm nkwa Koṅ. Kà mèn sô yub bwe.

¹⁶ O nsi yab ntafèt nsoṅ kàn mi me fà wù là ntùm Koṅ.

¹⁷ O nsi ghù bo lo' gol nelàn nabte Koṅ yi, a ghù ta' bu kam nesage, bam se be nguan kam bu.

¹⁸ O nsi ghù bo lo' gol nabte kérubim yi bàa; o nsi ghù bo tete yub num ntôg kabte Koṅ mbàa.

¹⁹ Te kérubim mba num sit tôg Koṅ no, nte yub num ntôg mi mbàa fa.

²⁰ Ba kérubim nsi sette mbàb mub tshag tù lo' kabte Koṅ yi. Bo nsi b'a se se, ke lôte kabte Koṅ.

²¹ O nsi ghù bo kabte kabte Koṅ num Koṅ, yab ntafèt ndoṅ kàn mi me fà wù là ntùm Koṅ.

²² Bag wù nsi ke bumt'a bwe, me nsi ke tsin à num kabte Koṅ netèt ba kérubim tse bo be num Koṅ Kàn nà, kà tshob tshu ts'a bwô ndù ba Israél ke ngù là wù.

Téblé bàn lo' ngamte Nsi

²³ O nsi ghù bo lo' ntshwèn tù bù kom ta' téblé yi, nesage be ta' bu, bam se be nguan ta' kam bu, nesag nèn tù be nguan kam bu.

²⁴ O nsi ghù bo lo' gol nelàn njo' i yi, lo' yo' ntôg mi yi.

²⁵ O nsi kom ngoṅ tse a zi mba ntu bu mènntùn nà, ngù bo lo' gol njo' ngoṅ tse yi ndiaṅ mbume.

²⁶ O nsi ghù bo tswe nkwa gol nkuà, num ntôg téblé nkuà mi nku mi be bwe là.

²⁷ Bo nsi so men nkwa là mbaṅ ngoṅ tse, so mbwoṅ nebù' téblé yi nsi bwe.

²⁸ O nsi ghù bo lo' ntshwèn tù bù kom mbwoṅ yi, lo' gol yo' yi. Bo a' ke ndo' tshen mbwoṅ nà nket téblé yi nsi.

²⁹ O nsi ghù bo lo' gol nelàn nabte nka mi yi, ntu' tse, bon ntu' tse, nkob mi, mi neke naṅ ju nebot dù' yi ntùm bwe.

³⁰ O nsi ghù bo ke njab bàn le'te ze njoṅ ndù fa bwe mbwe àm.

Lambo bo ndô sammbàa

³¹ O nsi ghù bo bèn ndo' gol nelàn nabte ju neghette lambo bwe yi. O nsi ghù bo tswe yen ju l'a netswe. Tun i, mbaṅ i, mbu mi, ndô tse boa nsàm tù mi nsi b'a ntam.

³² Mbu mi nsi tum bag bag. Njoṅ i fa ntôge. Mi ntat mo' bag, memo' mi ntat num mo'o.

³³ Num ta' bu i nkob nsi be bwe ntat ndù a fute mekale, bo ta' ndô mba nsàm tù, mbèn mbe num mo' be ndaṅndaṅ, ndùlala num njoṅ mbu mi mi ntôg fa mi a tum num ju neghette lambo bwe là.

³⁴ Ntu' nsi be num yen ju là kuà ndù a fute mba mekale, boa ndô nsàm tù.

³⁵ Ta' ndô ju nsi be bam mbu ju là ndù a ko' kua' num i. A be be ndùlala num memo' mbu mi mi nkuà mi a tù' là, mbe be ndaṅndaṅ num mbu ntôg mi a tumte num ju là là.

³⁶ Ndô tshu là boa mbu mi nsi b'a ntam, ndù bo tswe i num ta' ju ntshù', ndo' a gol nelàn ntswe yi.

³⁷ O nsi ghù bo tete ndambo bwe sammbàa. Bo nsi te men ndambo l'a num mat z'a ké' dù' fa z'a mbwe bwe là.

³⁸ Tse tshu neghette boa nka nsi be ndù bo lo' a gol nabte yi.

³⁹ Bo lo' kilô gol nelàn ṅam ntàn kà ntswe i yi boa njoṅ tshu tse fa.

⁴⁰ Ndùlala yen mbèn nèn ngù num mat ze me na' nda'te wù num mbat là.