Netume 22 - NTSHOB NSI

Ntshù' num ju mèn

¹ A be ze ntshô be yi tèttswe' mèn ghom i, ndab i a kwù là, mba bo ke ma' ntsha tu ng'é mb'a fètte lem mèn nsi.

² Là, a be z'a b'a mbwôgtshù là, mba bo nsi yagte mba' num lem ntshô tse bo fètte là. A bwô ndù ntshô ba' ju z'a yi là. A be z'a ke' ghù ju là, mba bo nsi swèn i lo' jun tshô se yi.

³ A be ze nyàmna', ke kekwène, ke mén njùmbwe lo z'a yi là ne ke' ntùn mum mbu mi là, mb'a bwô ndù a fà kwibtu tshen tshu li nze tse bàa.

Nelo' ju mèn

⁴ A be ze mènntùn bagte ju ntùm nà mèn, ke ntùm nà ntù ndu' mi lo là, ke nekag nyàm tse bo fèt tshu ntùm nà i lo là, mb'a bwô ndù a fà mbwô nà i ke bwô nà ntù ndu' mi lo kwibtu i num bwe.

⁵ A be ze mèn ma' bwôge, a kù nà nsà mi bo yab ntsha'ntsha' ke nsà mi bo ke' yoṅ ntsho' lo là, ke nekù be nà fa lo là, mba ngama' mbwôg nsi fà kwibtu tshu ts'a bagte là.

⁶ A be ze mènntùn fà nkàb ke tsemo' tshu lo mfèl i mb'a lé' yi, bo yi tshen tshu là ndà ng'é là, mba ntshô nsi fà kwibtu tshen tshu là yoṅ tse bàa, a be ze bo yen ntshô là.

⁷ A be ze bo ke' yen ntshô là, mba nga ba' a' kù'te nèn mbwe Nsi, ngù bo lèn mb'a ke' yab bu i num ju mènghua.

⁸ Mbe se' num ju nefùte z'a kwag ta' nyàmna', ta' kekwène, ta' mén njùmbwe, ta' nzwe ke ta' ju z'a bi, mbe ndù be bo tshob num bwe ndù: a b'a kua' ndùlala là, mb'a bwô ndù ntsha z'a netèt ben bàa là nèn nkum mbwe Nsi. Mèn z'a tsho mbwe Nsi ngwù ntsha là, mb'a' fà kwibtu tshen tshu là mfèl i yoṅ tse bàa.

⁹ A be ze mènntùn fà ta' kekwène, ta' nyàmna', ta' njùmbwe ke mo' nyàm no mfèl i ndù a lé' yi, nyàm nà tsho nkwù, ke mo' dù' wul i nebe' lo, ke nebi bo ke yen i là lo,

¹⁰ mba mèn ze bo fà nyàm yi a lé' là, nsi kàn mfe num lén Tshùaben bèn tshob mb'a ke' lo' tse ju mènghua. A bwô ndù nga nyàm bam men nkàn mfe là, kà mfèl i be ke fà kwibtu yen nyàm nà.

¹¹ L'a be ze bo yi nyàm à ju i là, mb'a fà kwibtu i nga nyàm.

¹² L'a be ze mo' nyàm tshwèt bèn nzwi yen nyàm nà là, mb'a bwô ndù a la'te fe i, a be ze nkwénta. Yen ngelaṅ nà, a ke bèn mfà kwibtu nyàm.

¹³ A be ze mènntùn tshwé' ta' nyàm mfèl i, nyàm nà tsho mbe' dù' num i ke nekwù ngelaṅ z'a ke' be nsi là, mba yen mèn n'a' fà kwibtu nyàm nà nga nyàm.

¹⁴ A be z'a be be ndù bo nga nyàm bèn mbe là, mb'a ke fà kwibtu i. A be z'a na' nelén nà, mb'a' fà nkàb z'a na' ndén yi là, a ku' ndùlala.

Tsemo' ntshù' nzenze num nebam Nsi

¹⁵ A be ze mandum batte ménngon ze bo ke' yoṅ nô i, ke bèn njoṅ nka i, kà nô i là, mb'a bwô ndù mandum nà fà njoṅ nkàb ghu fa, nso i.

¹⁶ A be ze tà ngon gha nefà i yi là, mb'a bwô ndù mandum nà fà njoṅ nkàb ghu ze bo num mfà num bonngon tse bo ka yub ke yoṅ nto yub là.

¹⁷ Kà bam ndù mènnzwi z'a be ngaka là yôge.

¹⁸ Mèn z'a nô nyàm nà, bo zwi ng'é.

¹⁹ Mèn nô bo' mo' nsi ghua, ke b'a Tshùaben, mb'a bwô ndù bo tam ng'é.

²⁰ O ke nsi jù bin nkùla', ke bèn mfétt'é, nummbe mba bin na' be ghakùla' mà Egipto.

²¹ Bin ke nsi fim ntshu mfôg mènnzwi ke bèn mfim ntshu ménntse.

²² A be ze bin fim ntshu yube, bo kua' nsoṅ àm nà, mba me nsi ju' nkua' mube.

²³ Yantù àm nsi lo' mbwôge, me tù' zwite zin à ṅwi, yen ngelaṅ nà, zwi tsin tù' fôg bènnzwi, bon tsin tù' bontse.

²⁴ A be z'o fo nkàb ta' mbwoṅ netèt yàm nzwit mèn, mb'o ke ghù yi mba bo num ngù nganjo là, mb'o ke nsi bètt'é bin num yen nkàb là.

²⁵ A be ze mfèl o lo' nzwe njab tshwèt yi wù là, mb'a bwô ndù o ba' nzwe i là yi kà njù nsènne,

²⁶ nummb'a b'a nda' ze nzwe là. A nda' yi z'a num nkabte wul i yi là. A yôg mbe ke be yi, mb'a' kabte wul i à ke? A ne nkua' ntsiaṅ àm, mba me nsi ju' kua' mi, nummbe me b'a Nsi kondèn.

²⁷ O ke nsi tute Nsi o, ke bèn ntshob tatte num nkam ngô o.

²⁸ Kà bin ke'te ku nefà tshàm tshu ndende ngelaṅ ze bin tsho' tshu mbèn ntshàb mfèt là. Bin nsi ke fà tuswe bon tsin tse bandum me.

²⁹ O nsi ghù à be ndaṅndaṅ num nyàm tsho tse ndùbndùb mba tse nke'nke'e. Tuswe bon tshob a' ke ntswe lé'njù sammbàa boa mà yub, a be num mbatte lé' fome, o fà yub me ndo' ngamt'àm yi.

³⁰ Bin nsi b'a ben tshàm tse nelàne. Bin ke nsi fèt mbàb nyàm ze ju sobt'é tshwèt là. Bin nsi ma' lèn yen mbàb nyàm n'a ba mbù.