Netume 2 - NTSHOB NSI

Mba bo bwe Mosé là. Mosé kù nèn ngô Madian

¹ Mo' mèn ntùm tunndà Lévi so mo' ngon Lévi;

² a jùm, mbwe mén mandum yi. Mènnzwi là be yen mba mén nà bwô neshu là, ndem i num ṅwù tat.

³ Mb'a na' mbe ke bèn nku'ni nelem i là, a lo' ketswe', ndo' zin ṅab yi bo nyiaṅ ṅwa'a, nket mén nte ntùm bwe, nèn nte ntùm nka'nesoṅ nkaṅ ta'ntse Nil.

⁴ Ngon mà mén nke ndôte, neyen ju z'a nsi tum num mén nà, ndù a lem tà ngùanesà.

⁵ Tshù, ngon Faraon swe' nse' sôg wut ntse, ghafa' tse tse bènnzwi nke nkatte nkaṅ ntse. A tsin njen ketswe' netèt nka'nesoṅ, ntum ngafa' i ze mènnzwi ndù a nèn nkele.

⁶ A bù', njen mén ntùm bwe, a nke nkua'a. Ndèn mén ko i. A tshob ndù: A nsi b'a mèn ba Héber.

⁷ Ndùlala ngon mà mén nà tshob ngon Faraon ndù: O kô ndù me nèn netèt zwi Héber ndiag ta' i bwe, a ke nyô yen mén ni wù ké ?

⁸ Ngon Faraon bam, ndùlala ménngon nà nèn ndo' mà mén.

⁹ Ngon Faraon tshob ndù: Lo' mén ni nèn nyô me; me nsi fà yu nkàbfa' wù. Mènnzwi lo' mén nèn nyô i.

¹⁰ Ngelaṅ mén ku' là, a lo' i nèn mfà ngon Faraon, a nke ntshagt'é mba nshum i là, ntswi lén se ndù Mosé, nummb'a lo tshob ndù: Me sô i à ntùm ntse.

¹¹ A lo be ndùse Mosé be ndùb là, a nèn lôte fèt tse. Tu wul i yen nànte mfa' mi bo ke ma'ni fèt tse bwe là miag mi. A te lag num mo' mén Egipto z'a ke ntsham mén Héber mo' mèn netèt fèt tse là.

¹² Mosé ma' miag mbaṅ i, ke yen sàm mènntùn, ndùlal'a zwi mén Egipto, ndem fe i ntùm nkwango'.

¹³ A bèn ntshag nse' ndamnjù, ntèt bon Héber bàa nke nzwe. A tshob ngantsha ndù: Numk'o nke ndab mfèl o à?

¹⁴ Ngantsha bùnte ndù: We z'a yab o mfen bo nkeb ntsha netèt bag à? O kwate nezwi àm mb'o na' nzwi mén Egipto là ké? Ndùlala Mosé bwôg, ntshob ndù: Kua' nenùn yen nu là lo' la' fa.

¹⁵ Faraon ju' yen tshô là, nke ndiag nezwi Mosé; a kù nèn ntùm ngô Madian, ndo num miag Faraon. A tswe nsi mbaṅ mo' tôntse.

¹⁶ Tshù, mo' ngale'te lo be Madian ndù a ghù ngonngon sammbàa. Bo se' tu' ntse mi bo so ntùm let jujù nyàm k'a dun, njùmbwe tà yub ke nu là.

¹⁷ Ghabéb mbwe tum nta' yube. Ndùlala Mosé lo nsi, ntshètte yub njam, ngù tshob njùmbwe nu ntse.

¹⁸ Ndùse bo bèn njam mbaṅ tà yub Réuel là, a bètte yub ndù: Bin fe nde sènni be!

¹⁹ Bo bùnte ndù: A b'a nummbe mo' mandum, mén Egipto kwé yag bu ghabéb mbwe. A bèn ntu' mba ntse bag, mbèn ngù nyàm nu ntse.

²⁰ Tà yub bètte ndù: Ng'é yà? Numke bin mfaṅ yen mèn nà bwe à? Bin nèn ntsiaṅ i, a se' njù jujù.

²¹ Mosé bam netswe bo yen mandum nà. A fà ngon i Séfora Mosé.

²² Séfora bwe mén mandum; Mosé tswi lén se Guershom, nummb'a lo tshob ndù: Me b'a ngùn num tsha' ba tum.

Nsi tsho' Mosé ndù a yôg Israél

²³ Ngelaṅ yàm lo be tôge, mfen Egipto kwù. Bon Israél tse bo ke nke' ntsham zwe ntùm ndà kuan nà, tshag nze yub tù nkua' mà ndà kuan, nze yub nèn tà kum mbaṅ Nsi.

²⁴ Nsi ju' nkua' mube, nkwimte kàn se s'a wat bo Abraham, Isak mba Yakob là.

²⁵ A lôte bon Israél, mbèn ndèn yube.