Netume 24 - NTSHOB NSI

Nsi wat kàn bo Israél

¹ Nsi tshob Mosé ndù: Ko' nse' mbaṅ àm, me Tshùaben, bin Aron, Nadab bo Abiu, mba ghakwé mbwe ba Israél ntu ṅam sammbàa. Bin vù nsi tà ngùanesà.

² Nda' Mosé bèn ngebte mbaṅ Tshùaben, ke b'a tsemo' benntùn fa. Kà ngô ko' bo yi num mbale.

³ Mosé nèn nsoṅ ngô njoṅ ntshob Tshùaben fa boa njoṅ ntshù' mi fa. Ngô tamte mbùnte ntshu ntshù' ndù: Bag nsi ghù mba ke lo ze Tshùaben tshob là.

⁴ Mosé kite njoṅ ntshob Tshùaben fa. Njù be làne, Mosé bom tômbwôg tun mbale, nte ndoṅ bwe ntshob bàa gham, num tunndà Israél ntshob bàa gham.

⁵ Mosé tum nguanmèn netèt bon Israél ndù bo nèn nton nyàm Tshùaben, mbèn nse ntô mfot mfô num neso mbu yi.

⁶ Mosé lo' mo' bag lem naṅ ntùm ba ntu'; ndo' tshe' i miagte num tômbwôg s'a bom nà.

⁷ A lo' ṅwa'ni kàn s'a wat là, nsiaṅ ngô. Ngô tshob ndù: Mba ke lo ze Tshùaben tshob là bag nsi ze, ke ju'u.

⁸ Mosé lo' lem miag num ngô, ntshob ndù: Tshù lem kàn se bin à Tshùaben wat njam men ntshob li là.

⁹ Mosé ko' boa Aron, Nadab, Abiu mba ghakwé mbwe ba Israél ntu ṅam sammbàa.

¹⁰ Bo yen Nsi Israél. Tun nku mi be mba ju ze bo lo' loṅ fôgtab nabte yi là, ntswe mba ndùse tun njù foṅ kua' mebwô là.

¹¹ Nsi yab bu num tshen ghafen bon Israél li. Bo lôte Nsi, njù mbèn nu.

Mosé num mbat Sinaï

¹² Tshùaben tshob Mosé ndù: Ko' nse' mbaṅ àm num mbat ntswe bwe. Me nsi fà ntafèt ndoṅ mi me kite ntshù' boa ntag mi o nsi tswite yub yi là wù.

¹³ Mosé lo nsi bo Yoshua ngaywimt'é, nko' nèn num mbat Nsi.

¹⁴ A bwôgmbwe ntshob ghakwé mbwe ntùm ngô ndù: Bin béb yag nsen ni tà nkum ndùse bag bèn mbaṅ bin nà. Là tshù Aron bo Hur là tse bin à bo tù' là. Mèn z'a ghù ta' ntsha là mb'a' tshob bo.

¹⁵ Mosé ko' num mbale; ndùlala ndot kabte mbale;

¹⁶ nkuni Tshùaben ghô num mbat Sinaï, ndot kabt'é num lé'njù ntôge. A tsin ntùm ndot ntsiaṅ Mosé num mbatte lé'njù sammbàa.

¹⁷ Nkuni Tshùaben nke ntum mbwe bon Israél mba ta' mbwôg z'a tshwèt nkù là num ntshùa mbale.

¹⁸ Mosé tsho ntùm ndot num mbale. Mosé tswe tu mbat lé'njù ṅam nkuà, mbwôgtshù bo tèttswe'.