Netume 23 - NTSHOB NSI

Ntshù' num yôg ntùn

¹ O ke nsi be ngasoṅ mfi tatte; kà tomte ngatshùagntù ntùm kwénta tatte.

² Kà tam njam bwoṅ benntùn ndùse bo fàn nu là. Kà bam nete ku tu mèn netsin num mba ben yàm b'a mo' njam nà.

³ A ke' nebwô ndù o tù' kabte mbwoṅ ntùm kame.

⁴ A be z'o bumte bin nyàmna' ke kekwèn ngakeban o lo là, o ghom nèn mfà yi.

⁵ A be z'o yen kekwèn ngakeban o nke nkwù lèt là, kà tshù nsi, o ywimt'é neké' tshu ts'a num kekwèn nà.

⁶ Kà fétte mbwoṅ ndùs'a loṅ kam nà.

⁷ Ghom wul o num ntshob tatte. Kà keb ntsha ndù bo zwi mbu' ke mèn netsin no, nummbe me ke nsi lagte ngafànnu.

⁸ Kà bam nekwé nda', nummbe nda' be mbiag miag ben tse bo be njen mebwô là, mbe' nku ze nu mèn netsine.

Ngu'njù Sabbat bo lé'njù Sabbat

⁹ O ke nsi fétte nkùla'. Tu wut tsin lèn yôg nkùla', nummbe bin lo be ghakùla' Egipto.

¹⁰ O nsi ke dù' tsha' bèn ywit num ngu'njù ntôge, bèn kàb ntàm mi.

¹¹ L'a nsi be num mbatte ngu'njù sammbàa o faṅ nà. Bwoṅbwoṅ tse bo ntùm ngô là nsi jù tshen tshu là, nyàm tshwèt fèt tshé' i ze bo faṅ nà. O nsi ghù à be ndaṅndaṅ num ntù ndu' mu bo tù mbatsi su.

¹² O nsi fa' su fa' num lé'njù ntôge, l'a be num mbatte lé'njù sammbàa o fite wul o, ndùlala ndù nyàmna' o bo kekwèn o fite, mba ndù nshum nkuan o ze mènnzwi bo ngùn zwiage.

Ndé'njù jùa ntùm ngô Israél

¹³ Bin nsi ke ze njoṅ i fa ze me tshob bin nà. Kà bin tsi lén tsemo' nsi, ke bam ndù bo ju' lén sub tum ntshu bin.

¹⁴ O nsi ke jù jùa yoṅ tat num tamngu' lo' ke ghamte lén sàm yi.

¹⁵ O nsi ke ze jùa bàn ke te ywibte se num lé'njù sammbàa, mba me na' ntshob wù là. A nsi b'a num ngelaṅ i ze me na' njab là, ntùm ṅwù nefag tshu, nummb'a yen ngelaṅ nà z'o tum Egipto là. A ke' bwô ndù mèn se' yen àm mbu ndaṅe.

¹⁶ O nsi ke ze jùa netsho' tshu, ze jùa mbwe ntàm fa' su, mi a tum num tshu ts'o ywit ntùm tsho nà là, mbèn nze mba jùa mb'o a tsho' tshu là ngu'njù fa, ndùs'o a kàb ntàm fa' su là.

¹⁷ Njoṅ bon bandum fa nsi ke se' mbwe Tshùaben Tshùaben yoṅ tat num tamngu'!

¹⁸ A be z'o tshwèt nton nyàm ze lem tshwèt ntum num i me là, mb'a ke' bwô ndù a b'a bo bàn ze ntsha' be ntùm bwe là. Kà nzit mi bin yab me num jùa là zi ndà ntèt nkebnjù.

¹⁹ O nsi lo' kua' mbwe ntàm mi a tum ntùm nà o là nèn yi ntùm ndà Tshùaben Nsi o. A ke' bwô ndù o na mén mbwe ntùm mbùn màab.

²⁰ Me nsi tum Angél mbwe o ndù a béb o num manze, mbèn ngù o tsho dù' ze me na' nabte là.

²¹ Zete num i, nju' ntshu i; kà ta tu yi, nummbe mb'a ke nsi fènte tse. Lèn ndù lén sàm num num i.

²² A be z'o ju' ntshu i ngù mba ke lo ze me tshob wù là, mba me nsi be ngakeban ghakeban tsho, be ngamaṅte ghamaṅt'o.

²³ Nummbe Angél nsi zin mbwe o, lo' o nèn yi ngô ba Amor, ba Hétia, ba Férésia, ba Kanaan, ba Hévia boa ba Yébusia tse me nsi biagte yub là.

²⁴ O ke nsi ghamte tshen nsi, ke fa' bo, ke fi'te tshen ngôngô là num sàm ju. L'a bwô ndù o sate tshob nsi, mbe'te mub ndoṅla' fa.

²⁵ Bin nsi ke fa' me Tshùaben Nsi zin, me ze me nsi ke tam ntse bin, fà bàn bo ntse bin nà; tu wul àm nsi kabte zin num ngokèt.

²⁶ Mènnzwi ke nsi sô bam ntùm zin ngô, mènnzwi ke be kebwe bwe. Me nsi ghù ntswe'njù mu dunte.

²⁷ Me nsi tshag fétwut mbwe o, kag bwôg ntùm ngôngô ts'o nsi tsho bwe là. A nsi tshùa ndùlala me ghù ghakeban tsho kù mbwe o fa.

²⁸ Me nsi tshag màkùakoṅ mbwe o, bo ta' ba Hévia, ba Kanaan boa ba Hétia mbwe o, ntshag yub ngùanesà.

²⁹ Me ke nsi ta' yub à num tamngu' ntshù', mbwôg ndù kà ngô tù' kônkwa, nyàm tshwèt kwiag ndà bwe nke ma'ni o.

³⁰ M'a' ke nta' yub be nda'nda', tà nkum ndùse bin yàme, ndo' dù' ntùm ngô fa là.

³¹ Ndùngô tse me te wù là lo dibantse meba nkum dibantse ba Filistia mbèn ndo kônkwa nèn nkum ta'ntse Efrat. Nummbe m'a' fà ben tse bo ntùm tshen ngô là, ben tse bin nsi ta' yub mbwe bin nà mum mbu mine.

³² O ke nsi wat kàn bin à bo, ke wat kàn bin à tshob nsi.

³³ Bo ke nsi tswe ntùm yu ngô, mbwôg ndù kà bo ghù o ghù nukebwô num àm ke nebe fa' tshob nsi ngwù ntùm ywi' lo.